Read zande Yugoti 6 Bible Online

Yugoti 6 - zande bible

Yugoti 6

¹Mi ki bi ho Wiri Kandoro aukua gu sa dagba gu dikadika ahe ni saba, mi ki gi pa gu ru sa dagba unga anya biama, u nipoi ni fugo wa woro gumba, ki ya, “Mo yé!”

²Oni ngére, mi ki bi farasi ni pusi ru, mboto ki du be gu ko nasungu auru ru; i ki fu kpakpari fu ko. Ko ki ta kura nidi be apai, ki ndu ka dia be apai.

³Ho ko aukua gu ue dikadika he ni, mi ki gi pa gu ue unga nya, u ki ya, “Mo yé!”

⁴Kura farasi ki kuru, nga zamba ru. I aasia pa dia zereda auru kpotosende fu gu ko nasungu auru ru, aboro imi tiyo dagba yo. I ki fu bakere basape fu ko.

⁵Ho ko aukua gu biata dikadika he ni, mi ki gi pa gu biata unga nya, u ki ya, “Mo yé!” Oni ngére, mi ki bi farasi ni bibiri ru; ringbisahe ki du be gu ko nasungu auru ru.

⁶Mi ki gi he wa ka fugo poi dagba unga anya biama, niya, “Moduka zendehe wa mapunga sa tipa rukutu marã feda sa, amoduka morũ biata tipa rukutu marã feda sa; ono ka mo gbárasi nga pa nzeme na imekakue ya!”

⁷Ho ko aukua gu biama dikadika he ni, mi ki gi fugo gu biama unga nya, u ki ya, “Mo yé!”

⁸Oni ngére, mi ki bi farasi ni fukpere ru. Gu ko nasungu auru ru, rimoko angia Kpio; Adisi ki peke fuo ko. I ki asia pai fu yo auru bete kpotosende nga biama ha, i imi aboro ni basape, na ni angbongi, na ni kpio, na ni agu anyarinde nga ga kpotosende ra.

⁹Ho ko aukua gu bisue dikadika he ni, mi ki bi mbisimo agu yo i aimi yo tipa ga Mbori pai na tipa gu dezire i aka kuti ni, ku tii bamotumo yo.

¹⁰I ki ta paa ni bakere fugo niya, “Ako ziazia ndikidi Baira, rago adu waĩ mbata mo nikasapa ngbanga agu yo naraka auru kpotosende ki iri bape kurerani?”

¹¹I ki fu pusi remu fu yo ni ba sa sa; ki ya fu yo i ongodi ngbutuko, daho i ka digisa pa gayo abadiasunge ni, na awirinayo, nga agu yo i ka imo yo wa kina yo.

¹²Mi ki bi he ho ko aukua gu sita dikadika he ni, ya bakere bazigizo adu, uru ki sa tihe ni bi he, wa gu roko i natu he ni bibiri mange nya, diwi ki sa tiru wa kure;

¹³agu akerekuru du ari yo, ami ki tiwi ku sende wa vurumo nabafa gbarisaha, ho si nawo ni be bakere yuge.

¹⁴Ngbangbaturũ ki guari wa kãikãi waraga ho ka i nikãi he ni, i ki gbisi abaagangara dunduko na akisanga rogo baha.

¹⁵Abakindo zegino, na agbia, na abarutirivura, na aboro kumuko, akanga na araniri a, i ki oko tiyo ku simbia yo, na dagba agu ambia nga ga abaagangara;

¹⁶i ki ya fu abaagangara na ambia, “Oni tiwi ku auru rani, ki oko rani ti bangiri gu ko nasunga auru mbatabakindo, na be gu zinga nga ga Wiri Kandoro;

¹⁷bambiko gu bakere rago nga ga gayo zinga si da; da rengbe ka ru?”