Read zande Yugoti 18 Bible Online

Yugoti 18 - zande bible

Yugoti 18

¹Fuo agi apai re, mi ki bi kura maraika ko nizorõ ngbangbaturũ yo, du na bakere tandu: kpotosende ki ha aha be gako taarimo.

²Ko ki pai ni bakere fugo, niya, “Si ti, si ti, nga Babera gu bakere bakporo! Si ki sa tihe ni kporo adaimona, na bambukisa tipa gbigbita atoro, na bambukisa tipa gbegberẽ azire du ni kere ra dunduko;

³Bambiko arikaaboro dunduko ambiri gu imekakue nga ga gu zinga nga ga gari pa bari, abakindo zegino amangi pa bari na ri, ababagiahe zegino akumuko mbiko gu tandu nga ga gari bakere wasiro.”

⁴Mi ki gi fugo ngbangbaturũ yo, niya, “Oni kúru yo du ri ni, gimi aboro, ka gaoni ngbanya dú nga na gari ingaapai ya, oni ka dia gari gberãngbi;

⁵bambiko gari ingaapai ada kina ku ngbangbaturũ yo, Mbori ki tingidi pa gari irairaapai.

⁶Oni gási he fu ri wa ri afu he, na bara ue kuti gari mangaapai; wa ri akodi he rogo inga, oni kódi he fu ri bara ue.

⁷Wa ri aabia tiri ki nibagi gari ũkumuko ni pa bakere wasiro a, oni fú ima na rungosi fu ri kina wo. Bambiko ri aya ku kpotori yo: ‘Mi nasunga ni nakindo, dekurugbo nga mi te, mi abí nga rungo te,’

⁸si du gari rungosi adá ti ni rogo uru sa, kpio na rungo, na gberãngbi, i azókoda ri ni we dunduko; bambiko tandu ti Gbia Mbori, nga gu ko nasapu ngbanga ri.”

⁹Agu abakindo zegino naamanga bari na ri, ki mangi wasiro a, ho i ka bi ngimi zozo ho ni, i akpara ha akpara ni aume,

¹⁰niru tuturu ni gunde mbiko imisiri gaha apai, niya, “Ako! ako! gu bakere bakporo nga Babera! nga nyanyaki bakporo! Gamo sapangbanga da rogo saa sa.”

¹¹Ababagiahe zegino ki ta kpara ni rungo tipa ha bambiko a nga boro sa angbe gayo ahe berewe te;

¹²agu ahe du ni dahabu, na feda, na ambia kii pa genoho gbe, na ambia fongo, na nzaranzara pusi remu, na ngungungu remu, na fiofio roko na zamba ha a; na ngua wa bagu, na akurungbu rindimbara, na akurungbu ngua kii pa genoho gbe, na sirigi, na marã, na nzerengenzerenge mbia a;

¹³na kinanona, na ngbatunga agu ahe du ni wene fuõ ho, na tome ngua tipa zo ho, na wene fuõ nzeme, na wene fuõngua, na imekakue, na nzeme, na fúrufurú ngungo, na mapunga, na abagara, na akandoro, na afarasi, na angbagida, na kpoto aboro na mbisimo aboro a.

¹⁴“Agu zuzuahe mbisimoro akpi nyemu he gbe, si aguari ti ro, na agu ahe dunduko du ni wene he, ni imaima ha a, si akpi be ro, aboro abi nga ha berewe wa sa te!”

¹⁵Ababagi agi ahe re, nga agu yo naakumuko mbiko bakporo, i arú tuturũ mbiko gunde imisiri gaha pai, ki ta kpara ni rungo, ki ya,

¹⁶“Ako, ako, gu bakere bakporo re nga gu du ni ukadiukadi he na nzaranzara pusi remu, na ngungungu remu na zamba ha a, naafonga tihe ni dahabu, na agu ambia kii pa genoho gbe, na ambia fongo!

¹⁷Rogo saa sa i agbarasi gu bakere ũkumuko re.” Abaira abaakurungba baime, na agu yo dunduko nandu ku rogo agu arago ri baime, na aboro bakurungba, na agu yo namanga sunge ri baime; i ki ru tuturu,

¹⁸ki poi ku ari, wa i angera ka bi ngimi zozo ho, niya, “Gini bakporo du wa gu bakere bakporo re?”

¹⁹I ki mi nvutu ku riyo yo, ki kpari ni aume ni rungo, niya, “Ako, ako, gu bakere bakporo re rogo ho yo i akumukosi agu yo ni dunduko naadu na gayo abaakurungba rogo baime yo mbiko gaha ũumuko! Bambiko rogo saa sa i gbarasi he.

²⁰Mo ngbangbaturũ, mo ngi tipa ha, na oni nga ga Mbori aboro, na oni nga amokedi na oni nga anebi, bambiko Mbori airi bape roni ku ri he!”

²¹Gu nyanyaki maraika ki di mbia, wa ka si angia bakere mbia saahe, ki ba ha ku rogo baime yo, niya, “A wo i ka ba Babera, gu bakere bakporo re, ni bakere tigo i abí nga ha berewe wa sa te;

²²I agía nga woro atakikundi, na abayango, na avudimbanya, na avudikpangi rogo ro yo berewe te; i abí nga bangbasia boro sunge rogo ro yo berewe a te; i agía nga woro mbia saahe rogo ro yo berewe wa sa a te;

²³ima tara aása nga rago rogo ro yo berewe a te; i agía nga fugo gu kumba nadi de, na fugo gu de i adia ri rogo ro yo berewe a te; bambiko gamo ababagiahe adu ni akindo rogo kpotosende, bambiko mo anangi arikaaboro dunduko ni ga soroka.

²⁴I abi kure anebi rogo ho yo na kure ga Mbori aboro, na ga agu yo dunduko i aimi yo auru kpotosende.”