Read zande 1 SAMUERE 22 Bible Online

1 SAMUERE 22 - zande bible

1 SAMUERE 22

¹Dawidi ki guari yo tie, ki merẽ ku rogo gu simbia nga Adurama; ho aunvuruako agi he ni na ga bako aborokporo dunduko, i ki ndu koyo du ko ni.

²Agu aboro dunduko nadu ngba pai, na agu yo nadu na bape, na agu yo nadu na imisiri ngbaduse, i ki dungura tiyo koyo du ko ni dunduko; ko ki du ni gayo barumba tayo. Aboro ki du na ko wa 400.

³Dawidi ki guari yo ki ndu ku Misipa yo du Moaba yo; ko ki ya fu bakindo aMoabo wẽ, “Mi nakpara foro, mo ídi fu abuba na nina, i ye kono ki sungu na mo daho mi ka ina gu pai ni Mbori ka mangá ha fere.”

⁴Ko ki ye na yo ku bangiri bakindo aMoabo, i ki nisungu na ko ku kpuko yo ho Dawidi adu ni rogo nyanyaki ba yo.

⁵Nebi nangia Gada ki ya fu Dawidi, “Ka mo nyé nga nyanyaki ba yo ya; mo gúari, ki ndu ku ringara Yuda yo.” Si du Dawidi ki guari, ki da ku rogo gu birengua nangia Erete.

⁶Saura ki gi he ya i bi Dawidi, na agu aboro naadu na ko. Saura asungu Giba yo tii gu angua nga abanza naadu Rama yo, na gako baso be ko, gako amoyambu du ki rundu arunda pati ko kirikiri.

⁷Saura ki ya fu gu gako amoyambu narundu kirikiri pati ko, “Oni gí he awere, oni nga ngbatunga Benyamina; wiri Yisai afú aati bino na aati bakakue fu roni ni ba sa sa? ko amáa roni dunduko ni abarutirivura nga ga akutu yo na ga akama yo?

⁸oni dunduko ata bura re ti ni? A nga boro sa nakusi pa gu rago fere wire namanga kidohe na wiri Yisai te, a nga boro sa du na nunga re ti ni dagba roni yo te, watadu kusi pa ha fere ya wire zingisi gi moyambu kuti re, ka pida re, wa du he ni gi uru te re.”

⁹Doege boro Edome ki karaga ha ki ya, nga gu ko naaru pati ga Saura amoyambu, “Mi abi wiri Yisai ko niye ku Nobo yo, koyo du Aimereke ni wiri Aituba,

¹⁰ko ki sana Yekova tipa ko, ki fu aúngba fu ko, ki fu gu basape fu ko nangia ga Goriata gu Fereseto re.”

¹¹Bakindo ki kedi sunge ni ndu ka yamba Aimereke boromotumo, nangia wiri Aituba, na ga bako aborokporo du, nga agu aboromotumo nadu Nobo yo; i dunduko ki ye koyo du bakindo ni.

¹²Saura ki ya, “Mo gí he awere, mo wiri Aituba.” Ko ki karaga ha ki ya, “Mi du re, gi gbia.”

¹³Saura ki ya fu ko, “Tipagine oni ata bura re ti ni, mo na wiri Yisai, wa mo afu kpokuta fu ko, na basape a, ki sana Mbori a tipa gako pai, ko zingi azinga kuti re, ka pida re, wa du he ni gi uru re?”

¹⁴Aimereke ki karaga ha fu bakindo, ki ya, “Da du nga dagba gamo amoyambu yo ni irarengo wa Dawidi, nga gu ko nga kumba ku wiri bakindo, du ku ri ga gbuu, ki du ni irisiirisi ko rogo ga kporo?

¹⁵Tona mi ka sana Mbori areme tipa ko? Ai! Mi are nga na ni te! Ka bakindo gédi nga wiri pai kuti gako moyambu ya, watadu kuti ga buba aborokporo a ya; bambiko ga moyambu aina nga pai tipa agi apai dunduko te re, toni he watadu bakere he a te.”

¹⁶Bakindo ki ya, “Aimereke, mo nikakpí akpi ni rengo, mo na ga bamo aborokporo.”

¹⁷Bakindo ki ya fu gu babandarago naru pati ko, “Mo sá tiro ka imo agu aboromotumo nga ga Yekova yo; bambiko i zi beyo na Dawidi, bambiko i aini aina ya ko naora aora, ka i akusa nga ha fere ya.” Ono ga bakindo amoyambu aida nga ka taa beyo ka imo ga Yekova aboromotumo te.

¹⁸Bakindo ki ya fu Doege, “Mo tigamo sá tiro ka imo aboromotumo.” Doege boro Edome ki sa tiko, ki mangi aboromotumo dũ, ko ki imi aboro ni gu uru re wa 85, nga agu yo naaukadi efoda du ni tutu he ni giri nzibi.

¹⁹Ko ki gbarasi Nobo nangia ga aboromotumo bakporo ni basape; akumba na ade, agude na agude ngbamai, abaabagara na anaadongi na akandoro a ni basape.

²⁰Wiri Aimereke sa rimoko angia Abiatara, ki bati ki merẽ fuo Dawidi, Aimereke ki ngia wiri Aituba.

²¹Abiatara ki gumba ha fu Dawidi ya Saura imi ga Yekova aboromotumo dunduko.

²²Dawidi ki ya fu Abiatara, “Mi aini he aina ni gu uru, ho Doege boro Edome adu ni yo, ya ko agumba ha agumba fu Saura. Ono enge pa kpio ga bamo aborokporo ti kina re.

²³Mo nyé na mi, ka mo gúnde nga ya; bambiko gu ni nagbata ungare ni nagbata ungaro a; bambiko mo adú na mi ni bandabanda ro.”