Read zande 1 SAMUERE 17 Bible Online

1 SAMUERE 17 - zande bible

1 SAMUERE 17

¹Si du aFereseto ki dungura gayo arikavura dunduko ka so vura; i adungura tiyo ku Soko yo, nga ga aYudo bakporo, ki zi gayo bataya dagba Soko na Azeka, ku Efese-damima yo.

²Saura na aboro aYisaraere ki dungura tiyo, ki zi bataya rogo gu ngboongboorago du Era yo, ki tangara tiyo tipa vura sa aFereseto.

³AFereseto ki ru ri bagangara ku bani, aYisaraere ki ru ri bagangara a ku bani, ngboongboorago ki du dagba yo.

⁴Baworimo ki kuru bataya aFereseto yo, rimoko angia Goriata, nangia boro Gata, basonako adu wa bagiza mbiribe sita na dagba be sa.

⁵Kpakpari marã sirigi ki du riko yo, roko marã ki du ti ko, barõa gu roko marã nadu ti ko adu wa sekere 5,000 nga ga sirigi.

⁶Marã sirigi ki du ti merenduko na baso sirigi pagoko.

⁷Gako para baso ki du wa ga abaturoko ngbongbo, barõa gako baso ki du wa sekere 600 nga ga marã; gako bazadi bakikii vurakube ki ningbe fu ko ku mbata yo.

⁸Ko ki ru ki nipoi ku ari fu ga aYisaraere arikavura, ki niya fu yo. “Tipagine ye oni ti ni ka tangara tironi tipa vura? A nga Fereseto nga mi, te, oni ki du ni avuru Saura? Oni sía kumba tipa roni sa, ni yé kono du mi ni.

⁹Si ngia ni rengbe ka so vura na mi ki imi re, ani ki du tie ni avururoni; ono ka mi di be ni, ki imi ni, oni ki du tie ni avururani, ki ra fu rani.”

¹⁰Gu Fereseto re ki ya “Mi payasi pa ga aYisaraere arikavura areme; oni fú boro fere ke, ani só vura na ni.”

¹¹Ho Saura na aYisaraere dunduko agi agu apai ni nga ga gu Fereseto re, i ki yungura ayungura, ki du na bakere gunde gbe.

¹²Were Dawidi angia wiri gu boro Efurata nga boro Betereme du Yuda yo, rimoko angia Yisai, awiri Yisai adu muambi. Gu kumba re adu ni gbinza boio ti gu rago nangia ga Saura, ki du ni kuru boro ki niima tipa dungu agarã dagba aboro.

¹³Bambata awiri Yisai biata andu fuo Saura ku pati vura yo; rimo agi awiriko re biata nangia agu yo nandu sa vura angia Eriaba ni unvuru. Abinadaba ki du fuo ko. Sama ki ngia biata yo.

¹⁴Dawidi nangia kiaro; agu aunvuru biata re naape fuo Saura,

¹⁵ono Dawidi aniguari ku Saura yo ki nindu ka riga ga bako akandoro ku Betereme yo, ki niyega koyo du Saura ni.

¹⁶Gu Fereseto re ki nimbedi na wiso na nvemu a, ki niyugu tiko fu yo tipa rame 40.

¹⁷Yisai ki ya fu Dawidi nangia wiriko. “Mo di ugu zende ahe awere wa aritere 37, na gi udiudi kpokuta bawe re, ki tindi he ni ngarã ku bataya yo fu aunvuruamo;

¹⁸mo ki ndu na gi kputakputa ahe bawe re nga ga mamuanya fu gu barutirivura nidu ku ri gayo rikavura du wa aboro 1,000. Mo ki ini nga gu pai namanga aunvuruamo, ki yega na ngbaanga be yo.”

¹⁹Saura na agu yo, na aboro aYisaraere dunduko adu rogo ngboongboorago du Era yo, ki niso vura na aFereseto.

²⁰Dawidi ki guari kina boro ngbatutu wiso, ki mbu akandoro fu babandara, ki rogo ahe, ki ndu, a wa Yisai arugu ko na ni; ko ki ye ki da ti ba uvura, ni gu rago rimbasa aborosovura atata ngbayo nindu sa vura.

²¹AYisaraere na aFereseto ki tangara tiyo tipa vura, gu rikavura kuti gu rikavura.

