Read zande Yugoti 5 Bible Online

Yugoti 5 - zande bible

Yugoti 5

¹Were mi ki bi kitabu rogo kumbabe gu ko nasungu auru mbatabakindo, i ake pai vuru he yo na gii he yo a, si adu ni kisikisi he na dikadika ahe ti ni saba.

²Mi ki bi nyanyaki maraika naaringbisa pai ni bakere fugo ya, “Da re na zara gi kitabu re ki ukua gu dikadika ahe du ti ni?”

³A nga boro sa ngbangbaturũ yo, na auru kpotosende, na tii kpotosende yo, are na zara gu kitabu re na ka ngera ku rogo ho a te.

⁴Mi ki kpari gbe bambiko a nga boro sa nare na zara gu kitabu re na ka ngera ku rogo ho a te.

⁵Gu ni sa dagba abaakumba ki ya fere, “Ka mo kpári nga ya; mo ngére, gu Bahu nga ga ngbatunga aYudo ru, nga gu nga Tarã Dawidi, ko di be pai ka zara kitabu na gu dikadika ahe du ti ni saba.”

⁶Were dagba mbatabakindo, na gu unga anya nadu biama, na dagba abaakumba, mi ki bi Wiri Kandoro naru, wa gu ru i aimi ru, u adu na gbangaru saba, bangiru ki du saba, nga agu atoro du saba nga ga Mbori yo, i akedi yo ku rogo kpotosende dunduko.

⁷Wiri Kandoro ki ye, ki di gu he kumbabe gu ko yo nasunga auru mbatabakindo.

⁸Ho ko adi kitabu ni, gu unga anya nadu biama, na agu abaakumba nadu 24, i ki tiwi barangba Wiri Kandoro, i adu na akundi be yo ni ba sa sa, na akurungbu dahabu du na wene fuõngua rogo ho, si nga agu akpe nga ga ga Mbori aboro.

⁹I ki nibi vovo bia niya, “Re mo are, na dia kitabu, ki niukua gu dikadika ahe du ti ni, bambiko i aimi ro, mo angbe aboro ni kurero fu Mbori dagba angbatungayo, na angbatunga afugoyo, na aboro, na arikaaboro dunduko,

¹⁰ki sa yo ni abakindo na aboromotumo tipa gaani Mbori; i ki nizogo rago auru kpotosende.”

¹¹Mi ki ngere, mi ki gi fugo dungu amaraika pati mbatabakindo kirikiri na pati unga anya na abaakumba a; ka i gedi yo bange yo ki susi badungu akutu gbe.

¹²I ki niya ni bakere fugo, “Re gu Wiri Kandoro are i aimi ru na dia tandu, na ũkumuko, na tatamana, na ome, na irisa na taarimo, na maku a!”

¹³Agu ahe dunduko i amangi he ngbangbaturũ yo, na auru kpotosende, na tii kpotosende yo, na auru baime, na agu ahe dunduko nga gu du rogo ho yo, mi agi he, si niya; “I fu maku, na irisa, na taarimo, na ngbi, fu gu ko nasunga auru mbatabakindo, na fu Wiri Kandoro, nye anye kindi!”

¹⁴Gu unga anya naadu biama ki ya, “Amina!” Abaakumba ki tiwi sande ki fu irisa.