Read zande 1 SAMUERE 25 Bible Online

1 SAMUERE 25 - zande bible

1 SAMUERE 25

¹Samuere ki kpi; aYisaraere ki dungura tiyo dunduko ki kpari ko gbe nita ngbaduyo, i ki kpisidi ko kina rogo gako bambu Rama yo. Dawidi ki guari ki ndu ku ngbakungba Parana yo.

²Kumba adu Maona yo, gako sunge adu Karumera yo. Gu kumba re adu ni irakumuko gbe; akandoro adu be ko wa 3,000 na ameme wa 1,000. Ko anakpe mange gako akandoro Karumera yo.

³Rimo gu kumba re angia Nabara, rimo diako ki ngia Abigaira. Gu de re adu na wene rugatinapai, tamari ki du ni bawene he gbe, ono gu kumba re adu ni boro gbigbita sino ni gbegberẽ boro rogo gako mangaapai yo; ngbatunga Kareba nangia ko.

⁴Dawidi ki gi he ngbakungba yo ya Nabara nakpe mange gako akandoro.

⁵Si du Dawidi ki kedi paranga aboro bawe; Dawidi ki ya fu gu paranga aboro re, “Oni ndú ku Karumera yo, ki ndu koyo du Nabara ni, ki poi kuti ko na rimore.

⁶Were oni ka ya fu gu ko naraka zezeredi: ‘Zereda mongo dú fu roni, zereda ki du fu gamo aborokporo a, zereda ki du fu gamo aboro dunduko na fu gamo ahe dunduko a.

⁷Mi gi he awere nga abakpemange akandoro be ro; gamo ababanda akandoro du na ani awere mbembedi, ono ani aimisa nga yo te. He ainga nga be yo sa ni gu rago dunduko i adu Karumera yo te.

⁸Mo sána nga gamo aparanga, i agúmba ha foro. Si du ka gimi aparanga ngba ti ni bangiro; bambiko ye ani areme rogo wene uru, mi nakpara foro, mo fú gu he naye ku be ro fu gamo amoyambu na fu wiro a nga Dawidi.’ ”

⁹Ho ga Dawidi aparanga aye ni, i ki gumba agu apai re fu Nabara na rimo Dawidi; i ki sungu.

¹⁰Nabara ki karaga ha fu ga Dawidi amoyambu, ki ya, “Da nga Dawidi? Da nga wiri Yisai? Dungu amoyambu gbandaka awere be abairayo ni ba sa sa.

¹¹Ka mi fu gi kpokuta na gi ime na gi pasio nga gu imi mi tipa gimi abakpemange akandoro, ka fu he fu agu aboro mi aina nga ho i niye ni ya?”

¹²Si du ga Dawidi amoyambu ki karaga tiyo, ki ga, ki gumba agu apai re fu ko dunduko.

¹³Dawidi ki ya fu gako aboro, “Oni vódi gaoni basape wa du oni ni ba sa sa!” I ki vodi tiyo na gayo abasape ni ba sa sa; Dawidi ki vo gako basape a; aboro ki ngbe fuo Dawidi wa 400, agu yo 200 ki nye pati ahe.

¹⁴Ono boro sa dagba aparanga yo agumba ha fu Abigaira, dia Nabara, ki ya, “Mo ngére, Dawidi nikedi asunge ngbakungba yo ka paa kuti bairarani; ko ki gumba pai fu yo nyanyaki.

¹⁵Ono agu akumba re angia wene aboro fu rani, ka i aimisa nga rani ya, he ainga nga be rani a te, wa ani ainidi tirani na yo, ho ani adu ni nvuo yo;

¹⁶i adu wa ndugu fu rani yuru na uru, wa ani adu na yo nibanda akandoro.

¹⁷Si du mo rúgu tiro ki berẽ pa gu pai mo aKamanga; bambiko i berẽ gbigbitapai kuti bairarani, na kuti gako aborokporo dunduko, bambiko wa du ko ni ngbatunga awiri gbegberẽ sino aboro, nga gu ko ka aboro agumba nga pai fu ko ya.”

¹⁸Abigaira ki ipisi tiri, ki rogo udiudi kpokuta 200, na kambu imekakue ue, na akandoro bisue i aima mbakada ra, na ugu zende ahe wa aritere 61, na akpura ugu rindi kakue 100, na ugu vurumo ni mekemeke he 200, ri ki moi he ku ri anaadongi.

¹⁹Ri ki ya fu gari aparanga wẽ, “Oni nindú mbata fere; oni ngére, mi naye fuo roni.” Ono ri agumba nga ha fu kumbari nga Nabara te.

²⁰Si adu were, wa ri aora tigari ri gari nadongi, ri ki ye ki zorõ ku pati gbugbu rago bagangara yo, Dawidi ki ye na gako aboro sa ri; ri ki gbia yo.

²¹Were Dawidi aima ya, “Ni rengo mi abanda ga gi boro ahe dunduko gbua re ngbakungba no, si du ka he ainga nga sa dagba agu ahe dunduko nangia gako ya. Ko karaga kina gbegberẽpai iere ku ba wenepai.

²²Mbori mángi wo fu avura Dawidi, na kura ha a wo, ka mi mbú kina kumbagude sa dagba agu ahe nga gako dunduko ku wiso.”

