Read zande 1 SAMUERE 26 Bible Online

1 SAMUERE 26 - zande bible

1 SAMUERE 26

¹Aboro Zifi ki ye koyo du Saura ni ku Giba yo, ki ya, “A nga Dawiai nagbu ni tiko gangara Akira yo, nga gu du bangbanda ngbi ngume, te?”

²Saura ki guari, ki ndu ku ngbakungba Zifi yo, na siasia akumba aYisaraere fuo ko wa aboro 3,000, ka gbata Dawidi ngbakungba Zifi yo.

³Saura ki zi bataya gangara Akira yo, nga gu nadu pangba gene bangbanda ngbi ngume yo. Ono Dawidi anye kina ngbakungba yo; ho ko aini he ni ya Saura naye fuo ko ku ngbakungba yo,

⁴Dawidi ki kedi abamoirago tie ka ruga tiko na ni nzunzu nga Saura ye ni rengo.

⁵Dawidi ki guari ki ye kovo Saura azi bataya ni; Dawidi ki bi gu ba ho aSaura apiki ni, na Abinera nangia wiri Nere, nangia barutiri gako rimbasa aborovura. Saura ki pi rogo gu ba angbagidavura adu ni, aborovura ki zi ba yo pati ko kirikiri.

⁶Dawidi ki ya fu Aimereke boro Eto, na fu Abisai nangia wiri Seruya, nangia unvurua Yoaba a, ki ya, “Da ani andú na ni koyo du Saura ni ku bataya yo?” Abisai ki ya, “Ani andú na mo.”

⁷Si du aDawidi na Abisai ki ye yuru koyo du aborovura ni; Saura ki pi nira ara ho angbagidavura adu ni. Gako baso ki du ni duadua ha ku sende yo ba riko; aAbinera ki piki pati ko kirikiri na aborovura.

⁸Abisai ki ya fu Dawidi. “Mbori ima fu vuraro areme ku be ro; mi nakpara foro awere mo ídi he mi rũ ko ni baso bara sa ku sande, ka mi arũ nga ko ni ue he berewe ya.”

⁹Dawidi ki ya fu Abisai, “Ka mo gbárasi nga ko ya; bambiko da ka taĩ beni sa ga Yekova mbedimbedi boro, nizanga pai ku ri ni?”

¹⁰Dawidi ki ya a, “A wa du Yekova ni ungako, kina Yekova nikaimo ko; watadu nyasa rameko adá, watadu ko andú ka so vura, ki kpi.

¹¹Ka Yekova idi nga ha fere mi taĩ bere sa gako mbedimbedi boro te; ono mi nakpara foro awere, mo dí kina gu baso du ba ri ko, na ndukura ime, ani ki ga.”

¹²Si du Dawidi ki di baso na ndukura ime ba ri Saura; i ki ga ku sa yo. Ka boro abi nga ha ya, ka boro aina nga ha a ya; ka boro azinga nga rame yo a ya; bambiko i ara ara dunduko, bambiko ndundundu rame aye be Yekova ku ri yo.

¹³Dawidi ki si ku mbiti yo, ki ru ri bagangara yo tuturũ gbe, bakere dagba rago ki du dagba ko na yo.

¹⁴Dawidi ki poi ku ari fu aborovura na fu Abinera nangia wiri Nere, ki ya, “Abinera, mo akáraga nga pai te?” Abinera ki karaga ha ki ya, “Da nga mo napaa ku ari fu bakindo?”

¹⁵Dawidi ki ya fu Abinera, “A nga eerẽ kumba nga mo te? Da du wa mo dagba aYisaraere? Tipagine tie mo abanda nga ga gbia nga bakindo ti ni ya? Bambiko Doro niye koyo sa dagba aboro ka gbarasa bakindo nga ga gbia.

¹⁶Gi pai mangi mo re ngba nga ha te. A wa du Yekova ni ungako, oni re tipa kina kpio, bambiko oni abanda nga gaoni gbia te, nga ga Yekova mbedimbedi boro. Were, mo ngére nga, wari du ga bakindo baso ni, na gu ndukura ime nidu ba riko?”

¹⁷Saura ki ini fugo Dawidi, ki ya, “Fugoro du. Dawidi wire?” Dawidi ki ya, “Ako bakindo, gi gbia, fugore du.”

¹⁸Ko ki ya, “Tipagine gi gbia ado fuo gako moyambu ti ni were? Gini pai mangi mi? Watadu gini gbigbitapai du ti re?

¹⁹Si du awere, mi nakpara foro, gi gbia nga gi bakindo, gí agu apai nga ga gako moyambu. Ka si ngia Yekova nazingisa ro kuti re, ko ídi pa motumo; ono ka si ngia wiri boro du, i atíwa yo bara bangiri Yekova, bambiko i dandi re areme ka mi ka nga kuti pa ga Yekova ũkumbo ya, niya, ‘Mo ndú ka manga pa kungba ambori.’

²⁰Si du awere, ka kurere úka nga ku auru kpotosende gii bangiri Yekova ya; bambiko bakindo aYisaraere nikuru ka gbata kangada, wa ho boro nagbata gbate ni ri abaagangara yo.”

²¹Saura ki ya, “Mi ingi pai; Dawidi wire, mo káraga tiro; bambiko mi amánga nga ro berewe gbegberẽ te, bambiko ungare nidu ni kikiipa he bangiro areme; mo ngére, mi namanga pai wa kina irapupo, ki niingi pai gbe.”

²²Dawidi ki karaga ha ki ya, “Mo ngére, ga baso du re! Ako bakindo! mo ídi he tie paranga kumba ye sa ka dia ha.

²³Yekova nakaraga pai fu aboro ni ba sa sa tipa gayo rurupai na tipa gayo yososopai; bambiko wa Yekova nifu ro areme ku be re, ka mi akpi nga nyemu ka taã bere sa ga Yekova mbedimbedi boro ya.

²⁴Mo ngére, wa ungaro nidu ni kikiipa ha bangire areme, a wo i ka ida ha ungare dú ni kikiipa ha bangiri Yekova, ko bátasi re be arungo dunduko.”

²⁵Saura ki ya fu Dawidi. “Maku dú foro, Dawidi, wire! Mo amánga dungu apai ki nidi adia be apai ni rengo.” Si du Dawidi ki niga ngba gako gene, Saura ki karaga tiko ku ba ko yo.