Read zande Yugoti 21 Bible Online

Yugoti 21 - zande bible

Yugoti 21

¹Mi ki bi vovo ngbangbaturũ na vovo kpotosende; bambiko bambata ngbangbaturũ na bambata kpotosende aima nyasa, baime adu nga berewe a te.

²Mi ki bi gu ziazia bakporo, nga vovo Yerusarema, si nizorõ ngbangbaturũ yo yo du Mbori ni, i ambakadi he wa gu de i afongo ri nikadia kumbari.

³Mi ki gi bakere fugo yo du mbatabakindo ni, naya, “Oni ngére, ga Mbori banye du na aboro, ko anyé na yo, i adú ni gako aboro, Mbori anyé na yo tigako, ki du ni gayo Mbori

⁴Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”

⁵Gu ko nasungu auru mbatabakindo, ko ki ya, “Oni ngére, mi nambakada ahe dunduko ni vovo ho.” Ko ki ya. “Mo ké agi apai re, bambiko si nga ruru he nga rengo a.”

⁶Ko ki ya fere, “Si ni mangimangi he! Mi nga Arufa na Omega, nga bambata ko na yangara ko. Mi afú gu ime unga nga ga gugaabi gbua fu gu ni du na gomoro ime.

⁷Gu ni ka di he pai, ni adía kumbo agi ahe re; mi adú ni gani Mbori, ni ki du ni wire.

⁸Ono tipa airagunde, na abasapai, na airagbegberẽpai, na abaimiaboro, na airabari, na airasoroka, na airisi kpiaahe na airazire dunduko, gayo ba nikangia gu ngirimo nagbi na we na baruti; si nga ue kpio.”

⁹Gu ni ki ye sa dagba agu amaraika nadu saba, nga agu yo kurungbu adu be yo saba, nga agu yo naadu na yangara gberãngbi saba, ko ki fura na mi, ki ya “Mo yé fuo re, mi ayúgo gu de foro kumba nikadia ri, nga dia Wiri Kandoro.”

¹⁰Ziazia Toro arugu re, maraika ki ndu na mi ku ri bakere bagangara du ni gbanga ha, ki yugu gu ziazia bakporo fere, nga Yerusarema, si nizorõ ngbangbaturũ yo yo du Mbori ni,

¹¹na ga Mbori iiriwo taarimo ti ni; gaha imarago ki du wa mbia, kii pa genoho gbe, wa yasipi, wa ngenzerengenzere pusi mbia.

¹²Ngapa bakporo adu ni bakere he ni gbanga ha; ki du na angbadimoho bawe na ue, amaraika ki sungu ngbadimoho bawe na ue; i ake rimo ti ni, nga rimo ngbatunga awiri Yisaraere bawe na ue.

¹³Angbadimo ki du biata ku uroyo, angbadimo ku nodiyo biata, angbadimo biata ku sudiyo, angbadimo biata ki du ku dioyo.

¹⁴Ngapa bakporo adu na mburuhe bawe na ue, na rimo bawe na ue nga ga agu amokedi bawe na ue nga ga Wiri Kandoro yo.

¹⁵Gu ko nafura na mi, ko adu na ngua ringbisaahe beko na dahabu ti ni, ka ringbisa bakporo, na gaha angbadimo na gaha ngapa.

¹⁶Bakporo ki du na pavuruhe biama, bagizaha ki du wa sa na patihe; ko ki ringbisi bakporo na gu ngua si ki du wa akirometere 2,200. Bagizaha ki du wa sa na patihe na basonaha a.

¹⁷Ko ki ringbisi ngapa bakporo bagiza mbiribe ki du 144, kuti gu ringbisiringbisi he nga ga boro, wa ka si du wa ga maraika a.

¹⁸I adua ngapa bakporo ni gu mbia nga yasipi, bakporo ki du ni ziazia dahabu wa ziazia murangi.

¹⁹I afongo ngapa bakporo ni gu rika ambia dunduko ku pa genoho gbe. Bambata mburuhe ki du ni yasipi gu ue he ni safero, gu biata ha ni karekedo, gu biama ha ni zumeradi, gu bisue he ni sadonuki,

²⁰gu sita ha ni sadio, gu saba ha ni rusoriso, gu muambi he ni berure, gu ribua ha ni tapazo, gu bawe he ni rusaraso, gu bawe na sa ha ni yakino, gu bawe na ue he ki du ni amesute.

²¹Angbadimo bawe na ue nangia ambia fongo bawe na ue, ngbadimo sa nangia mbia sa, ni ba sa sa, gene bakporo ki du ni ziazia dahabu wa ka si du ni ziazia murangi.

²²Mi abi nga yekaru rogo ho te, bambiko Gbia Mbori du na tandu apai dũ, na Wiri Kandoro, nga gaha yekaru.

²³Bakporo adu nga na zingo ima uru, na zingo ima diwi ka hasa ri he te: bambiko ga Mbori taarimo nahasa rago yo, Wiri Kandoro nga gaha tara.

²⁴Arikaaboro atá rogo gaha imarago, abakindo zegino ayé na gayo taarimo ku rogo ho.

²⁵I akísa nga angbadimoho uru wa sa te, bambiko yuru adú nga yo te.

²⁶I ayé na gu taarimo na irisa nga ga arikaaboro ku rogo ho.

²⁷A nga birikobiriko he, na agu yo namanga gbegberẽpai, na agu yo naagumba zire nikarima koyo wa sa te; ono kina agu yo i ake rimoyo ku rogo ga Wiri Kandoro kitabu unga yo.