²²Dawidi ki mbu gako atindiro ku be babanda atindiro, ki oro koyo du rikavura ni, ki ye ki sa be aunvuruako.

²³Wa ko afura na yo, oni ngére, gu baworimo ki ye re, nangia gu Fereseto nga boro Gata, rimoko angia Goriata, dagba agu arikavura nangia ga aFereseto, ki nigumba pai wa kina gu naadu mbata. Dawidi ki gi ne.

²⁴Aboro aYisaraere dũ, ho i abi gu kumba ni re, i ki oro be ko, ki nigunde agunde gbe.

²⁵Aboro aYisaraere ki ya, “Oni nibi gu kumba nga gu ko niye re? Ni rengo ko niye ka payasi pa aYisaraere; si adú wa gere, ya gu boro nikaimo ko, bakindo akúmokosi ni na bakere ũkumuko, ki fu wiriko nga de fu ni, ki sa ngbatunga bani i nira ni riyo dagba aYisaraere.”

²⁶Dawidi ki gumba pai fu agu akumba narundu pati ko, ki ya, “Gini pai ka i mangi fu gu boro ka imi gu Fereseto re, ka dia gbarasarimo ti aYisaraere ku sa yo? Bambiko da nga gi Fereseto re nga zangayeratise ka payasi pa agu arikavura nga ga unga Mbori?”

²⁷Aboro ki karaga ha fu ko wa kina gu nadu mbata, ki ya, “Wo si ka du fu gu boro nikaimo ko.”

²⁸Eriaba agi pa ko nangia unvuruako ho ko agumba pai ni fu akumba; ga Eriaba zinga ki rungudi kuti Dawidi, ko ki ya, “Tipagine ye mo ti ni kono? Mo nimbu gu umba akandoro ngbakungba yore fu da? Mi ini ga ruka, na gu gbigbitapai du kpotoro yo; mbiko mo niye kono ka bi vura.”

²⁹Dawidi ki ya, “Gini pai mangi mi awere? Ndue ti ni?”

³⁰Ko ki sa tiko ku bani fuo kura boro, ki nigumba kina gu pai nadu mbata; aboro ki karaga kina gu pai fu ko nadu mbata a.

³¹Ho i agi agu apai ni nga gu Dawidi agumba, i ki gumba ha fu Saura; ko ki kedi sunge fuo ko.

³²Dawidi ki ya fu Saura, “Ka kpoto aboro yo kígi nga be ko wa sa ya; ga moyambu nikandu ka so vura na gu Fereseto re.”

³³Saura ki ya fu Dawidi, “Mo arengba nga na ndu fuo gu Fereseto re ka so vura na ko te; bambiko mo nga kina paranga, ono ko nga basovura tona ti kina paranga ko.”

³⁴Ono Dawidi ki ya fu Saura, “Ga moyambu abanda ga bako akandoro; ho bahu aye ni, watadu gu nyarinde nga urisi, ki zi wiri kandoro dagba rimbasara yo,

³⁵mi ki pe fuo ru, ki nari ru, ki tuka ru ngbaru; ho u azingi ni kuti re, mi ki zi ru ti kina maingbaru, ki nari ru, ki imi ru.

³⁶Ga moyambu aimi abahu na agu anya nga aurisi a. Gu Fereseto re nga zangayeratise adú wa kina gu ru sa, bambiko wa ko apayasi pa agu arikavura nga ga unga Mbori.”

³⁷Dawidi ki ya, “Yekova nga gu ko naabatasi re vurube bahu, na vurube urisi a, ko nikabatasa re vurube gu Fereseto re a.” Saura ki ya fu Dawidi, “Mo ndú, Yekova adú na mo!”

³⁸Saura ki ukadi Dawidi na gako ũvura; ki dua kpakpari sirigi ku riko yo, ko ki ukadi ko ni roko marã.

³⁹Dawidi ki vo gako basape auru gako aũvura, ki asadi ka ndu, bambiko ko aasada nga pa ha mbata te. Dawidi ki ya fu Saura, “Mi arengba nga ka ndu na agi ahe te re; bambiko mi ata asada nga pa ha mbata te.” Dawidi ki uru he ti ko ku sa yo.

