Read zande 1 SAMUERE 12 Bible Online

1 SAMUERE 12 - zande bible

1 SAMUERE 12

¹Samuere ki ya fu aYisaraere du nduko, “Oni ngére, mi gi agu afugoroni dũ nga gu oni agumba ha fere, ki moi bakindo ku ri roni fu roni.

²Ono awere, oni ngére, bakindo nata bara bangironi; mi tigimi du ni gbinza re na nvue rire yo, oni ngére, awire du na oni; mi ata ku bangironi tona ti parangare ki da ku areme.

³Mi du re; oni dú ni dezire kuti re ku bangiri Yekova na ku bangiri gako mbedimbedi boro. Ga da babagara mi adi ru? Watadu ga da dongi mi adi ru? Watadu da mi abiriki ni? Da mi arungosi ni? Watadu da mi adi marã mobirimo be ni si dadi bangire? Oni yúgu he kuti re, mi agása ha fu roni.”

⁴I ki ya, “Mo abirika nga rani te, mo arungosi nga rani a te, mo adia nga he be boro a te.”

⁵Ko ki ya fu yo, “Yekova nga dezire kuti roni, na gako mbedimbedi boro nga dezire areme a, ya oni abi nga he be re te.” I ki ya, “Ko nga dezire.”

⁶Samuere ki ya fu aboro wẽ, “Yekova naringbisi aMose na Arona nga agu yo nakusi abaroni ringara Ezipeta yo.

⁷Si du ka oni ru ti ni awere zaa, mi azúngadi roni ku bara bangiri Yekova tipa gu ruru mangaapai dunduko nga ga Yekova, nga gu ko amangi fu roni na fu abaroni a.

⁸Ho Yakoba ada ni ku Ezipeta yo, abaroni akpari fu Yekova, Yekova ki kedi aMose na Arona, nga agu yo nakusi abaroni Ezipeta yo, ki moi yo i niraki rogo gi rago re.

⁹Ono bangiriyo ago ti Yekova gayo Mbori; ko ki fu yo ku be Sisera, barutiri rimbasa aborosovura nga ga Yabina bakindo Azora, na ku be aFereseto, na ku be bakindo aMoabo a, i ki so vura kuti yo.

¹⁰I ki kpari fu Yekova ki ya, ‘Ani ingi pai, bambiko ani mbu Yekova, ki nimángi pa aBara na Asetorete; ono awere mo bátasi rani be avurarani, ani amánga pa ro.’

¹¹Yekova ki kedi Yerubara, na Baraka, na Yepeta, na Samuere a, ki batasi roni be avuraroni rogo arago dũ; oni ki niraki rogo zereda.

¹²Ho oni abi Nasa bakindo awiri aAmono ni ko niye sa roni, oni aya fere, ‘Ai, ono kina bakindo zogo rani,’ ho kina Yekova gaoni Mbori adu ni ni gaoni bakindo.

¹³Awere si du oni ngére gu bakindo oni asia ko, nga gu ko oni asana he tipa ko; oni ngére, Yekova moi bakindo ku ri roni.

¹⁴Ka oni agunde ti Yekova, ki nimangi pa ko, ki nigi sangbako, ka oni asá nga mungu kuti ga Yekova rugute ya, oni a tigaoni na gu bakindo nazoga roni adú ni apeke Yekova gaoni Mbori, si angbá angba;

¹⁵ono ka oni adéga nga turoni sa fugo Yekova ya, oni ki sa mungu kuti ga Yekova rugute, be Yekova adú kuti roni tie, wa si adu kuti abaroni.

¹⁶Si du oni rú zaa awere ka bi gi bakere pai re, nga gu Yekova ka amanga ku bangironi.

¹⁷A nga regbo ke nganu du areme te? Mi ayámba he koyo du Yekova ni, ko kedi sumba gumba na mai; oni aína ha ki bi he ya gaoni gbegberẽpai ni bakere he, nga gu mangi oni ku bangiri Yekova, wa sana oni he tipa bakindo fu roni.”

¹⁸Si du Samuere ki yambu he koyo dú Yekova ni, Yekova ki kedi sumba gumba na mai ni gu uru re; aboro dunduko ki gunde ti Yekova bakere gbe na ti Samuere a.

¹⁹Aboro dunduko ki ya fu Samuere, “Mo kpári fu Yekova ga Mbori, tipa gamo amoyambu, ya ka ani kpiki nga ya; bambiko ani gbia gaani ingaapai dunduko kuti gi ingapai re, wa sana ani he tipa bakindo fu rani.”

²⁰Samuere ki ya fu aboro wẽ, “Ka oni gúnde nga ya; oni tigaoni mangi gi gbegberẽapai dunduko re ni rengo, ono ka oni sá nga tironi ti peka fuo Yekova ya, ono oni mángi pa Yekova na kpotoroni yo dũ;

²¹ka oni sá nga tironi ku bani ya ka andu fuo kungba apai nga gu ka aúsa nga boro na batasa ni a ya, bambiko kungba pai dũ gbua.

²²Bambiko Yekova ambú nga gako aboro te, mbiko rimoko du ni bakere he, bambiko si angba ti Yekova ka sa roni ni aboro fu ko.

²³Ono tipa re a, Mbori aza re ka mi amanga nga ingapai kuti Yekova ka mbu kpara kpe tipa roni ya; ono mi arúga roni rogo wenepai na rurupai.

²⁴Ono oni gúnde ti kina Yekova, ka amánga pa ko rogo rengo yo na kpotoroni yo dunduko; oni bérẽ nga pa waĩ mangi ko bakere apai fu roni.

²⁵Ono ka oni amánga gbegberẽpai kindi, oni anyása anyasa, oni na gaoni bakindo a.”