Read zande 1 SAMUERE 14 Bible Online

1 SAMUERE 14 - zande bible

1 SAMUERE 14

¹Ni gu uru Yonatana nangia wiri Saura aya fu gu paranga naatindi gako uvura, “Mo yé, ani sí ku mbiti yo ku rogo gu gbata nga ga aFereseto, gu du ku mbiti yo.” Ono ko agumba nga ha fu bako te.

²Saura ki nye kina tuturũ rogo papara Giba yo ku bani, tii ngua du wa ndavu nga gu du Migerona yo. Agu aboro naadu na ko adu wa aboro 600,

³Aiya adu yo a, naaukadi tiko na efoda, ko nangia wiri Aituba, unvurua Ikabodo, nangia wiri Finasa, Finasa ki ngia wiri Eri, ga Yekova boromotumo Siro yo. Ono aboro aina nga ha ya Yonatana guari dagba yo te.

⁴Dagba gu basigo re nga gu Yonatana agbata ka si rogo sa ga aFereseto gbata, kina nzekenzeke ambia nadu rogo gu ba ku bani na ku bani a; rimo gu nangia Besese, rimo gu kura ha ki ngia Sene.

⁵Gu ri mbia sa akuru ku nodiyo barangba Mikemasa, na gu kura ha ku sudiyo barangba Geba.

⁶Yonatana ki ya fu gu paranga naatindi gako ũvura, “Mo yé, ani sí ku mbiti yo ku gbata agi azangayeratise yo re; si ngia Yekova amánga pai fu rani; bambiko a nga he ko ka dingisa Yekova ti batasa aboro na dungu aboro watadu na umba yo a te.”

⁷Gako batindi ũvura ki ya fu ko, “Mo mángi agu apai dũ du kpotoro yo; mo sá tiro, mo ngére, mi na mo wa kina gu berã du kpotoro yo a.”

⁸Yonatana ki ya, “Mo ngére, ani así sa agu akumba re, ani ki yugu tirani fu yo.

⁹Ka si ngia i ayá fu rani, ‘Oni súngu daho ani ka ye ni fuo roni,’ ani ki ru zaa kina rogo gu ba rani, ka ani andú nga koyo du yo ni ya.

¹⁰Ono ka i aya, ‘Oni yé kono du ani ni,’ ani ki ndu; bambiko Yekova fu yo ku be rani. Gere adú ni yuguyugupai fu rani.”

¹¹I ue ki yugu tiyo rogo ga aFereseto gbata; aFereseto ki ya, “Oni ngére, aEbere kuru rogo asii yo i naoka tiyo ku ho ni.”

¹²Aboro gbata ki karaga ha fu Yonatana na fu gako batindi ũvura, ki ya, “Oni yé kono du ani ni, ani ayúgo pai fu roni.” Yonatana ki ya fu gako batindi ũvura. “Mo yé fuo re; bambiko Yekova fu yo ku be aYisaraere.”

¹³Yonatana ki nigurumo ngba beko na ngba nduko, na gako batindi uvura fuo ko. I ki tiwi barangba Yonatana, gako batindi ũvura ki niimi yo fuo ko.

¹⁴Ti gu bambata imo aboro re, nga gu Yonatana amangi na gako batindi ũvura, akumba adu wa 20, rogo rago wa bebere bagbanga due ku sende yo rogo ringbisiringbisi bino.

¹⁵Kiki he ki ti ati rogo bataya, ati yo a, na dagba aboro dunduko; aboro gbata ki kigi, na abagbuaahe a; bazigizo ki wo ti sende; si du bakere kiga adu ti ni gbe.

¹⁶Gu ga Saura ababandarago naadu Giba yo rogo ga Benyamina rago, i ki ngere ki bi bakere rimbasa aboro naora ku bani na ku bani yasika.

¹⁷Saura ki ya fu agu aboro naadu na ko. “Oni gédi aboro awere, ka bi gu ni guari dagba rani.” Ho i agedi yo ni, oni ngére, Yonatana na gako batindi úvura adu nga ho te.

