Read zande 1 SAMUERE 2 Bible Online

1 SAMUERE 2 - zande bible

1 SAMUERE 2

¹Si du Ana akpari ki ya, “Kpotore yo napanda rogo Yekova yo; gi ome nakiisa tihe rogo Yekova yo. Ngbare za ku ri avurare, bambiko mi nangi rogo ga bata.

²“A nga bofo ho sa du ziazia wa Yekova te, bambiko boro ho sa fuo ro te; a nga mbia ho du wa gaani Mbori a te.

³Ka mo fúra nga berewe ni kiisa pa tiro ya, ka pa abiatise kúru nga ngbaro yo a ya; bambiko Yekova nga Mbori nga ga inahe ko, ko nawisiga pa mangaapai.

⁴Ga airanyaka amboto kuadi, ono agu yo nakotoka i nyakasi tiyo na ngarã.

⁵Agu yo naambiki i bagi tiyo tipa riahe, agu yo naadu na gomoro si ki go ti yo. Irazangada batika saba, ono gu ri nadu na dungu agude runa.

⁶Yekova naimo he, ki sa ha ni unga ha berewe; ko naba he ku Baatoro kpikpi aboro yo, ki kusi he yo berewe.

⁷Yekova nasa he ni rungorungo ho, ki kumukosi he berewe; ko nazoga he, ko natumba ha berewe.

⁸Ko natumba rungorungo boro rogo nvutu yo; ko natumba irazingoahe guguda regbo anya yo, ka sa yo i sungu wa sa na abazogo, ki di mbatataarimo ni ũkumbo. Bambiko amburu kpotosende nga ga Yekova, ko moi zegino auru he.

⁹“Ko abánda ndu gako kparakpara ziazia aboro; ono ko aóngosa gbegberẽ aboro ku bitimo yo; bambiko a nga boro sa nikadia be pai mbiko tandu te.

¹⁰Agu yo naso vura na Yekova i akúadi rukutu; ko asú kuti yo ngbangbaturũ yo. Yekova asára ngbanga adigida kpotosende; ko afú ome fu gako bakindo, ki kiisi gu ome nga ga gako mbedimbedi boro.”

¹¹Erikana aga ku kpuko yo Rama yo. Gude ki nimangi sunge fu Yekova ku bara bangiri Eri nangia boromotumo.

¹²Ono awiri Eri adu wa awiri gbegberẽ sino aboro; i aberã nga pa Yekova te.

¹³Ono sino aboromotumo fu aboro adu wa gere, ho gu boro afu motumo ni, ho pasio afu ni, ga boromotumo moyambu ki ye, na ngorã pasio du rindihe biata be ni,

¹⁴ni ki zogo ho ku saani yo, watadu ku pere yo, watadu ku bunga yo, watadu ku akoro yo; agu ahe dunduko ngorã pasio akusa si boromotumo aroga ha ni gani. Wo i amanga Siro yo fu agu aYisaraere dunduko naaye koyo.

¹⁵Ku ri gure, mbata i nikazo nzeme, ga boromotumo moyambu ki ye, ki ya fu gu boro nafu motumo, “Mo fú pasio i zo ho tioa boromotumo; bambiko ko aida nga ga pasipasi pasio te, ono kina iwo ho.”

¹⁶Ka gu boro re ya fu ni, “I zó nzeme mbata, fuo gure mo ki rogo ho ni bakere he a wa mo akpi nyemu he,” moyambu ki ya fu ni, “Oó, ono mo fú he fere kina awere; ka si adu nga wo ya, mi aróga ha ngba kina vura.”

¹⁷Ono ga agu aparanga ingapai re adu ni bakere he bangiri Yekova; bambiko aboro apayasi pa gu motumo nga ga Yekova.

¹⁸Samuere amanga sunge bara bangiri Yekova, wa ko adu ni toni gude, nivodi tiko ni gu tutu roko du ni giri nzibi nga efoda.

¹⁹Nako anarunga toni gbanga roko fu ko, ki niye na ni fu ko na garã na agarã, ho ri aniye ni na kumbari ka tumo ni gu motumo nga ga agarã.

