Read zande 1 SAMUERE 19 Bible Online

1 SAMUERE 19 - zande bible

1 SAMUERE 19

¹Saura ki gumba pai fu wiriko nga Yonatana na fu gako amoyambu dunduko, ya i imi Dawidi. Ono Dawidi angba angba ti Yonatana wiri Saura ni rengo.

²Yonatana ki gumba ha fu Dawidi, ki ya, “Buba nga Saura nagbata ro ka imo ro; si du mi nazungadi ro awere mo bánda tiro wiso, ki nye kina bagbuko yo, ki oko tiro;

³mi nikandu ka ru pati buba ati yo kina bara ho mo ka du ni, ani afúra na buba tipa pa ro; ka mi gi pai, mi agúmba ha foro.”

⁴Yonatana ki nigumba wene apai tipa Dawidi fu bako nangia Saura, ki ya fu ko, “Ka bakindo íngi nga pai kuti vuruko nga Dawidi ya; bambiko ko ainga nga pai kuti ro te, bambiko gako mangaapai foro ni kina wene he gbe;

⁵bambiko ko aidi ka baga kpioko ki imi gu Fereseto re, Yekova fu bakere diabese fu aYisaraere dunduko. Mo abi he a, rago ki ngba angba ti ro; tipagine tie mo aye ka inga pai ti ni kuti kure ruru boro, ka imo Dawidi zanga ndupai?”

⁶Saura ki gi sangba Yonatana; Saura ki zunga he, ki ya, “Wa du Yekova ni ungako, i aimo nga Dawidi te.”

⁷Yonatana ki yambu Dawidi, Yonatana ki yugu agu apai re fu ko dunduko. Yonatana ki ye na Dawidi koyo du Saura ni, ko ki du ku bara bangiriko a wa ko adu mbata.

⁸Vura ki kuru berewe; Dawidi ki ndu ki so vura na aFereseto, ki imi yo ni dungu yo, i ki oro be ko.

⁹Gbigbita toro ki ye be Yekova ku ri Saura, wa ko asungu dimo kpuko yo na gako baso be ko; Dawidi ki nita kundi.

¹⁰Saura ki asadi ka so Dawidi ni baso kina kuti vuro bambu; ono ko ki birikpo bara bangiri Saura, ko ki so kina vuro bambu ni baso. Dawidi ki oro, ki merẽ ni gu yuru re.

¹¹Saura ki kedi asunge ku Dawidi yo, i pidi ko, Saura imi ko wiso. Mikara nangia dia Dawidi ki gumba ha fu ko, ki ya, “Ka mo abátasa nga ungaro areme yuru ya, i aímo ro gba.”

¹²Si du Mikara ki zogo Dawidi ti bangiri bambu; ko ki oro, ki merẽ.

¹³Mikara ki di kpiahe nga terafima, ki pigi he auru ba, ki moi mangu na mange ameme rogo ho ku ba ri he, ki dadi he na aroko.

¹⁴Ho Saura akedi asunge ni i zi Dawidi, ri ki ya, “Ko nawoka awoka.”

¹⁵Saura ki kedi asunge berewe i ndu ka bi Dawidi, niya, “Oni yé na ko na gako ba, mi imi ko.”

¹⁶Ho asunge ada ni ku dimo yo, oni ngére, kina kpiahe nga terafima ki du auru ba na mangu na mange ameme rogo ho ku ba ri he.

¹⁷Saura ki ya fu Mikara, “Tipagine nangi mo re ti ni were, ki mbu vurare ko merẽ, bati ko ti ni?” Mikara ki karaga ha fu Saura ki ya, “Ko aya fere, ‘Mo ídi he fere mi merẽ; tipagine ka mi imi ro ti ni?’ ”

¹⁸Si du Dawidi ki oro ki merẽ, ki ye koyo du Samuere ni Rama yo, ki gumba agu apai fu ko dunduko nga gu Saura amangi ko na ni. I ki ndu na Samuere ki raki Naiota yo.

¹⁹I ki gumba ha fu Saura, ki ya, “Mo ngére, Dawidi du Naiota yo du Rama yo.”

²⁰Saura ki kedi asunge i zi Dawidi; ho i abi gu rika anebi ni i nitungusi pai, Samuere ki ru ni bakumba ku ri yo, ga Mbori Toro ki ye ku ri ga Saura asunge, i ki tungusi pai a wo.

²¹Ho i agumba pa ha ni fu Saura, ko ki kedi kura asunge, i tigayo ki tungusi pai a wo. Saura ki kedi kura asunge berewe ni biata yo, i ki tungusi pai kina wo a.

²²Ko ki guari ni tiko ka ndu ku Rama yo, ki da pati gu bakere guga naadu Seku yo; ko ki sana he ki ya, “Wari du aSamuere ni na Dawidi?” Boro sa ki ya, “Mo ngére, i du Naiota yo du Rama yo,”

²³Ko ki guari yo ki ndu ku Naiota yo du Rama yo; ga Mbori Toro ki ye ku ri ko a, ko ki ta ndu mbata yo nitungusi pai wa nebi, daho ko ada ni Naiota yo du Rama yo.

²⁴Ko ki uru gako aroko, ko ki tungusi pai wa nebi barangba Samuere a, ki pi sande ni kundiri ko ni gu uru re na yuru a ki da ku wiso. Si du i aya ti ni, “Saura dagba anebi yo a?”