Read zande Yugoti 7 Bible Online

Yugoti 7 - zande bible

Yugoti 7

¹Fuo gere mi ki bi amaraika biama i rundu ti durugaduruga digida kpotosende biama, i ki zadi agu ayuge biama nga ga kpotosende, ka yuge aya nga auru kpotosende, na auru baime, na ti ngua a ya.

²Mi ki bi kura maraika, ko nakuru uroyo, gu dikadika he ki du be ko nga ga unga Mbori. Ko ki poi ni bakere fugo koyo du agu amaraika ni naadu biama, nga agu yo i afu pa imisa kpotosende fu yo na baime,

³ki ya “Ka oni ímisi nga kpotosende, na baime, na angua, mbata fu nogoda ani he ti ngbanda kpakpu agu yo nga ga gaani Mbori amoyambu, ya.”

⁴Mi ki gi pa bange agu yo i anogodi he ti yo, ya i adu 144,000, nga agu yo i anogodi he ti yo dagba angbatunga awiri aYisaraere.

⁵Dagba angbatunga Yuda i anogodi he ti yo 12,000. Dagba angbatunga Rubena i anogodi he ti yo 12,000. Dagba angbatunga Gada i anogodi he ti yo 12,000.

⁶Dagba angbatunga Asera i anogodi he ti yo 12,000. Dagba angbatunga Nafatari i anogodi he ti yo 12,000. Dagba angbatunga Manase i anogodi he ti yo 12,000.

⁷Dagba angbatunga Simona i anogodi he ti yo 12,000. Dagba angbatunga Revi i anogodi he ti yo 12,000. Dagba angbatunga Yisasakara i anogodi he ti yo 12,000.

⁸Dagba angbatunga Zeburuna i anogodi he ti yo 12,000. Dagba angbatunga Yosefa i anogodi he ti yo 12,000. Dagba angbatunga Benyamina i anogodi he ti yo 12,000.

⁹Fuo agi apai re, oni ngére, mi ki bi bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko, i arundu barangba mbatabakindo, na barangba Wiri Kandoro, ni ukadiukadi yo ni pusi remu, akpe mbira ki du be yo.

¹⁰I ki poi ni bakere fugo, ki ya, “Gaani bata ye be gaani Mbori nasunga auru mbatabakindo, na be Wiri Kandoro a!”

¹¹Amaraika ki rundu dunduko pati mbatabakindo, na pati abaakumba na gu unga anya naadu biama, i ki tiwi ni kpakpuyo ku sande barangba mbatabakindo, niirisi Mbori,

¹²niya, “Amina! Maku du fu gaani Mbori, na taarimo, na tatamana, na tambuahe, na irisa, na ome, na tandu, nye anye kindi! Amina.”

¹³Gu ni sa dagba abaakumba ki karaga ha ki ya fere, “Ada nga agi yo re du ni ukadiukadi yo ni pusi remu, i naye wari?”

¹⁴Mi ki ya fu ko, “Gi gbia, mo ini he.” Ko ki ya fere, “Agi yo re nga agu yo naakuru rogo bakere gberãngbi, i azundu gayo aremu, ki vurusi he ni kure Wiri Kandoro.

¹⁵Si du i adu ti ni barangba gu mbatabakindo nga ga Mbori, i namanga pa ko uru na yuru rogo gako yekaru; gu ko nasunga auru mbatabakindo nikaraka kporo na yo.

¹⁶Gomoro amánga nga yo berewe te, na gomoro ime a te; faa uru amánga nga yo na faarago a te.

¹⁷Bambiko Wiri Kandoro, nga gu ko du auru mbatabakindo, ko adú ni babanda yo, ko angbé ku mbata yo fu yo koyo du agugaabi aime unga ni; Mbori awéga aume dunduko ti bangiriyo.”