⁴⁰Si du ko ki di gako ngbondo ku beko, ki sia zezerenge mbia bisue wiridi yo, ki moi he ku rogo ga ababanda anya mangu nga gu nadu beko, kina ku rogo gako kpaka yo; gako barioko ki du beko a, ko ki mbedi koyo du gu Fereseto ni re.

⁴¹Gu Fereseto re ki niye ki nimbedi sa Dawidi, gu kumba natindi gako bakikii vurakube ki nindu mbata yo barangba ko.

⁴²Ho gu Fereseto re angereke ni kirikiri, ki bi Dawidi, ko ki nipayasi pa ko; bambiko wa ko adu ni kina paranga, kpotoko ki du irĩirĩ, tamako ki du ni wene he a.

⁴³Gu Fereseto re ki ya fu Dawidi, “Ango nga mi, ye mo na angbondo fuo re?” Gu Fereseto re ki nisenge Dawidi ti rimo gako ambori.

⁴⁴Gu Fereseto re ki ya fu Dawidi, “Mo yé kono du mi ni, mi afú pasioro fu azire ari, na fu anya du nvuo yo a.”

⁴⁵Si du Dawidi ki ya fu gu Fereseto re, “Mo naye sa re na basape na baso na bagbiagene; ono mi tigimi naye sa ro ni rimo Yekova nga ga arimbasa ko, gu Mbori nga ga agu arimbasa aborovura nga ga aYisaraere yo, nga gukomonapayasipako.

⁴⁶Areme Yekova afú ro ku bere, mi amánga ro, ki kati riro ti ro ku sa yo; mi afú rimbasa kangba aFereseto ni gi uru re fu azire ari, na fu agu anya rinde nga ga zegino ra a; aboro zegino ini he dunduko ya Mbori du ringara aYisaraere no,

⁴⁷gi gbuu re ki ini he dunduko ya Yekova abatasa nga he na basape na baso te; bambiko kina ga Yekova vura nga ha, ko nikafu roni ku be rani.”

⁴⁸Si ki ta du wa gere, ho gu Fereseto re aguari ni, ki ye ki mbedi ka ngbisa Dawidi, Dawidi ki ipisi tiko ki dusia rikavura ka gbia gu Fereseto re.

⁴⁹Dawidi ki zogo beko ku rogo gako mangu, ki di wirimbia yo, ki ba ha, ki nari gu Fereseto re na ni ti ngbandia kpakpuko; wirimbia ki rimi ku riko yo, ko ki ti ni kpakpuko ku sande.

⁵⁰Wo Dawidi adi be gu Fereseto re ni barioko na wirimbia, ki mangi gu Fereseto re, ki imi ko; ono basape adu nga be Dawidi te.

⁵¹Dawidi ki oro ki ru pati gu Fereseto re, ki mo kina gako basape fuka ha yo, ki imi ko na ni, ki kati riko. Ho aFereseto abi he ni ya gayo baworimo kpi, i ki oro.

⁵²Aboro aYisaraere na aboro aYudo ki guari ki tata ngbayo ni do fuo aFereseto, daho i ada ni ku Gata yo na ku ngbadimo gu bakporo yo nga Ekurone. Si du agu aFereseto i ahogi yo i ki nitiwi ngba gene Sarayima ki da kina ku Gata yo, na ku Ekurone yo a.

⁵³Awiri aYisaraere ki karaga tiyo ngba fuo do aFereseto yo, i ki gbarasi gayo bataya.

⁵⁴Dawidi ki di ri gu Fereseto re, ki ye na ni ku Yerusarema yo; ono ko aigi gako uvura rogo gako bamburoko.

⁵⁵Ho Saura abi Dawidi ni ko nindu sa gu Fereseto re, ko ki ya fu Abinera, barutiri arimbasa aborovura, “Abinera, wiri da nga gi paranga re?” Abinera ki ya, “Ako bakindo, wa du mo ni ungaro, mi arengba nga ka gumba pai tipa ko te.”

⁵⁶Bakindo ki ya, “Mo sásana he wiri da nga gi wiri paranga re.”

⁵⁷Ti gu rago Dawidi akaraga tiko gene imo gu Fereseto re yo, Abinera ki di ko, ki ye na ko ku bara bangiri Saura na ri gu Fereseto re be ko.

⁵⁸Saura ki ya fu ko, “Mo wiri paranga, wiri da nga mo?” Dawidi ki karaga ha, “Mi nga wiri vururo nga Yisai boro Betereme.”