Read zande 1 SAMUERE 4 Bible Online

1 SAMUERE 4 - zande bible

1 SAMUERE 4

¹Sangba Samuere agbandaka ku dagba aYisaraere dunduko. AYisaraere ki ndu na vura kuti aFereseto; i ki zi bataya pati Ebenezere, aFereseto ki zi gayo bataya ku Afeka yo.

²AFereseto ki mangi aYisaraere amanga. I ki imi aboro bavura yo wa 4,000.

³Ho rimbasa aborovura ayega ni ku bataya yo, ga aYisaraere abaakumba ki ya, “Tipagine Yekova nimangi rani ti ni areme barangba aFereseto? Ani yé na ga Yekova sanduki mokido Siro yo kono du ani ni, si yé ku dagba rani ka batasa rani be avurarani.”

⁴Si du aboro akedi sunge ti ni ku Siro yo, i ki ye na ga Yekova sanduki mokido, nga ga arimbasa ko, nga gu ko nasunga ri akeruba; ono agu awiri Eri ue nangia Ofeni na Finasa adu yo ga Mbori sanduki mokido adu ni.

⁵Ho ga Yekova sanduki mokido ada ni ku bataya yo, aYisaraere dunduko ki ngbiko ni bakere fugo, kpotosende ki poi berewe.

⁶Ho aFereseto agi gu woro ngbiko ni re, i ki ya, “Gini pai gi bakere ngbiko ayugo ho re ku rogo ga aEbere bataya yo?” I ki ini gu pai nga ga Yekova sanduki da ku bataya yo.

⁷AFereseto adu na gunde, bambiko i aya, “Mbori ye ku bataya yo.” I ki ya, “Na gberẽ he fu rani! Bambiko ngbatunga pai adu nga wa gere mbata te.

⁸Na gberẽ he fu rani! Da nikabatasa rani vurube agi ambori ome re? Agi yo re nga agu ambori namangi aEzipeto na ngbatunga agberãngbi dunduko ngbakungba yo.

⁹Ako aFereseto, oni dú nyanyaki, oni dú wa akumba, oni ka du ni akanga fu aEbere, wa i nidu fu roni. Oni dú wa akumba ka so vura.”

¹⁰AFereseto ki so vura, i ki mangi aYisaraere, i ki oro ni ba sa sa sa gayo abamburoko; bakere kpio aboro ki du, mbiko aYisaraere akpiki wa aboro 30,000 nandu ni nduyo.

¹¹I ki di ga Mbori sanduki; i ki imi awiri Eri ue nangia Ofeni na Finasa a.

¹²Kumba nangia ngbatunga Benyamina ki oro dagba rikavura, ki ye ku Siro yo ni kina gu uru re, na gako roko ni sipisipi he, na sende ti ri ko.

¹³Ho ko ada ni, Eri asungu ri gako basunga pangba gene nipidi rago, bambiko ngbaduko akua tipa ga Mbori sanduki. Ho gu kumba re aye ni ku bakporo yo, ki gumba pa ha, aboro bakporo ki mongo ta ngbayo dunduko.

¹⁴Ho Eri agi pa aboro ni, i nita ngbayo, ko ki ya, “Gini he bakere tatangba awo ti ni, gini pai dũ?” Gu kumba re ki ipisi tiko ki ye ki gumba pa ha fu Eri.

¹⁵Were garã Eri adu wa 98, bangiriko adu ni tataita ha, ka ko angera nga ngba ya.

¹⁶Gu kumba re ki ya fu Eri wẽ, “Mi nga gu boro naye dagba rikavura yo; mi nioro areme kina dagba rikavura.” Ko ki ya, “Gini pai nimángi yo, wire?”

¹⁷Gu kumba naye na gupangbanga re ki karaga ha ki ya, “AYisaraere nikiti ti ngba vura ki oro be aFereseto, ono i imi dungu aboro dagba yo; awiro ue nga Ofeni na Finasa ki kpiki, i ki di ga Mbori sanduki a.”

¹⁸Si ki ta du wa gere, ho ko ape pa ga Mbori sanduki ni, Eri ki ti ni gii ko, ri gako basunga ko asungu auru he pangbadimo bakporo; gorõko ki kiti, ko ki kpi, bambiko gbinza boro nangia ko, ni rõrõi ko gbe. Ko asapa ngbanga fu awiri aYisaraere garã ki du 40.

¹⁹Ono dia wiriko adu na gude, nga dia Finasa, mbembedi ka vunga. Ho ri agi he ni nga i di ga Mbori sanduki, ya ba kumbari na kumbari kpi a, ri ki nuga tiri ki vungu; bambiko ima aye sa ri.

²⁰Ti rago gari kpio agu ade naunda ri ki ya fu ri wẽ, “Ka mo gúnde nga ya, bambiko mo vungu kumbagude.” Ono ri akaraga nga pai te, ri aberã nga pa ha a te.

²¹Ri ki yambu rimo gu gude re nga Ikabodo, niya, “Taarimo guari ti aYisaraere!” bambiko i adi ga Mbori sanduki, na bambiko pa ba kumbari na pa kumbari a.

²²Ri ki ya, “Taarimo guari ti aYisaraere, bambiko i di ga Mbori sanduki ku sa yo.”