Read zande 1 SAMUERE 23 Bible Online

1 SAMUERE 23 - zande bible

1 SAMUERE 23

¹I ki gumba ha fu Dawidi, ki ya, “Mo ngére, aFereseto naso vura kuti Kira, i nadĩ ahe bataka zende ahe yo.”

²Si du Dawidi asana Yekova ti ni, ki ya, “Mi ndú ka manga agi aFereseto re?” Yekova ki ya fu Dawidi, “Mo ndú ka manga aFereseto, ki batasi Kira.”

³Ono ga Dawidi aboro ki ya fu ko, “Mo ngére, ani tigaani du na kina gunde Yuda no; gunde angé nga ki susi ka ani ndu ku Kira yo ka so vura kuti gu rikavura nga ga aFereseto, te?”

⁴Dawidi ki sana Yekova berewe. Yekova ki karaga ha fu ko ki ya, “Mo gúari, ki ndu ku Kira yo; bambiko mi afú aFereseto afu ku be ro.”

⁵Dawidi ki ndu ku Kira yo na gako aboro, ki so vura na aFereseto, ki yega na gayo zogozogo anya, ki imi yo aimo ni dungu yo. Si du Dawidi abatasi agu aboro ti ni naaraka Kira yo.

⁶Ho Abiatara wiri Aimereke aoro ni koyo du Dawidi ni ku Kira yo, ko aye na efoda be ko.

⁷I ki gumba ha fu Saura ya Dawidi gu du Kira yo. Saura ki ya, “Mbori fu ko ku be re; bambiko ko ni kisikisi ko ku bakporo yo, wa ko narimi ku gbata yo du na ngbadimo bakporo ti ni na angbongbo a.”

⁸Saura ki yambu aboro du sa vura, ka ndu ku Kira yo, ka ru nguru kuti Dawidi na gako aboro,

⁹Dawidi ki ini he ya Saura naberã gbigbitapai sa ko; ko ki ya fu Abiatara boromotumo wẽ, “Mo yé na efoda kono.”

¹⁰Dawidi ki ya, “Ako Yekova, ga aYisaraere Mbori, ga moyambu gi he ya Saura nagbata pa ye ku Kira no, ka gbarasa bakporo mbiko gi pai.

¹¹Aboro Kira akúsa re fu ko? Saura ayé da no, wa ga moyambu nigi he? Ako Yekova, ga aYisaraere Mbori, mi nazungadi ro, mo gúmba ha fu ga moyambu.” Yekova ki ya, “Ko ayé aye kono.”

¹²Dawidi ki ya, “Aboro Kira akúsa re fu Saura na gimi aboro?” Yekova ki ya, “I akúsa ro akusa.”

¹³Si du Dawidi na gako aboro, nga agu yo nadu wa aboro 600, ki guari Kira yo, ki merẽ ku ho i arengbe ka ndu ku ho ni. I ki gumba ha fu Saura ya Dawidi ima guari Kira yo ki merẽ, ko ki mbu pa nduge koyo.

¹⁴Dawidi ki sungu ngbakungba yo rogo nyanyaki aba, du rogo ringara abaagangara Ngbakungba Zifi yo. Saura ki nigbata ko na uru, ono Mbori afu nga ko ku be ko te.

¹⁵Dawidi ki ini he ya Saura nagbata ungako. Dawidi ki du kina Ngbakungba Zifi yo birengua yo.

¹⁶Yonatana wiri Saura ki guari, ki ndu koyo du Dawidi ni birengua yo, ki nyakasi ko rogo Mbori yo.

¹⁷Ko ki ya fu ko, “Ka mo gúnde nga ya; bambiko buba nga Saura abí nga ro te; mo nikadu ni bakindo tigamo ku ri aYisaraere, mi adú fuo ro tigimi; ono Saura nga buba ini gure a.”

¹⁸I ue ki mongo kido he ku bangiri Yekova; Dawidi ki nye birengua yo kindi, Yonatana ki ga ku kpuko yo.

¹⁹Aboro Zifi ki ye koyo du Saura ni ku Giba yo, ki ya, “A nga Dawidi nagbu kina fuo rani nyanyaki rago birengua yo gangara Akira yo, nga gu du ku sudiyo bara ku ngbi ngume yo, te?

²⁰Ako bakindo, mo yé awere, ku sangba gu pai mbisimoro akpi nyemu he; ono gaani pai nikngia kusa ko ku be bakindo.”

²¹Saura ki ya, “Yekova fú maku fu roni; bambiko nunga re du ti roni.

²²Mi nakpara fu roni, oni ndú ka makia ho nyanyaki, ki ini ho, ki bi ba ko ho du gako bagbuko ni, na da nabi ko yo; bambiko i gumba ha fere ya, ko namanga pai ni kere birĩ.

²³Si du oni bí he ki ini agu abagbuko dunduko ko aoka tiko rogo, oni ki ye berewe kono du mi ni ki pe kina rengo. Ani ki ndu na oni; si ayé ka du wa gere, ka ko du ringara yo, mi agbáta ko dagba agu akutu nga ga Yuda yo dunduko.”

²⁴I ki guari, ki nindu ku Zifi yo mbata fu Saura. Ono Dawidi adu na gako aboro ngbakungba Maona yo, rogo kpasakpasa rago ku sudiyo ku pangba ngbi ngume.

²⁵Saura na gako aboro ki ndu ka gbata ko. I ki gumba ha fu Dawidi; si du ko ayé ti ni sa gu mbia, ki nye ngbakungba Maona yo. Ho Saura agi he ni, ko ki nido fuo Dawidi rogo ngbakungba Maona.

²⁶Saura ki nindu ku kumbabe pavuru bagangara, Dawidi ki nindu ku garebe pavuru bagangara ku bani na gako aboro; Dawidi ki ipisi tiko ka birikpo be gunde Saura; bambiko Saura na gako aboro ade gangi pati Dawidi na gako aboro kirikiri ka zia yo.

²⁷Ono sunge ki ye koyo du Saura ni, ki ya, “Mo yára kono; bambiko aFereseto zuba ringara.”

²⁸Si du Saura ki karaga tiko ti do fuo Dawidi, ki ndu ka so vura na aFereseto; si du i niya ti ni ti gu ba re Mbia Merã.

²⁹Dawidi ki guari yo, ki niraki rogo gu nyanyaki aba du Ene-gedi yo.