¹⁸Saura ki ya fu Aiya, “Oni yé na ga Mbori sanduki kono.” Bambiko awiri aYisaraere anandu na ga Mbori sanduki ti gu rago re.

¹⁹Ho Saura agumba pai ni fu boromotumo, gu gbarakagbaraka nadu rogo ga aFereseto bataya yo si andu kindi ki nikii akia; Saura ki ya fu boromotumo. “Mo di bero.”

²⁰ASaura ki dungura tiyo na agu aboro naadu na ko dunduko, ki ndu ka so vura; oni ngére, ga aboro abasape ni ba sa sa ki niyara ayara dagba yo, bakere vunduvundu pai ki du gbe.

²¹Agu aEbere nga agu yo naadu na aFereseto mbata, naandu na yo ku bataya yo rogo gu ringara nadu pati yo kirikiri, i ki sa tiyo a ka du na agu aYisaraere naadu na Saura na Yonatana.

²²Agu aboro aYisaraere dunduko naaoko tiyo rogo ringara abaagangara Efuraima, i ki mangi a wo ho i agi he ni ya aFereseto oro, i ki nido fuo yo a tigayo nyanyaki ni vura.

²³Si du Yekova ki batasi aYisaraere ni gu uru re; vura ki susi ku pati Bete-avena yo.

²⁴Aboro aYisaraere ki du ni fudifudi yo ni gu uru re; bambiko Saura ata ruga aboro nizunga he, niya, “Boro motiwa nga gu boro nikari riahe mbata uru nikati, mbata mi nikaira bape ti avurare.” Si du a nga boro sa nari riahe te.

²⁵Aboro dunduko ki ndu ku birengua yo; nzeme anyege adu yo sande.

²⁶Ho aboro aye ni ku birengua yo, oni ngére, nzeme anyege ki nitogo atoga, a nga boro sa namoi beni ku ngbani yo te; bambiko aboro agunde be zungahe.

²⁷Ono Yonatana agia nga ha ho bako arugu aboro ni na pa zungahe a te; si du ko ataĩ gu mburu ngbondo ti ni naadu beko, ki zogo ho ku rogo pepere anyege yo, ki moi beko ku ngbako yo; bangiriko ki ha.

²⁸Boro sa ki karaga ha dagba aboro yo, ki ya, “Bamo nirugu aboro nyanyaki ni zungahe, niya, ‘Boro motiwa nga gu boro nikari riahe areme.’ ” He ki nimaki aboro amaka.

²⁹Yonatana ki ya, “Buba narungosi ringara arungosi; oni bí nga wa siri mi agi anyege re toni, bangire ha.

³⁰Ka aboro niri gu gbugbu ahe bi yo areme nga ga avurayo ka pai ngba ki susi; ono awere bakere kpio adu nga dagba aFereseto gbe te.”

³¹I ki mangi aFereseto ni gu uru re tona Mikemasa yo ki da ku Ayarona yo. He ki nimaki aboro amaka gbe;

³²aboro ki gbadi sa gbugbu ahe, ki gbu akandoro, na abaabagara, na awira, ki niimi ra ku sande; aboro ki niri ra na kina kurera.

³³I ki gumba ha fu Saura, ki ya, “Mo ngére, aboro ingi pai kuti Yekova, wa i ari anya na kina kurera.” Ko ki ya, “Oni mangi pai ni biriki; ki wirigi bakere mbia kuti re areme.”

³⁴Saura ki ya, “Oni gbándaka dagba aboro, ki ya fu yo, ‘Oni yé dunduko gu ni na kina gani babagara ni ba sa sa kono du mi ni, aboro ni ba sa sa na kina gani kandoro, ka imo ra kina no, ka ri ra; ka oni ingi nga kuti Yekova niri ra na kina kurera ya.’ ” Aboro ki niye dunduko ni ba sa sa na gayo ababagara ni gu yuru re, ki iimi ra kina yo.

