Read zande Ruta 4 Bible Online

Ruta 4 - zande bible

Ruta 4

¹Were Boaza ki guari tie ka ndu ku bangbanga yo ngbadimo bakporo, ki sungu yo. Oni ngére, gu gume Boaza agumba pa ko re, ko ki niye ka susa. Boaza ki ya fu ko, “Ako nda! mo káraga nga tiro, ki sungu sande erẽ”; ko ki karaga tiko, ki sungu sande.

²Boaza ki rogo akumba bawe dagba abaakumba bakporo, ki ya, “Oni súngu sande erẽ”; si du i ki sungu sande.

³Ko ki ya fu gu mbembedi gume re, “Naomi, nga gu ri nayega ringara Moaba yo, nabaga gu ati nangia ga Erimereke nangia wirinarani.

⁴Mi niberẽ pa kusa pa ha foro, ki ya, Mo ngbé he ku bara bangiri agi aboro re sungu erẽ re, na abaakumba gimi aboro. Ka mo kpi nyemu ka tumo ho, mo túmo ho; ono ka mo akpi nga nyemu ka tumo ho ya, mo gúmba ha fere tie, mi íni he, bambiko kura boro no berewe ka tumo ho mbata foro te, kina re du fuo ro.” Ko ki ya, “Mi atúmo ho.”

⁵Boaza ki ya, “Ni gu rago mo ka ngbe gu ati re be Naomi, mo angbé he be Ruta a nga boro Moaba; nga dekurugbo, ka zugasi pa rimo gu ko nakpi kuti gako ũkumbo.”

⁶Gu mbembedi gume re ki ya, “Ka mi túmo nga ha tipa re tigimi te, mi ka gbarasa pa gi ũkumbo. Mo dí gi pa motumo tipa ro, bambiko ka mi túmo nga ha te.”

⁷Were, gu sino nanidu mbata dagba aYisaraere tipa tumo he na pa mounda, ka nyakasa pa ahe dunduko, si nangia kumba aniuru gani katara sa, ki fu he fu gu kurani. Gere naningia dezirepai mbata dagba aYisaraere.

⁸Ho gu mbembedi gume re aya ni fu Boaza, “Mo ngbé he tipa ro tigamo”, ko ki uru gako katara.

⁹Boaza ki ya fu abaakumba, na aboro dunduko, “Oni nga adezirehe ni gi uru re, ya mi ngbe agu ahe dunduko nangia ga Erimereke, na agu ahe dunduko nangia ga aKiriyona na ga Marona be Naomi.

¹⁰Kura pai nga gere, nga, mi ngbe Ruta a nga boro Moaba, dekurugbo Marona, ri dú ni diare, ka zugasi pa rimo gu ko nakpi kuti gako ũkumbo, ka rimo gu ko nakpi dígi nga dagba awirinako ya, ti ngbadimo gako bakporo a ya. Oni nga adezirehe ni gi uru du re.”

¹¹Agu aboro dunduko naadu bangbanga yo ngbadimo bakporo, na abaakumba, i ki ya, “Ani nga adezirehe. Yekova ídi he fu gu de naye ku rogo ga kporo ri dú wa Raere, na wa Rea, nangia agu yo ue nangeesi ngbatunga aYisaraere. Mo ki u au Efurata no, ki du ni baworimo Betereme no a.

¹²Ngbatungaro nga agu yo Yekova nikafu yo foro rogo gi paranga de re, i ki du wa ngbatunga Perese, nga gu ko Tamara abatika ko fu Yuda.”

¹³Si du Boaza ki di Ruta, ri ki du ni diako; ko ki ndu fuo ri, Yekova ki fu vungu fu ri, ri ki vungu kumbagude.

¹⁴Si du ade ki ya fu Naomi, “Tambuahe dú fu Yekova, nga gu ko nambu nga ro ni gi uru re mo zanga mbembedi gumero ya. Rimoko wó awo dagba aYisaraere!

¹⁵Ko adú foro ni bangarãsi ungaro, ni bambuti gbinzaro a; bambiko dekurugbo wiro navungu ko, ri nakpi nyemu ro, ri nidu ni wene ri foro ki susi akumbagude saba.”

¹⁶Naomi ki di gu gude re, ki aka ko ti ngbaduri, ki du ni nambuti ko.

¹⁷Agu ade nangia akurari ki yambu rimoko, niya, “I vungu kumbagude fu Naomi.” I ki yambu rimoko nga Obede; ko nangia ba Yisai, Yisai ki ngia ba Dawidi.

¹⁸Were angbatunga Perese nangia agi yo re; Perese abatika Eserone,

¹⁹Eserone ki batika Rama, Rama ki batika Aminadaba,

²⁰Aminadaba ki batika Nasona, Nasona ki batika Saramona,

²¹Saramona ki batika Boaza, Boaza ki batika Obede,

²²Obede ki batika Yisai, Yisai ki batika Dawidi.