Read zande Ruta 2 Bible Online

Ruta 2 - zande bible

Ruta 2

¹Were gume kumba ku Naomi adu yo, nyanyaki boro kumuko nangia ko, ni ndikidi gume Erimereke, rimoko angia Boaza.

²Ruta nangia boro Moaba ki ya fu Naomi, “Mo ídi he fere mi ndú awere ku ati yo, ka ta tipa futuhe dagba gu zende ahe, fuo gu ni mi ka ngba bangirini.” Ri ki ya fu ri, “Mo ndú wire.”

³Si du ri ki ndu, ki da, ki nidungura futuhe ati yo ti fuo abake ahe. Mamuhe ki mangi ri ri ake he kina rogo ga Boaza ati, nangia ndikidi gume Erimereke.

⁴Were, oni ngére, Boaza ki ye Betereme yo; ko ki ya fu abake ahe, “Yekova dú na oni!” I ki karaga ha fu ko, ki ya, “Yekova fú maku foro.”

⁵Boaza ki ya fu gu gako moyambu naadu ku ri abake ahe, “Ga da paranga de nga gi ri re?”

⁶Gu moyambu naadu ku ri abake ahe ki karaga ha ki ya, “Gi paranga de re nga gu boro Moaba nayega na Naomi ringara Moaba yo.

⁷Ri niya, ‘Mi nakpara foro, mo mbú re mi nidungura futuhe, ki rogodi he ti fuo abake ahe dagba vodivodi keke ahe.’ Si du ri niye ti ni kono wiso, ki nye daku awere, ono ri niongodi dimo yo toni gbua.”

⁸Boaza ki ya fu Ruta, “Mo gí he te, wire? Ka mo ndú nga ka ta tipa futuhe rogo kura ati ya, ka mo gúari nga erẽ a ya, ono mo nyé kina erẽ na gimi amoyambu nga ade.

⁹Bangiro dú ti kina gu ati i ake he rogo, mo nipe fuo yo. Ati mi nirugu aparanga ka i fúdi nga ro ya? Ho gomoro ime ka manga ro ni, mo ndú ku pati arunge ki mbiri gu ime aparanga natuda.”

¹⁰Ri ki vagadi ni kpakpuri, ki tumusa ku sende, ki ya fu ko, “Tipagine ngba mi ti ni bangiro, wa mo narugu tiro na pa re, wa du mi ni kungba boro?”

¹¹Ono Boaza ki karaga pai ki ya fu ri, “I ayugu agu apai fere gbayaga, nga gu mo anamanga dunduko fu na kumbamo tona ti kina gu rago kumbamo akpi, na wa mo ambu bamo na namo, na gu ringara i abatika ro rogo, ka ye ku dagba agu aboro mo ata ina nga yo mbata ya.

¹²Yekova túmo pa gu sunge mangi mo, Yekova nga ga aYisaraere Mbori fú mosoro foro rengbe arengba, nga gu ko mo aye ka oka tiro ku tii pupoko yo!”

¹³Ri ki ya, “Bairare, mo idi he fere mi ngba bangiro, bambiko mo ngarãsi re, wa gumba mo pai zezeredi fu ga moyambu, wa adu nga mi wa gu ni dagba gamo amoyambu nga ade ya.”

¹⁴Ti rago ri riahe, Boaza ki ya fu ri, “Mo yé kono, ka ri kpokuta, ki mogo ho ku rogo kakaĩ imekakue.” Ri ki sungu pati abake ahe, ko ki taĩ beko ki rogo awuawu zende ahe ki fu he fu ri; ri ki ri he ki mbi, ki mbu yangara ha.

¹⁵Ho ri aguari ni ka ta tipa futuhe, Boaza ki rugu gako aparanga, niya, “Oni mbú ri, ri ta tipa futuhe dagba vodivodi keke ahe, ka oni zá nga ri ya.

¹⁶Oni ki nirorogo bete he tipa ri dagba gu vodi oni he a, ki mbu he. Oni mbú ri ri ta tipa futuhe ati yo ki da ku nyemu, ka oni zá nga ri ya.”

¹⁷Ri ki ta tipa futuhe ad yo ki da ku nyemu. Ri ki ta gu ri adungura ha, si ki du wa aritere 37 nga zende he wa ga mapunga.

¹⁸Ri ki ndukudi he, ki ga ku bakporo yo; ri ki yugu gu he ri adungura ha fu na kumbari, ki kusi gu yangara riahe ri ambi ki mbu he, ki fu he fu ri.

¹⁹Na kumbari ki ya fu ri, “Wari mo nita ni areme tipa futuhe? Wari mo nimángi sunge he ni? Maku dú fu gu ni nirugu tini ua pa ro.” Si du Ruta ki yugu gu ni fu na kumbari ri nimángi sunge fu ni, ki ya. “Rimo gu kumba mi nimángi sunge fu ko areme nga Boaza.”

²⁰Naomi ki ya fu dekurugbo wiriri, “Ga Yekova maku dú fu gu ko ahe nga manga weneringise fu agu yo du ni ungayo watadu kangbayo a ya!” Naomi ki ya fu ri a, “Gi kumba re nga kina ngbatungarani, ni mbembedi gumerani.”

²¹Ruta nga boro Moaba ki ya, “Ii, ko niya fere a, ‘Mo ká kuti peka fuo gimi aparanga, daho i ka nyasa ke gimi zende ahe ni dunduko.’”

²²Naomi ki ya fu Ruta nga dekurugbo wiriri, “Si ngba, wire, ya oni nimóngo nindú na gako amoyambu nga ade, ka i abí nga ro rogo kura ati kia ki fudi ro ya.”

²³Si du ri ki ka kuti peka fuo ga Boaza amoyambu nga ade ki nidungura zende ahe ki da ho regbo ke he du wa mapunga anyasi ni na nganu a. Ri ki niraki kina ku na kumbari yo.