Read zande Yugoti 19 Bible Online

Yugoti 19 - zande bible

Yugoti 19

¹Fuo agi apai re, mi ki gi pai wa ka bakere fugo du nga ga bakere rimbasa aboro ngbangbaturũ yo naya, “Areruya! Bata du ti gaani Mbori, na taarimo, na tandu,

²bambiko gako sapangbanga du ni ruru he na rengo; bambiko ko asapu ngbanga gu bakere debari, nga gu ri nagbarasi kpotosende na gari pa bari, ko airi bape kure gako amoyambu ti ri.”

³I ki ya ni ue he, “Areruya! Ngimi zozo ri nagunda nye anye kindi.”

⁴Agu abaakumba naadu 24, na gu unga anya naadu biama ki ti sande, ki niirisi Mbori nasunga auru mbatabakindo, ki ya, “Amina, Areruya!”

⁵Fugo ki poi mbatabakindo yo ki ya, “Oni nga gako amoyambu dunduko, oni fú tambuahe fu gaani Mbori, na agu roni naagunde ti ko, nga umba pa roni na kikindigi pa roni a.”

⁶Mi ki gi pai wa ka bakere fugo du nga ga rimbasa aboro, na wa woro dungu abaime, na woro bakere gumba, naya, “Areruya! Bambiko Gbia nga gaani Mbori, du na tandu apai dũ, ko nazoga rago.

⁷Ani ngí angi ki du na bakere ngbarago, ani táasi rimoko, bambiko gu rago diade nga ga Wiri Kandoro da, diako aima mbakada tiri;

⁸i ki asia ha fu ri ya ri ukadi tiri ni nzaranzara pusi remu, ni imaima ha ni gigiri he a”— bambiko gu pusi remu re nga gu ruru mangaapai nga ga ga Mbori aboro.

⁹Maraika ki ya fere, “Mo ké gi pai re, Aboro maku nga agu yo yambu yo yo sa gu pumbo diade nga ga Wiri Kandoro.” Ko ki ya fere, “Agi apai re nga gu ndikidi fugo nga ga Mbori.”

¹⁰Mi ki ti pati nduko ka irisa ko. Ko ki ya fere, “Ka mo mángi nga gure ya! Ani nga amoyambu na mo, na agu awirinamo naka kuti gu dezirepai nga ga Yesu. Mo írisi Mbori.” Bambiko gu dezirepai nga ga Yesu nga gu toro nagumba pai wa nebi.

¹¹Mi ki bi ngbangbaturũ ni zaza ha, oni ngere, pusi farasi ki du! Gu ko nasungu auru ru, i niya ti ko, Iranyaka, nga Irarengo; ko nasapa ngbanga ki so vura ni ruru he.

¹²Bangiriko nga mirãwe, dungu akpakpari du ku riko yo a; i ake rimoko, nga gu rimo ka kura boro aina nga ha ya, kina ko ni tiko.

¹³I aukadi ko ni remu ni migidimigidi he na kure. I nayamba rimoko nga, Ga Mbori Pai.

¹⁴Agu arikavura du ngbangbaturũ yo, i apeka fuo ko auru pusi afarasi a, ni ukadiukadi yo ni nzaranzara pusi remu, du ni vuvuru he na ziazia ha a.

¹⁵Tftĩ basape ki kuru ngbako yo, ko di be arikaaboro na ni. Ko azóga yo na ngbondo marã; ko asímba he rogo bapiraahe yo, nga gu imekakue nga ga gu ngariangaria zinga nga ga Mbori, du na tandu apai dũ.

¹⁶Rimoko adu ni keke he ti gako remu na auru kpakpu mbosoko nga, Bakindo ri abakindo, Gbia ri agbia a.

¹⁷Mi ki bi kura maraika, ko ru rogo uru; ko ki poi ni bakere fugo, ki ya fu azire dunduko nga agu ra nagu ari yo, “Oni yé ki dungura tironi sa gu bakere pumbo nga ga Mbori;

¹⁸oni ka ri pasio abakindo, na pasio abarutirivura, na pasio airaome, na pasio afarasi, na pasio agu yo nasungu auru ra, na pasio aboro dunduko, nga agu yo ra ni riyo na akanga a, nga umba pa yo na kikindigi pa yo a.”

¹⁹Mi ki bi nyarinde, na abakindo zegino, na gayo arikavura, i nidungura tiyo ka so vura kuti gu ko nasungu auru farasi na gako arikavura.

²⁰I ki di nyarinde na gu zire nebi namangi agu apai i aina pai ti ni ku bangiru, nga gu pai ko anangi agu yo du na gu nogodinogodi he ti yo nga ga nyarinde na ni, na agu yo nairisi kpiaru. I ki ba yo ue ni ungayo ku rogo gu ngirimo we nagbi na baruti.

²¹I ki imi yangara yo ni gu basape nga ga gu ko nasungu auru farasi, nga gu basape nakuru ngbako yo. Azire ki mbiki be pasioyo dunduko.