Read zande Yugoti 20 Bible Online

Yugoti 20 - zande bible

Yugoti 20

¹Mi ki bi kura maraika, ko zorõ ngbangbaturũ yo, gu wiri rifungura nga ga gu due zanga mburuhe ki du be ko, na bakere azogbo.

²Ko ki zi daragona, nga gu bakuru wo, nga Bakitingbanga, nga Satana, ki vo ko tipa agarã 1,000,

³ki ba ko ku rogo gu due zanga mburuhe, ki kisi he, ki dika ha ku auru ko, ka ko ananga nga arikaaboro berewe wa sa ya, daho agarã ka nyasa ni 1,000, fuo gere i ka zaka ko ngbutuko.

⁴Mi ki bi ambatabakindo, na agu yo nasungu auru he, i ki asia pa sapangbanga fu yo. Mi ki bi mbisimo agu yo i akafu riyo mbiko gu dezirepai nga ga Yesu, na mbiko ga Mbori pai, nga agu yo airisa nga nyarinde na kpiaru a ya, ka i anogoda nga he ti ngbanda kpakpuyo na ti bevo a ya. I ki du ni ungayo berewe, ki nizogo rago na Kristo agarã ki du 1,000.

⁵Yangara kangba aboro adu nga ni ungayo te daho agarã ka nyasa ni 1,000. Gere nga bambata zingabekpio.

⁶Boro maku du ni ziazia ni, nga gu ni i akpara ni sa bambata zingabekpio! Ue kpio adu nga na tandu ku ri agu yo te re, ono i adú ni aboromotumo nga ga Mbori yo, na ga Kristo yo, i azóga rago na ko agarã ki du 1,000.

⁷Ho agarã ka nyasa ni 1,000, i akúsa Satana rogo gako bambukisa yo,

⁸ko akúra ka nanga arikaaboro nga agu yo du durugaduruga digida sende yo wa du he biama, nga Gogo na Magogo, ka dungura yo sa vura; ka i gedi yo i du wa kina ngume baime.

⁹I ki nindu dirikpa a wa kia kpotosende, ki de gangi pati gu bataya nga ga ga Mbori aboro na gu bakporo ko akpi nyemu he gbe. We ki zorõ ngbangbaturũ yo ki nizokodi yo.

¹⁰I ki ba bakitingbanga, nga gu ko naanangi yo ku rogo gu ngirimo we nagbi na baruti, yo du nyarinde ni na zire nebi a. I ki nirungosi yo uru na yuru nye anye kindi.

¹¹Mi ki bi bakere pusi mbata sapangbanga, gu ko nasungu auru he, kpotosende na ngbangbaturũ ki oro be kpakpuko; ka i abi nga ba tipa ha ya.

¹²Mi ki bi agu yo naima kpika, nga kikindigi pa yo na umba pa yo, i niru barangba mbata sapangbanga, i ki za akitabu. I ki za gu kura kitabu nga kitabu unga. I ki sapu ngbanga agu yo naima kpika kuti agu apai du ni keke he rogo akitabu, ringbisi he kuti gayo mangaapai.

¹³Baime ki gasi agu akangba nadu rogo ho, kpio na Adisi ki gasi agu akangba nadu rogo ho; i ki nisapu ngbanga aboro dunduko ringbisi he kuti gayo mangaapai.

¹⁴I ki ba Kpio na Adisi ku rogo ngirimo we yo. Gere nga ue kpio, nga kina ngirimo we.

¹⁵Ka i abi nga rimo gu ni rogo kitabu unga yo ya, i ba ni ku rogo ngirimo we yo.