Read zande 1 SAMUERE 1 Bible Online

1 SAMUERE 1 - zande bible

1 SAMUERE 1

¹Kumba adu Ramataima-sofima yo rogo gu ringara abaagangara nga Efuraima, rimoko angia Erikana, nangia wiri Yeroama, Yeroama ki ngia wiri Eriu, Eriu ki ngia wiri Tou, Tou ki ngia wiri Zufa, nangia boro Efuraima.

²Adiako adu ue; rimo gu ri nangia Ana, rimo gu kura ri ki ngia Penina. Penina nadu na agude be ri, ono agude adu nga be Ana te.

³Gi kumba re anaguari rogo gako bakporo na garã na agarã ka andu ka irisa Mbori na ka fu motumo fu Yekova nga ga arimbasa ko Siro yo. Awiri Eri ue adu yo nangia Ofeni na Finasa ni ga Yekova aboromotumo.

⁴Ho rago anida ni Erikana fu motumo, ko anifu bete ahe fu Penina nangia diako, na fu awiri ri dunduko nga akumba na ade;

⁵ono ko anifu bete ahe fu Ana si ki kii wa bara ue, bambiko ko anakpi nyemu Ana ki susi, ono Yekova akisi rukumburi.

⁶Ono gu kura ri akpi ri ki nifudi ri gbe, ri ki nirungo gbe, bambiko Yekova akisi rukumburi.

⁷Wo si adu na garã na agarã; ho ri arimi ni ku tii ga Yekova bambu yo, Penina ki nifudi ri. Si du Ana akpara ti ni, ka ri ari nga he ya.

⁸Erikana nga kumbari ki ya fu ri, “Ana, tipagine mo akpara ti ni? Na gini pai mo ari nga riahe ti ni ya? Tipagine ngbaduro aima ti ni? Ngba nga mi ti ro ki susi akumbagude bawe te?”

⁹Fuo ri yo riahe ki mbiri he Siro yo, Ana ki guari ku ari. Ono Eri boromotumo asungu ri gako basunga pati dangba pangbadimo ga Yekova yekaru.

¹⁰Imisiri ngbaduse ki nimángi ri amanga, ri ki nikpari fu Yekova, ki nikpari ni aume gbe.

¹¹Ri ki kido he, ki ya, “Ako Yekova nga ga arimbasa ko, ka mo ngére kono du ga kanga ni na gu bakere rungo namanga ri, ki tingidi pa re, ka bangiro agó nga ti ga kanga ya, mo ki fu gude fu ga kanga ni kumbagude, mi afú ko fu Yekova ti arago ungako dunduko, i akpé nga mangeriko ni kperi a te.”

¹²Si ki du wa gere, wa ri akpara kindi bara bangiri Yekova, Eri ki nimakia ngbari.

¹³Ono Ana tigari afura kina ku kpotori yo; kina kpotongban ki niwo, ono ka i agia nga fugori ya; si du Eri aberẽ he ti ni ya ri kpi imekakue.

¹⁴Eri ki ya fu ri, “Rame adú waĩ mo nikpi imekakue? Mo bá ga imekakue ti ro ku sa yo”.

¹⁵Ana ki karaga ha ki ya, “Oó, gi gbia, mi nga gu de du na rungorungo torore; mi ambira nga imekakue na baripiro a te, ono mi uka mbisimore ku bara bangiri Yekova.

¹⁶Ka mo gédi nga ga kanga ku dagba gbegberẽ sino aboro ya, bambiko kina sangba gu dungu kparakpe nga gimi na rungo si mi agumba pa ha.”

¹⁷Eri ki karaga ha ki ya, “Mo ndú zezeredi, Mbori nga ga aYisaraere ko, ko idi pa ga kpe nga gu sana mo ko ti ni.”

¹⁸Ri ki ya, “Mo ídi he ga moyambu ngba bangiro.” Were gi de re ki ga, ki ri riahe, ka kpakpuri adu nga na rungo berewe ya.

¹⁹I ki guari ngbatutu wiso, ki fu irisa ku bara bangiri Yekova; ki karaga tiyo, ki da ku kpuyo yo Rama yo. Erikana ki ini Ana nga diako, Yekova ki tingidi pa ri a.

²⁰Ho rago arengbe ni, Ana ki du na gude ki batika kumbagude, ri ki yambu rimoko nga Samuere, bambiko ri aya, “Mi asana Yekova tipa ko.”

²¹Gu kumba re nga Erikana ki nindu ka fu motumo na gako aborokporo dũ, nga ga garã na agarã fu Yekova, na gu gako kidoahe ko akido.

²²Ono Ana andu nga koyo te, bambiko ri aya fu kumbari wẽ, “Mi andú nga koyo te daho gude ka mbu ha mai ni, fuo gure mi ki ye na ko, ko kuru ku bangiri Yekova, ki nye anye yo kindi.”

²³Erikana nga kumbari ki ya fu ri, “Mo mángi gu pai rengbe bangiro, mo nyé kporo no daho ko ka mbu ha mai ni; kina Yekova nikanyakasa gako pai.” Si du ri anye ti ni kporo yo ka haga wiriri, daho ko ambu ha mai ni.

²⁴Ho ri ambu haga ko ni, ri ki ndu na ko, na bagara ni bara du garãru biata, na ringbisiringbisi ngungo wa aritere 37, na imekakue na kambu sa; ri ki ye na ko ku rogo ga Yekova bambu Siro yo; gude adu ni kina toni ko.

²⁵I ki imi bagara, ki ye na gude koyo du Eri ni.

²⁶Ri ki ya, “Ako, gi gbia! Wa du mo ni ungaro, gi gbia, mi nga gu de naaru pati ro erẽ, nikpari fu Yekova.

²⁷Bambiko mi akpari tipa gi gude re; Yekova ki fu gu he fere mi asana ko tipa ha.

²⁸Si du mi akpara ko ti ni fu Yekova; wa du ko ni ungako kindi wo ko tigako ka du ni kparakpara ko fu Yekova.” I ki irisi Yekova yo.