Read zande 1 SAMUERE 24 Bible Online

1 SAMUERE 24 - zande bible

1 SAMUERE 24

¹Ho Saura ayega ni ti do fuo aFereseto, i ki gumba ha fu ko, ki ya, “Mo ngére, Dawidi gu du ngbakungba Ene-gedi yo.”

²Saura ki rogo siasia aboro dagba aYisaraere yo dunduko wa aboro 3,000, ki ndu ka gbata Dawidi na gako aboro ri Ambia Amemenvuo.

³Ko ki da ti ndugu akandoro pangba gene, yo simbia adu ni; Saura ki rimi koyo ka ra, Ono Dawidi adu na gako aboro rogo gu pavuru simbia naturũ aturã ku mbata yo.

⁴Ga Dawidi aboro ki ya fu ko, “Mo ngére, areme nga mu uru Yekova agumba pa ha foro ki ya, ‘Mo ngére, mi afú vuraro ku be ro, mo ki mangi fu ko a wa si ka ngba ti ro.’ ” Dawidi ki guari tie, ki yere ngba ga Saura gbanga roko ni gbuko.

⁵Fuo ho, ngbadu Dawidi ki imi, bambiko wa ko ayere ngba ga Saura roko.

⁶Ko ki ya fu gako aboro, “Ka Yekova idi nga ha mi mangi gi pai re fu gi gbia, nga ga Yekova mbedimbedi boro ya, nga taã bere sa ko, wa du ko ni ga Yekova mbedimbedi boro.”

⁷Si du Dawidi aza gako aboro ti ni ni agi apai re, ka ko aida nga ha fu yo i mo kuti Saura ya. Saura ki guari simbia yo, ki ndu ngba gako nduge.

⁸Fuo ho Dawidi ki guari a, ki kuru simbia yo, ki ta paa ku ari fuo Saura niya, “Gi gbia nga bakindo!” Ho Saura angere ni ku gii ko yo, Dawidi ki nugadi ku sande ni kpakpuko, ki tumusa fu ko.

⁹Dawidi ki ya fu Saura, “Tipagine mo agia sangba aboro ti ni, wa i niya, ‘Mo ngére, Dawidi nagbata ro ka imisa ro’?

¹⁰Mo ngére, areme re bangiro nibi gu pai wa Yekova nifu ro ku be re simbia yo; agu yo nikpari fere mi imi ro, ono gi berã ki batasi ro. Mi ki ya, ‘Mi atáã nga bere kuti gi gbia te; bambiko mo nga ga Yekova mbedimbedi boro.’

¹¹Ku ri gere, buba, mo bí nga, wawa, mo bí nga ga gbanga roko be re; bambiko wa mi niyere ngba ga gbanga roko, ka mi aimo nga ro ya, mo ini he ki bi he ya gbigbitapai ti re na samungu a te. Si du mi ainga nga pai k uti ro ti ni a ya, wa mo avura nigbata ungare ka imo re.

¹²Yekova sári ngbanga dagba rani na mo, Yekova ki iri bape ro ti re; ono mi amáa nga bere ti ro te.

¹³Wa ga adumbata sanza agumba ha ya, ‘Gbegberẽpai nakura be kina gbegberẽpai’; ono mi amáa nga bere ti ro te.

¹⁴Da bakindo aYisaraere agbata ni? da mo tigamo ado fuo ni? Fuo kangba ango! fuo kangada!

¹⁵Si du ka Yekova du ni basaringbanga, ka sara ngbanga dagba rani na mo, ki bi he, ki zungadi he tipa gi pai re, ki batasi re vuru be ro.”

¹⁶Ho Dawidi adigisi gumba gako apai ni fu Saura, Saura ki ya, “Fugoro du, Dawidi, wire?” Saura ki poi ku ari, nikpari ni aume.

¹⁷Ko ki ya fu Dawidi, “Mo nga ruru boro ki susi re; bambiko mo mangi kina wenepai fere, ono mi tigimi ninamanga kina gbigbitapai foro.

¹⁸Ono mo taki pande he areme ya mo mangi pai fere wenengaĩ; bambiko ho Yekova nifu re ni ku be ro, mo naimo nga re te.

¹⁹Bambiko ka boro bi vurani, ni mbu ni ni ga zezeredi? Si du Yekova afú mosoro wenepai foro tipa gi pai mangi mo fere areme re.

²⁰Awere, mo ngére, mi ini he ni rengo ya mo adú adu ni bakindo ni rengo, gu ngbi nga ga aYisaraere ki kii akia ku be ro.

²¹Si du mo zúnga he fere awere ti rimo Yekova ya mo abá nga angbatungare kpakaya fuo kpiore te, mo agbárasa nga rimore dagba ngbatunga buba a te.”

²²Dawidi ki zunga he fu Saura. Saura ki ga ku kpuko yo; ono Dawidi ki ga ku ba ko yo berewe na gako aboro.