Read zande 1 SAMUERE 3 Bible Online

1 SAMUERE 3 - zande bible

1 SAMUERE 3

¹Gu gude nangia Samuere ki nimángi pa Yekova ku tii be Eri. Ga Yekova pai akura nga dedede ti agu arago re te; yuguyuguhe adu nga ho gbayaga a te.

²Si adu wa gere ni gu rago, ho Eri api ni ba ko, bangiriko natona ka du tataita, ka ko arengba nga ka ngera wenengaĩ ya;

³ka ga Mbori we atara ata abisa nga ya, Samuere ki pi sande ka ra vuru ga Yekova yekaru yo, yo ga Mbori sanduki nidu ni.

⁴Yekova ki yambu he ki ya, “Samuere! Samuere!” Ko ki karaga ha ki ya, “Mi du re!”

⁵ko ki oro koyo du Eri ni, ki ya, “Mi du re, wa yambu mo re.” Ko ki ya, “Mi ayamba nga ro te; mo pí sande berewe.” Ko ki ndu ki pi sande berewe.

⁶Yekova ki yambu he berewe, ki ya, “Samuere!” Samuere ki guari ki ndu koyo du Eri ni, ki ya, “Mi du re; wa yambu mo re.” Ono ko ki karaga ha ki ya, “Mi ayamba nga ro te, wire; mo pí sande berewe.”

⁷Were Samuere ata ina nga Yekova ho te, ka Yekova ata kusa nga sangbako fu ko a ya.

⁸Yekova ki yambu Samuere berewe ni biata ha. Ko ki guari ki ndu koyo du Eri ni, ki ya, “Mi du re, wa yambu mo re.” Eri ki ini he ya Yekova du nayamba gude.

⁹Si du Eri aya ti ni fu Samuere, “Mo ndú, ki pi sande, ka si du wa ko ayamba ro berewe, mo ki ya, ‘Yekova, mo gúmba pai fere, bambiko ga moyambu gi he.’ ” Si du Samuere andu ti ni ki pi ku ba ko yo.

¹⁰Yekova ki ye ki ru, ki yambu he a wa mbata, “Samuere! Samuere!” Samuere ki ya, “Mo gúmba pai fere, bambiko ga moyambu gi he.”

¹¹Yekova ki ya fu Samuere, “Mo ngére, Mi ni tire nikamanga pai ku dagba aYisaraere, nga gu tu aboro yo dunduko ka akperenga akperenga be he, ho i ka gia ha ni.

¹²Ni gu rago re mi amánga pai dunduko fu Eri nga gu mi agumba pa ha tipa ngbatungako, ti tonatona ha ki da ti digida ha.

¹³Bambiko mi agumba ha fu ko ya mi ni tire nikasara ngbanga ngbatungako nye anye kindi tipa gu ingapai nga gu ko aini pa ha, wa awiriko agberẽ ngbayo yo fu Mbori, ka ko aza nga yo tipa ha ya.

¹⁴Si du mi azunga he fu ngbatunga Eri ti ni, ya motumo watadu gamahe si arengba nga na tumo pa ga ngbatunga Eri irairaapai te.”

¹⁵Ono Samuere ki pi daku wiso; ko ki za ngbadimo ga Yekova bambu. Samuere ki nigunde agunde ti yugo pa gu yuguyuguhe re fu Eri.

¹⁶Ono Eri ki yambu Samuere ki ya, “Samuere, wire.” Ko ki ya, “Mi du re.”

¹⁷Eri ki ya, “Gini pai Yekova nigumba ha foro? Mi nakpara foro ka mo óko nga ha ti re ya. Mbori mángi he wo foro, na kura pai k ii ri he a, ka mo óko gu pai sa ti re dagba agu apai yo dunduko nga gu ko nigumba pa ha foro.”

¹⁸Si du Samuere ki gumba kinaku rengo fu ko dunduko, ka ko aoka nga gu ti ko sa ya. Ko ki ya, “Yekova du; ko mángi kina gu pai ngba ti ko.”

¹⁹Samuere ki nisono, Yekova ki du na ko, ka ko aida nga gako pai si ti ku sande gbua ya.

²⁰AYisaraere ki ini he dunduko tona Dana yo ki da ku Bera-saba yo, ya i moi Samuere ko du ni ga Yekova nebi kindi.

²¹Yekova ki yugu tiko berewe Siro yo, bambiko Yekova ayugu tiko fu Samuere Siro yo rogo ga Yekova pai yo.