²⁰Eri ki nifu maku fu Erikana na diako, ki ya, “Yekova fú agude foro ku be gi de re bambiko gu gamunihe ri afu he fu Yekova”; fuo gure i ki niga ku kpuyo yo.

²¹Yekova ki nidu na Ana, ri ki batika akumbagude biata na adegude ue. Were, gu gude nangia Samuere ki nisono ku bara bangiri Yekova.

²²Were Eri agbinza gbe, ko agi pa agu apai dunduko awiriko amanga aYisaraere dunduko na ni, na wa i ara na agu ade nanamanga sunge ngbadimo bamburoko dungurati yo.

²³Ko ki ya fu yo, “Tipagine oni amanga ngbatunga agu apai ti ni re? Bambiko mi tigimi gi pa gaoni gbegberẽ mangaapai ngba agu aboro dunduko re.

²⁴Oó, awire, mbiko a nga wenepai nga gu gi mi pa ha te re, oni namanga ga Yekova aboro i ti ndika.

²⁵Ka boro sa mangi ingapai kuti kurani, Mbori nikasara ngbanga ni; ono ka boro ingi pai kuti Yekova, da ka zungadi he tipa ni?” Ono i adega nga tuyo sa fugo bayo te; bambiko Yekova akpi nyemu ka imo yo.

²⁶Si du gu gude nga Samuere ki nisono kindi, ringiko ki ningba ku bangiri Yekova na ku bangiri aboro a.

²⁷Ga Mbori kumba ki ye koyo du Eri ni, ki ya fu ko, “Ya Yekova wẽ, ‘Mi ayugo nga tire fu ngbatunga bamo, ho i adu ni Ezipeta yo ni akanga fu Faro, te?

²⁸Mi asia ko dagba angbatunga aYisaraere yo ko du ni gi boromotumo, ka andu ku pati gi bamotumo yo, ka azo fuõngua, ka avoda tiko na efoda ku bara bangire; mi afu amotumo dunduko fu ngbatunga bamo nga ga awiri aYisaraere i amanga ha ni we.

²⁹Tipagine oni asimba gi motumo na gi gamahe ti ni, nga gu mi arugu pa ha, ki niirisi awiro ki susi re, ki nikumukosi tironi na gu bakumba amotumo nga ga aYisaraere nga gimi aboro?’

³⁰Si du ya Yekova nga ga aYisaraere Mbori wẽ: ‘Mi akido he ni rengo ya ngbatungaro na ngbatunga bamo atá ku bara bangire nye anye kindi’; ono awere Yekova naya: ‘Si arengba nga te; bambiko agu yo nairisa re mi aírisa yo a, na agu yo napayasi re, i abérã payo tataa.

³¹Mo ngére, ragoho da, mi akáta omero ku sa yo, na ome ngbatunga bamo, si du gbinza boro ka adú nga ti ni dagba ngbatungaro wa sa ya.

³²Mo abi pai ni rungosiro ki kpi pa gu ũkumuko i ka fu fu aYisaraere; ka gbinza boro adú nga dagba ngbatungaro nye anye kindi ya.

³³Gu boro nga gamo ni, nga gu ni mi ka kpara nga ni ku sa yo pati gi bamotumo ya, ni adú tipa nyasa gamo apai, na ka rungosi kpotoro yo. Agu angbatungaro dunduko nikazuga i akpíka ngba basape.

³⁴Gere nikangia yuguyugupai foro, nga gu nikaye ku ri awiro ue, ku ri Ofeni na Finasa; i ue akpika rogo kina uru sa.

³⁵Mi ki kusi irarengo boromotumo fere, nga gu ni nikamanga pai kuti sangba gu pai dũ kpotore yo na rogo gi nerã a; mi afú ndikidi ngbatunga fu ni, ni atá ku bara bangiri gi mbedimbeai boro nye anye kinui.

³⁶Agu aboro dunduko nye ni ngbatungaro, i ayé dunduko ka nugadi fu ni tipa wiri feda watadu meme kpokuta sa, ki niya. “Mi nakpara foro, mo mói re ku rogo ga boromotumo basunge, ya mi niri nga kina bete kpokuta.” ’ ”