Read zande 1 SAMUERE 11 Bible Online

1 SAMUERE 11 - zande bible

1 SAMUERE 11

¹Nasa nangia ngbatunga Amona ki ye ki zi bataya kuti Yabese-girada; aboro Yabese dunduko ki ya fu Nasa, “Mo mángi mokido na ani, ani ará foro.”

²Ono Nasa nangia ngbatunga Amona ki ya fu yo, “Mi amánga mokido na oni mbiko gi pai sa re, nga mi imi kumbabangironi dunduko, mi amáa ha ni soapai kuti aYisaraere dũ.”

³Agu abaakumba du Yabese yo ki ya fu ko. “Mo fu rame saba fu rani mbata, ya ani kedi abandusunge ku rogo bangbandarago dunduko nga ga aYisaraere. Fuo gure, ka boro adu nga yo ka manga pa rani ya, ani ayé koyo du mo ni.”

⁴Abandusunge ki ye ku Giba yo nga ga Saura rago, ki gumba agi apai re fu aboro; aboro dunduko ki poi ku ari ni bakere fugo ki nikpari.

⁵Si du Saura aye wa ko ape fuo abaabagara ati yo; Saura ki ya, “Gini he namanga aboro i akpara ti ni?” I ki gumba agu pai fu ko nga ga aboro Yabese.

⁶Ga Mbori toro ki ye na bakere ome ku ri Saura ho ko agi agu apai ni re, gako zinga ki rungudi ni bakere he.

⁷Ko ki di abaabagara nadu ti gonga, ki dewe ra rukutu, ki kedi pasiora be abandusunge rogo ga aYisaraere bangbandarago dunduko, ki ya, “Gu boro nikaye nga fuo Saura na Samuere ya, wo i ka manga gani abaabagara!” Iriwo Yekova ki ti ti aboro, i ki kuru wa boro sa.

⁸Ko ki gedi yo Bezeke yo, awiri aYisaraere adu wa aboro 300,000 na aboro aYudo wa 30,000.

⁹I ki ya fu agu abandusunge naaye, “Were oni ka ya fu aboro Yabese-girada: ‘Gba, ho uru ka faa ni, gaoni bata ki da.’” Ho abandusunge aye ni ki gumba ha fu aboro Yabese, i ki du na ngbarago.

¹⁰Si du aboro Yabese ki ya, “Gba ani ka kura fuo roni, oni ki mangi gu pai ti rani ngba ti roni.”

¹¹Ono si adu wo fuo girarago, Saura amoi aboro wa rikayo biata; i aye ku dagba bataya yo ti saa pidarago wiso, ki mangi aAmono ki da ti kina faa uru; agu yo nabati i agbandaka yasika, si du ka agu yo anye nga ni ba ue wa sa ya.

¹²Aboro ki ya fu Samuere, “Da nga gu ni naya, ‘Saura azóga rani?’ I yé na agu aboro re, ani imi yo.”

¹³Ono Saura ki ya, “I aímo nga boro areme te, bambiko gi uru re mangi Yekova pa bata dagba aYisaraere.”

¹⁴Samuere ki ya fu aboro, “Oni yé, ani ndú ku Girigara yo ka mbakaaa pa zogarago yo berewe.”

¹⁵Aboro dunduko ki ndu ku Girigara yo, i ki moi Saura ni bakindo ku bangiri Yekova Girigara yo. I ki tumo ni amotumo zereda yo ku bara bangiri Yekova, Saura na aboro aYisaraere dunduko angi yo bakere gbe.