³⁵Saura ki dua bamotumo fu Yekova; si adu ni bambata bamotumo ko adua fu Yekova.

³⁶Saura ki ya, “Ani ndú fuo aFereseto yuru, ka gbarasa yo dati girarago; ka ani mbú nga kumba dagba yo wa sa ya.” I ki ya, “Mo mángi kina gu pai ngba bangiro.” Ono boromotumo ki ya, “Ani mbédi kono du Mbori ni.”

³⁷Saura ki sana Mbori ti ni, ki ya, “Mi ndú fuo aFereseto? Mo afú yo ku be aYisaraere?” Ono ko akaraga nga pai fu ko ni gu uru te re.

³⁸Saura ki ya, “Oni yé kono, oni dunduko nga ga aboro abaakumba; ka ina nga ha ki bi he si ngia waĩ tona gi ingapai re areme.

³⁹Bambiko wa du Yekova ni ungako nga gu ko ninabatasa aYisaraere, ka si vura du nga kina Yonatana nga wire, ko akpí akpi ni rengo.” Ono boro adu nga sa dagba aboro dunduko naakaraga pai fu ko wa sa te.

⁴⁰Ko ki ya fu aYisaraere dunduko, “Oni tigaoni rú ku bani sa, mi a tigimi na wire nga Yonatana ki ru ku bani.” Aboro ki ya fu Saura, “Mo mángi kina gu pai ngba bangiro.”

⁴¹Si du Saura aya ti ni fu Yekova, nga ga aYisaraere Mbori, “Mo yúgu rengo fu rani.” I ki sia aYonatana na Saura be ba ake; ono aboro ki bati.

⁴²Saura ki ya, “Oni bá ake dagba rani na wire nga Yonatana.” Si ki zi Yonatana.

⁴³Saura ki ya fu Yonatana, “Mo gúmba gu pai fere mangi mo.” Yonatana ki gumba ha fu ko, ki ya, “Mi nisiri wiri nzeme anyege ni rengo ti mburu ngbondo nidu be re; mi du re, si du mi akakpi ti ni.”

⁴⁴Saura ki ya, “Yonatana, Mbori mángi kina wo fere na kura ha ku ri he; mbiko mo akpí akpi ni rengo.”

⁴⁵Aboro ki ya fu Saura, “Yonatana nga gu ko namangi gi bakere bata re fu aYisaraere, ko akpi tipagine? Mbori aida nga ha wo te! Wa du Yekova ni ungako, ka mangeriko ti nga sa ku sande ya; bambiko ko mangi pai na Mbori ni gi uru re.” Si du aboro ki batasi Yonatana, ka ko kpi nga ya.

⁴⁶Saura ki guari ti do fuo aFereseto; aFereseto ki ga ku kpuyo yo.

⁴⁷Were ho Saura akindo ni ri gu ngbi nga ga aYisaraere, ko aso vura kuti avurako dunduko rogo arago ni ba sa sa, kuti aMoabo, na kuti awiri aAmono, na kuti aEdome a, na kuti abakindo ri ringara Soba na kuti aFereseto a; yo ko anisa tiko ku ho ni, ko ki nimangi yo amanga yo a.

⁴⁸Ko ki ngarã angarã gbe, ki mangi aAmareko, ki batasi aYisaraere be agu yo naagbarasa yo.

⁴⁹Awiri Saura angia Yonatana, na Yisewi, na Marekisua; rimo agu awiriko nangia ade angia gere: rimo unvuru angia Meraba, rimo tame ki ngia Mikara;

⁵⁰rimo dia Saura angia Ainoama nangia wiri Aimasa. Rimo gako barutiri rimbasa aborovura ki ngia Abinera wiri Nere nangia wiri unduruba Saura,

⁵¹Kisi nangia ba Saura, Nere ba Abinera ki ngia wiri Abiere.

⁵²Si du kina kere vura naadu na aFereseto ti gu rago dunduko nangia ga Saura; ho Saura anibi gu iraome ni, watadu gu eerẽ boro, ko ki nidi ni fuo ko.