Read zande Yugoti 9 Bible Online

Yugoti 9 - zande bible

Yugoti 9

¹Gu bisue maraika ki vu mbanya, mi ki bi kerekuru, u ki ti ngbangbaturũ yo ku auru kpotosende. I ki fu gu wiri rifungura nga ga gu due zanga mburuhe fu ru.

²Kerekuru ki za ngbadimo gu due zanga mburuhe, ngime ki kuru due yo wa gu ngime nidu vuru bakere gbigiwi yo; uru na rago ki biri mbiko gu ngime nakuru due yo.

³Ayere ki kuru ngime yo ku auru kpotosende, i ki fu ome fu ra wa ome agu angerembia du auru kpotosende.

⁴I ki ya fu ra, ka ami só nga gu nvuo du auru kpotosende ya, na iwo ahe na angua a ya, kina agu aboro adu nga na gu nogodinogodi he nga ga Mbori ngbanda kpakpuyo ya.

⁵I aasia pa ha fu ra ya ka ami imi nga yo ya, ono ami ka manga yo diwi ki du bisue. Gu pai ami ka manga yo na ni si ki du wa ka angerembia so boro.

⁶Ni gu rago re aboro agbata kpio, ono i abi nga ha wa sa te; i akpi nyemu ka kpi, ono kpio aora be yo.

⁷Kpia agu ayere re adu wa agu afarasi i nambakada ra tipa vura; akpakpari adu rira wa dahabu, kpakpura ki du wa kpakpu aboro.

⁸Mangera adu wa mangeri ade, rindira ki du wa rindi abahu.

⁹Ngbadura ki du ni ukadiukadi he wa ka si du wa marã ngbaduse, woro pupora ki du wa woro angbagida, na wa woro dungu afarasi, ami nioro sa vura.

¹⁰Sara ki du wa kina sa angerembia, na egeterara a; omera ki du rogo sara ka so aboro diwi ki du bisue.

¹¹Gaami bakindo ki zogo ra, nga gu maraika nga ga gu due zanga mburuhe; i niya ti ko rogo pa Ebere yo, Abadona, na rogo pa aGiriki yo rimoko nangia Aporiona, si wa ka i ya, Bagbarasi he.

¹²Bambata rungo susi: oni ngére, kura arungo ue nikaye kusa.

¹³Gu sita maraika ki vu mbanya, mi ki gi fugo dagba angbahõ bamotumo dahabu, nga gu du barangba Mbori,

¹⁴si niya fu gu sita maraika du na mbanya, “Mo záki agu amaraika biama du ni vodivodi yo pati gu bakere di nga Ferata.”

¹⁵I ki zaki agu amaraika biama, nga agu yo i aima mbakada yo tipa gi rago re na gi uru re na gi diwi re na gi garã re, ya i imi gu biata papara aboro.

¹⁶Arikavura nga agu yo nandu ri afarasi, i ange wa aboro mirioni 200, mi agi pa bange yo.

¹⁷Were mi ki bi afarasi rogo yuguyugupai yo, na agu yo nasungu auru ra, i aukadi tiyo na marã ngbaduse wa we na yakino na baruti. Ri afarasi ki du wa ri abahu. We na ngime na baruti ki nikuru ngbara yo.

¹⁸I ki imi gu biata papara aboro ni agi agberãngbi biata re, nga we na ngime na baruti, nga gu naakura ngbara yo.

¹⁹Ome afarasi nidu ngbara yo na rogo sara a; bambiko sara adu wa kina awo, ki du na ri awo ti ni a. Ami nadewa aboro na ni.

²⁰Gu yangara aboro zegino, nga agu yo i ata imo nga yo ni agi agberãngbi re ya, i asa nga gayo berã ti gu mangimangi pai nga ga beyo te. I ambu nga irisa adaimona, na gu kpiaahe nga dahabu, na feda, na sirigi, na ambia, na angua a te, nga agu ahe arengba nga ka bi pai, na gia pai na ta a ya.

²¹I asa nga gayo aberã ti gayo imo aboro, na gavo asoroka, na gayo pa bari na gayo adĩ a te.