Read zande 1 SAMUERE 27 Bible Online

1 SAMUERE 27 - zande bible

1 SAMUERE 27

¹Dawidi ki berẽ he ku kpotoko yo ki ya. “Ni rengo, mi akpí akpi ni gu rago be Saura; a nga kura pai ho ka ngba fere ki susi te, kina gu ka mi merẽ ku rogo ga aFereseto ringara yo ka bata; Saura ambú be gbata re berewe rogo gu ringara nga ga aYisaraere du, si du ka mi bati ti ni be ko.”

²Dawidi ki guari, ki si ku mbiti yo, ko na agu aboro naadu 600 fuo ko, ku Akisa yo nangia wiri Maoka, nangia wiri bakindo Gata.

³Dawidi ki nisungu ku Gata yo fuo Akisa, ko na gako akumba, aboro ni ba sa sa na gayo aborokporo. Dawidi a na adiako ue, Ainoama nangia boro Yizerere na Abigaira nangia boro Karumera, nangia dekurugbo Nabara.

⁴I ki gumba ha fu Saura ya Dawidi oro ku Gata yo, si du ko agbata nga ko ti ni berewe ya.

⁵Dawidi ki ya fu Akisa, “Ka mi ngba bangiro awere, i fú ba fere rogo gu bakporo sa rogo gi ringara re, mi nisúngu yo; tipagine ka ga moyambu asunga ti ni kina rogo ga bakindo bakporo kindi?”

⁶Akisa ki fu Zikeraga fu ko ni kina gu uru re; si du du Zikeraga ti ni ni ga abakindo aYudo bakporo ki da ku areme.

⁷Ono gedigedi agu arame nga gu Dawidi araki ku rogo ringara aFereseto yo angia garã sa na diwi biama.

⁸Dawidi ki merẽ na gako aboro, ka gbu ga aGesura ahe na ga aGezere, na ga aAmareko; bambiko agi arika aboro re naadu ni aboro gu ringara re, nangia kuru aboro ho, wa mo nandu ku Sura yo, ki da ku ringara Ezipeta yo a.

⁹Dawidi ki mangi aboro gu ringara re, ka ko abatasa nga kumba na de ni ungayo sa ya, ono ko ki rogo akandoro ki ga na ami, na abaabagara, na anaadongi, na akameri, na aroko, ko ki karaga tiko ki ye koyo du Akisa ni.

¹⁰Ho Akisa asana he ni, ki ya, “Wari mo nigbu ahe ni areme?” Dawidi aniya, “Kuti Yuda ku Negebe yo” watadu, “Kuti aYeramere ku Negebe yo”, watadu “Kuti aKeno ku Negebe yo.”

¹¹Ka Dawidi abatasa nga kumba na de ni ungayo sa ya, ki ye na yo ku Gata yo a ya, niberẽ he tigako, ki ya, “I ka gumba pai sa rani, ki ya, ‘Wo Dawiai amangi.’ ” Ko anamanga kina wo na rago dunduko wa ko anaraka ringara aFereseto yo.

¹²Akisa ki idi gu pai Dawidi agumba niberẽ he, ki ya, “Ko mangi gako aboro nga aYisaraere i gbarasi rimoko agbarasa gbe; si du ko ka du ti ni ni vurure nye anye kindi.”