Read zande Yugoti 22 Bible Online

Yugoti 22 - zande bible

Yugoti 22

¹Ko ki yugu di fere, nga ga ime unga, si ki du ni kurẽkurẽ he, nigbadi tii gu mbatabakindo yo nga ga Mbori na ga Wiri Kandoro,

²ku rogo gene bakporo. Gu ngua ki du nga ga unga ti ngba di kono na ku mbiti yo a, si nazuka rindihe bawe na ue na diwi na adiwi; akpehe ki du tipa husa arikaaboro.

³Motiwa adú nga ho berewe wa sa te; ono ga Mbori mbatabakindo na ga Wiri Kandoro ki du rogo ho. Gako amoyambu amánga pa ko;

⁴i ki nibi kpakpuko; rimoko adú ti ngbanda kpakpuyo.

⁵Yuru adú nga ho berewe te; i akpí nga nyemu ima baro a te, na ima uru a te; bambiko Gbia Mbori afú imarago fu yo, i azóga rago nye anye kindi.

⁶Ko ki ya fere, “Agi apai re nga ruru he nga rengo a. Gbia nga Mbori nafu gako Toro fu anebi, ko akedi gako maraika ka yugo pa agu apai naye ka manga mbembedi fu gako amoyambu.

⁷Were, oni ngére, mi na ye ni ipo.” Boro maku nga gu ni naka kuti pa gu gumba pai dũ rogo gi kitabu re.

⁸Mi, Yoane, nga gu ko naagi agi apai re ki bi he. Ho mi agi he ni, mi ki ti sande ka fu irisa pati ndu gu maraika naayugu agi apai re fere.

⁹Ko ki ya fere, “Ka mo mángi nga gure ya! Ani nga amoyambu na mo na agu awirinamo nga anebi, na agu yo naka kuti gu pai dũ rogo gi kitabu re. Mo írisi Mbori”.

¹⁰Ko ki ya fere, “Ka mo díka nga he kuti gu gumba pai nga ga gi kitabu re ya; bambiko ragoho nambeda.

¹¹Gu ni naamanga gbegberẽpai, ni mángi gbegberẽpai kindi, gu ni du ni birikobiriko ni, ni birikosi tini kindi; gu ni nga ruru boro, ni mángi rurupai kindi gu ni du ni ziazia ni, ni dú ziazia kindi.

¹²“Oni ngére, mi naye ni ipo; gi mosoro ki du be re, ka ringbisa ha na kina ga aboro mangaapai nifu he fu yo.

¹³Mi nga Arufa na Omega, nga gu bambata ko na yangara ko, nga tonatona he na digida ha.”

¹⁴Aboro maku nga agu yo nazunda gayo aremu, ya i asia pa ngua unga fu yo, i rimi ku rogo bakporo ti ngbadimoho.

¹⁵Aango ki du zegi yo, na airasoroka, na airabari, na abaimiaboro, na airisi kpiaahe na agu yo dunduko nakpi nyemu zire ki nimangi he.

¹⁶“Mi, Yesu, nakedi gi maraika ko du ni dezire agi apai re fu akanisa. Mi nga Tarã Dawidi, nga gako vungu a, nga gu taataa kerekuru nga ga wiso ru.”

¹⁷Toro na gu de kumba nikadia ri, i niya, “Mo yé.” Gu ni nagia ha ni ki ya a, “Mo yé.” Gu ni gomoro ime namanga ni, ni ye, gu ni idi he, ni di ime unga gbua.

¹⁸Mi du ni dezirehe fu agu aboro dunduko nagia pa gu gumba pai dũ rogo gi kitabu re. Ka boro mokiisa paha, Mbori amókiisa agu agberãngbi i ake pa ha rogo gi kitabu re ku ri ni.

¹⁹Ka boro di he ti agu apai du ni keke he rogo gi gumba pai re, Mbori adía gani bete ahe be ni nga ga ngua unga, na gu du rogo ziazia bakporo yo ku sa yo, nga gu du ni keke he rogo gi kitabu re.

²⁰Ya gu ko du ni dezire agi apai re, “Ii, mi naye ni ipo.” Amina. Mo yé, Gbia Yesu!

²¹Gu undahe nga ga Gbia Yesu dú na ziazia aboro. Amina.