Read zande Yugoti 2 Bible Online

Yugoti 2 - zande bible

Yugoti 2

¹“Mo ké he fu gu maraika nga ga gu kanisa du Efesa yo ya: ‘Gu ko du na akerekuru saba rogo kumbabeko, naata dagba agu abaduawe ni dahabu du saba, ko gumba agi apai re.

²“‘Mi ini ga mangaapai, na ga sunge, na ga hipai, ya mo aida nga na gbegberẽ aboro te, mo aasadi agu yo naya tipa tiyo amokedi nga yo, ka i adu nga wo ya, mo ki bi yo ni kina airazire.

³Mi ini he ya mo du na hipai ki kpidi pa rimore, mo ambu nga te.

⁴Ono pai ngbare sa ro, nga, mo mbu ga bambata nyemuse.

⁵Mo tíngidi pa ho ti mo ni tie, ki sa ga berã, ki nimangi gu bambata mangaapai; ka si adu nga wo ya mi ayé koyo du mo ni, ki di ga baduawe rogo gu baha, nga kina gu ka mo sa ga berã.

⁶Ono gi pai dũ ku baha re, nga mo nasoga gu mangaapai nga ga aNikorao, nga gu mi nasoga ha a.

⁷Gu ni du na tu gia ha ti ni, ni gí gu pai Toro nagumba fu akanisa. Gu ni ka di be pai, mi afú zuzu gu rindingua fu ni nga ga unga, nga gu du rogo ga Mbori Paradiso, ni ki ri he.’

⁸“Mo ki ke he fu gu maraika nga ga gu kanisa du Semuruna yo ya; ‘Gu ko du ni bambata ko na yangara ko, nga gu ko nakpi ki du ni ungako berewe, ko nagumba agi apai re.

⁹“‘Mi ini pa ga gberãngbi, na ga rungo, ono mo na ũkumuko, na gu soapai nga ga agu yo naya i nga aYudo, ka i adu nga wo ya, ono i nga ga gu bambutiria nga ga Satana.

¹⁰Ka mo gúnde nga be agu apai mo ka hi he ya. Mo ngére, bakitingbanga nikaba agu roni ku bambukisa yo, i asadi roni; oni ahi gberãngbi uru ki du bawe. Mo ngárã angarã ki da ti kpio, mi ki fu kpakpari unga foro.

¹¹Gu ni du na tu gia ha ti ni, ni gí gu pai Toro nagumba fu akanisa. Gu ni ka di be pai, ni aima nga be ue kpio te.’

¹²“Mo ki ke he fu gu maraika nga ga gu kanisa du Perugamona yo ya; ‘Gu ko du na gu tĩtĩ basape du na rindihe ue, ko nagumba agi apai re.

¹³“‘Mi ini ho mo naraka ni, kina yo du ga Satana mbatabakindo ni; mo naka kuti rimore, mo abasa nga ida pa re te, zavura rago Andipa nangia dezirere, ni gi kangara boro vurũ, nga gu ko i aimi ko dagba roni yo, yo Satana naraka ni.

¹⁴Ono mi na bete pai kuti ro, bambiko bete agu yo du yo du mo ni naka kuti gu yugopai nga ga Birama, nga gu ko nayugu pa maa ũkota fu Baraka ku mbata yo fu awiri aYisaraere, i ri agu ahe i atumo na ni fu kpiaahe, ki nimangi pa bari.

¹⁵Wo du mo a na bete agu yo ninaka kuti gu yugopai nga ga aNikorao.

¹⁶Si du mo ka sa ga berã ti ni; ka si adu nga wo ya mi ki ye koyo du mo ni ni ipo, mi ki so vura na yo ni gu basape du ngbare yo.

¹⁷Gu ni du na tu gia ha ti ni, ni gí gu pai toro nagumba fu akanisa. Gu ni ka di be pai mi ki fu okooko manu fu ni, mi ki fu pusi mbia fu ni na vovo rimoni ni keke he auru gu mbia re, nga gu ka boro aina nga ha ya ono kina gu ni nadia ha.’

¹⁸“Mo ki ke he fu gu maraika nga ga gu kanisa du Tuatira yo ya: ‘Wiri Mbori nagumba agi apai re, nga gu ko du bangiriko wa mirãwe, na nduko wa taataa sirigi.

¹⁹“‘Mi ini ga mangaapai, na ga nyemuse, na idapase, na mangapase, na hipai, ya gu ga mangaapai du ni kusa ha si susi gu naadu mbata.

²⁰Ono pai ngbare sa ro, nga mo naida pa gu de nga Izebere, nga gu ri naya ni tiri denebi nga ri; ri ki yugu pai fu gimi amoyambu ki nangi yo i mangi pa meteka, ki niri agu ahe i atumo na ni fu kpiaahe.

²¹Mi afu rago fu ri, ri sa gari berã; ka ri aida nga ka sa gari berã ti gari pa meteka ya.

²²Mo ngere, mi abá ri ku rogo barame yo, na agu yo namanga bari na ri ku rogo bakere gberãngbi, kina gu ka i sa gayo berã ti gari mangaapai.

²³Mi aímo awiriri ni kpio; akanisa ki ini he dunduko ya mi nga gu ko nawisiga vuse yo na ngbaduse yo. Mi ki fuku he fu roni ni ba sa sa rengbe na gaoni mangaapai.

²⁴Ono mi nagumba ha fu roni na fu gu yangara yo du Tuatira yo, nga agu yo ata ka nga kuti gi yugopai re ya, aina nga gu dudungura pai nga ga Satana, wa i nagumba pa ha a, ya; mi amaa nga kura tindiro ri roni te.

²⁵Pai sa, mo ká kuti agu apai du be ro ki da ho mi ka ye ni.

²⁶Gu ni ka di be pai, ki ka kuti gi mangaapai ki da ti digida ha, mi aásia pa rika aboro fu ni,

²⁷ni ki zogo yo ni ngbondo marã a wa ka i kuadi agu aakoro nga ga bamekehe rukutu, a wa mi adi he be Buba;

²⁸mi afú gu kerekuru nga ga wiso ru fu ni.

²⁹Gu ni du na tu gia ha ti ni, ni gí gu pai Toro nagumba fu akanisa.’