²³Ho Abigaira abi Dawidi ni, ri ki ipisi tiri ka zorã ri gari nadongi yo, ki ti ku bara bangiri Dawidi ni kpakpuri ku sande, ki nugadi ku sende a.

²⁴Ri ki ti pati nduko, ki ya, “Ku ri re, gi gbia, gu irairapai re dú ku ri re; mi nakpara foro, mo ídi fu ga moyambu ri gumba pai foro, mo ki gi agu apai nga ga ga moyambu

²⁵Mi nakpara foro, ka gi gbia bérẽ nga pa gi kumba nga ga gbegberẽ sino boro re ya, nga Nabara; mbiko wa du rimoko, kina wo du ko a; Nabara nga rimoko, mumungo boro nga ko a; ono mi nga ga moyambu, mi tigimi abi nga gamo aparanga nga ga gi gbia yo te, nga agu yo mo akedi yo.

²⁶Si du tie, gi gbia, wa du Yekova ni ungako, na wa du mo ni ungaro, wa Yekova naza ro ti uka kure boro, na tipa ira bape ro ni tiro, si du tie avuraro na agu yo nagbata gbegberẽpai sa gi gbia, i dú wa Nabara.

²⁷Ono awere gi gamahe re nga gu ga moyambu niye na ni fu gi gbia, mo mbú he fu agu aparanga nga agu yo naapeka gi gbia.

²⁸Mi nakpara foro, mo vú ga moyambu ti gari tindika; bambiko Yekova anyákasa ngbatunga gi gbia bambiko gi gbia naso gu vura nga ga Yekova; i abí nga gbegberẽpai ti ro rogo gamo arame dunduko te.

²⁹Ka aboro vura guari ka do fuo ro, ka gbata ungaro, ungaro ki du ni vovoho na Yekova ga Mbori ni ungaha; unga avuraro ko ka bafa ha, wa ti yaro barioko.

³⁰Si adú wa gere, ho Yekova ka manga gu wene apai ni dunduko fu gi gbia a wa ko agumba ha tipa ro, ki ringbisi ro ni bazogo ku ri aYisaraere,

³¹gure adú nga ni rungo foro te, watadu ni ingapai nga ga kpoto yo fu gi gbia a te, wa mo auka nga kure gbua ya, watadu gi gbia iri bape ni tiko a ya. Ho ka Yekova mangi he ni wenengaĩ fu gi gbia, mo ki tingidi pa ga moyambu.”

³²Dawidi ki ya fu Abigaira, “I sámbua Yekova, ga aYisaraere Mbori, nga gu ko nakedi ro areme mo ye ka gbia re!

³³Maku dú foro tipa ga tatamana, maku du foro naza re areme ti uka kure, naza re ti ira bape re ni tire!

³⁴Bambiko ni rengo, wa du Yekova nga ga aYisaraere Mbori ni ungako, nga gu ko niza re ti imisa ro, kina gu mo niipisi tiro ka ye ka gbia re, ni rengo ka he nye nga fu Nabara dati girarago nga kina kumbagude sa a te.”

³⁵Si du Dawidi ki rogo agu ahe be ri nga gu ri aye na ni fu ko; ko ki ya fu ri, “Mo gá ku kpuro yo zezeredi; mo bí, mi gi sangbaro, ki idi pa ga sanahe.”

³⁶Abigaira ki yega koyo du Nabara ni; mo ngére, ko ki mangi pumbo kpuko, wa gu pumbo nga ga bakindo. Rago ki ningba ti Nabara ku kpotoko yo, bambiko ko akpi imekakue bakere; si du ri agumba nga pai ti ni ya, umba pai watadu bakere he a ya, ki da ho rago agiri ni.

³⁷Si adu wa gere wiso, ho imekakue agbandaka ni ti Nabara, diako ki gumba agi apai fu ko re, ko ki kpi ku kpotoko yo, ko ki sa tiko wa kina mbia.

³⁸Rame adu wa bawe fuo ho Yekova ki mangi Nabara; ko ki kpi.

³⁹Ho Dawidi agi he ni ya Nabara kpi, ko ki ya. “I sámbua Yekova, nga gu ko sari ngbanga gu pai nga ga gbarasa rimore be Nabara, ki ka na gako moyambu ti manga gbegberẽpai; ono gu gbigbita mangapai nga ga Nabara Yekova karaga ha kina ku ri ko.” Dawidi ki kedi sunge ki gumba pai tipa Abigaira, ka dia ri ni diako.

⁴⁰Ho ga Dawidi amoyambu ada ni koyo du Abigaira ni Karumera yo, i ki gumba ha fu ri, ki ya, “Dawidi nikedi rani kono du mo ni, ka dia ro fu ko ni diako.”

⁴¹Ri ki guari ki nugadi ku sende ni kpakpuri, ki ya, “Oni ngére, ga moyambu du wa vururo nikazunda ndu ga gi gbia amoyambu.”

⁴²Abigaira ki ipisi tiri ki guari ki oro ri nadongi, na gari amoyambu bisue fuo ri ni ade naapeka ri; ri ki ndu fuo ga Dawidi asunge, ki du ni diako.

⁴³Dawiui ki di Ainoma nangia boro Yizerere; i ki du ue ni adiako.

⁴⁴Ono Saura aima fu wiriko nga Mikara dia Dawidi, fu Parete wiri Raisa, nangia boro Garima.