Read zande 1 SAMUERE 30 Bible Online

1 SAMUERE 30 - zande bible

1 SAMUERE 30

¹Ho Dawidi ada ni na gako aboro ku Zikeraga yo ti biata rame, aAmareko aima gbu ahe Negebe yo, na Zikeraga yo a. I amangi Zikeraga amanga gbe, ki zo ho ni we.

²I azi ade ni zizi yo na agu aboro naadu yo dunduko, rukutu yo na kikindigi yo; i aimo nga gu ni sa te, ono kina ga aga na yo, ki nindu gayo nduge.

³Ho Dawidi ayega ni ku bakporo yo na gako aboro, i abi he i ima zo ho, adiayo na awiriyo nga akumba na ade a, i aga na yo ni zizi aboro.

⁴Dawidi na agu akumba naadu na ko ki poi ku ari ki nikpari ni aume, daho ome adu nga ni ti yo sa kpe berewe ya.

⁵AAmareko azi adia Dawidi ue ni zizi yo, nga Ainoama boro Yizerere, na Abigaira dekurugbo Nabara boro Karumera.

⁶Dawidi ki du ni fudifudi ko gbe; bambiko aboro agumba pa sopa ko ni ambia, bambiko aboro dunduko arungo toroyo yo, aboro ni ba sa sa ki nirungo tipa awiriyo nga akumba na ade. Ono Dawidi ki nyakasi tiko rogo Yekova gako Mbori yo.

⁷Dawidi ki ya fu Abiatara nangia boromotumo, wiri Aimereke, “Mo yé na efoda fere kono.” Abiatara ki ye na efoda koyo du Dawidi ni.

⁸Dawidi ki sana Yekova, ki ya, “Mi dó fuo gi rikavura re? Mi agbia yo?” Ko ki karaga ha fu ko ki ya, “Mo dó fuo yo; bambiko mo agbia yo agbia ni rengo, mo ki yega na yo dunduko.”

⁹Si du Dawidi ki ndu, ko na agu akumba naadu fuo ko 600, ki da ti gu wiridi nangia Besora, yo agu yo i ambu yo sa no asungu ni.

¹⁰Ono Dawidi ki nido fuo aAmareko kindi, ko na aboro 400; bambiko 200 asungu sa no, nga agu yo naarungbura ka i arengba nga nasi gu wiridi nga Besora ya.

¹¹I ki bi boro Ezipeta haurago yo, ki ye na ko fu Dawidi; i ki fu riahe fu ko, ko ki ri he, i ki fu ime fu ko ko mbiri he,

¹²i ki fu wiri mekemeke he fu ko nga ga vurumo, na kpura ugu rindi kakue ue. Ho ko ari he ni, toroko ki yega; bambiko ko ari nga riahe te, ki mbiri wiri ime a te, uru ki du biata na yuru a biata.

¹³Dawidi ki ya fu ko, “Vuru da nga mo? Wari ye mo ni?” Ko ki ya, “Mi nga paranga boro Ezipeta, ni vuru gu boro Amareko; bairare ki mbu re, bambiko rame biata susi mi adu na kaza.

¹⁴Ani du naagbu ahe ku pati aKereto ku Negebe yo, na ku rogo gu rago a nga ga Yuda, na ku Kareba yo ku Negebe yo; ani ki zo Zikeraga na we.”

¹⁵Dawidi ki ya fu ko, “Mo andú na mi koyo du gu rikavura re ni?” Ko ki ya, “Mo zúnga he fere ku bangiri Mbori, ya mo aímo nga re te, watadu fú re ku be bairare a te, si du mi ka ndu na mo ti ni sa gu rikavura re.”

¹⁶Ho ko andu ni na ko koyo, oni ngére, i agbandaka agbandaka dunduko tuturũ rogo ringara, ki ta ri riahe nimbiri he, ki do gbere, bambiko gu dungu gbugbu ahe dunduko nga gu i arogo rogo ga aFereseto ringara na ringara Yuda yo a.

¹⁷Dawidi ki mangi yo tona nziinzii rago ki da k uti k ura uru nyemu; ka boro amerã nga dagba yo yo sa ya, kina aparanga 400 naoro, nga agu yo nandu ri akameri.

¹⁸Dawidi ki karaga agu ahe dunduko nga gu aAmareko arogo; Dawidi ki batasi adiako ue.

¹⁹He akpa nga be yo te, watadu toni he na bakere he te, awiriyo nga akumba na agu yo nga ade te, gbugbu ahe te, na agu ahe i agbu he a te; Dawidi ki yega na ni dunduko.

²⁰Dawidi ki zi rimbasa akandoro dunduko, na rimbasa zogozogo anya; aboro ki nigasi agu ra ku mbata yo fu ko, ki ya, “Agi ra re nga ga Dawidi gbugbu ahe.”

²¹Dawidi ki yega fuo agu aboro 200 re, naadu ni rurungbura yo ka i arengba nga na pe fuo Dawidi ya, nga agu yo ko ambu yo i nye pati wiridi Besora. I ki kuru k a ndu ka gbia Dawidi, na ka gbia agu aboro naadu na ko. Ho Dawidi ambeda ni na aboro, ko ki poi kuti yo.

²²Gbegberẽ aboro ki karaga pai nangia gu gbegberẽ mho aboro, dagba agu yo yo naandu na I Viwidi, ki ya, “Bambiko wa i andu nga na mu ya, ani afú nga he fu yo dagba gu gbugbu ahe yo nga gu ani akaraga te, kpara kina dere aboro na awiriyo fu yo wa du yo in ba sa sa, i ndu na yo ki ga.”

²³Dawidi ki vu. “Oni amánga nga ha wo te, awirinami, mi agu ahe Yekova nifu fu rani te; nga gu ko naabanda rani, ki fu gu rikavura ku be rani nga gu naaye sa rani.

²⁴Da nikadega tuni fu roni sa gi pai re? Bambiko wa gu boro ka dia mosoro naandu sa vura, kina wo ga gu ni mosoro ka du nga gu ni nasungu pati ahe; i aróga mosoro kina sa.”

²⁵Si ki du kina wo tona ti gu uru re ku mbata yo, ko ki mangi he ni rugapai na ni ndika fu aYisaraere, ki da ku awere.

²⁶Ho Dawidi ada ni ku Zikeraga yo, ko ki kedi bete gbugbu ahe fu abadiako na fu abaakumba aYudo, ki ya, “Oni ngére, gamahe du re fu roni dagba gu gbugbu ahe yo nga ga avura Yekova”;

²⁷si adu fu agu yo naadu Betere yo, na ku Ramota du Negebe yo, na ku Yatira yo;

²⁸na ku Aroere yo, na ku Sifemota yo, na ku Esetemoa yo,

²⁹na ku Rakara yo, na fu agu yo naadu rogo agu abaakporo nga ga aYeramere, na fu agu abaakporo nangia ga aKeno;

³⁰fu agu yo nadu Oruma yo, na ku Kora-asana yo, na ku Ataka yo,

³¹na ku Eburone yo a, na ku rogo agu arago dunduko Dawidi anaandu nduge ku ho ni na gako aboro.