Read zande 1 SAMUERE 6 Bible Online

1 SAMUERE 6 - zande bible

1 SAMUERE 6

¹Ga Yekova sanduki araki ku rogo ga aFereseto ringara tipa diwi saba.

²AFereseto ki yambu aboromotumo na airasoroka, ki ya, “Gini pai ani ka manga ha na ga Yekova sanduki? Oni gúmba ha fu rani, ani awíra pa gasa ha waĩ ku baha yo?”

³I ki ya, “Si ngia oni nagasa gu sanduki nga ga ga aYisaraere Mbori, ka oni kédi nga ha ni ku he ya, ono ka oni hé nga gasa ha na ũmotumo tindika fu ko ya. Si oni ka bata ti ni, oni ki ini gu pai tie ka ko adia nga beko ti ni ri roni ya.”

⁴I ki ya, “Ani afú gini he fu ko ni ũmotumo tindika?” I ki ya, “Kpia anangito bisue rogo dahabu, na kpia akuri bisue rogo dahabu a, ringbisi he wa pa du gedigedi gaoni agbia aFereseto; bambiko kina gu gberãngbi re nadu ku ri roni dunduko na ku ri gaoni agbia a.

⁵Si du oni ka manga kpia gaoni anangito ti ni, na kpia gaoni akuri, nga agu ra nagbarasa ringara, oni ki fu taarimo fu ga aYisaraere Mbori; si ngia ko adía beko ri roni, na ri gaoni ambori na ri gaoni ringara a.

⁶Tipagine ka oni nyakasi kpotoroni yo ti ni wa aEzipeto anyakasi kpotoyo yo na Faro? Ho ko amanga gu iiriwo banaru pai ni dagba yo, i aidi fu aboro i ndu, i ki ndu a, te?

⁷Si du oni mángi vovo ngbagida ki mbakadi he, ki rogo anaabagara ue i napira mamura, i ata maa nga gonga mbata ti gorõra ya, ki vodi anaabagara kuti ngbagida, oni ki rogo awira pati ra ki ye na ami ku kporo no.

⁸Oni ki di ga Yekova sanduki ki moi he ku auru ngbagida, ki moi gu akpiaahe re nga ga dahabu nga gu oni ka keda ha fu ko ni ũmotumo tindika, ku rogo umba sanduki ku pavuru he. Oni ki karaga ha, si gá.

⁹Oni ki bi nga ha; si ngia si agá ngba gu gene ndu kuti gaha bangbandarago ku Bete-semese yo, si ngia kina ko tigako namangi rani tie na gi kere gbigbitapai re; ono ka si adú nga wo ya, ani ki ini he ya a nga beko namanga rani te, si ngia pai dũ namanga rani gbua.”

¹⁰Aboro ki mangi wo; ki rogo anaabagara ue i napira mamura ki vodi ra kuti ngbagida, ki kisi awira ku kporo yo.

¹¹I ki moi ga Yekova sanduki ku auru ngbagida, na gu sanduki du na kpia akuri rogo ni dahabu na kpia anangito a.

¹²Si du anaabagara ki ndu ngba gu ruru gene nandu ku Bete-semese yo, ami ki ta ndu ngba gu bagene re nipoi wa ami andu; ka ami aaria nga tira ku kumbabe watadu ku garebe yo a ya, agbia aFereseto ki nipe fuo ra ki da ti bangbanda Bete-semese.

¹³Agu aboro naadu Bete-semese yo i ake gayo nganu ti regboho rogo ngboongboorago; i ki ya ngere ki bi sanduki, rago ki ngba ti yo bakere gbe tipa bi he.

¹⁴Ngbagida ki ye ku rogo gu ati nangia ga Yosua nga boro Bete-semese, ki ru ho. Bakere mbia adu yo; i ki sapu ngua ngbagida, ki tumo na anaabagara ni zozo motumo fu Yekova.

¹⁵ARevi ki zogo ga Yekova sanduki, na gu sanduki nadu pavuru he, nga gu agu akpiaahe ni dahabu adu rogo ho, ki moi he ku auru gu bakere mbia re; aboro Bete-semese ki tumo ni zozo amotumo na kura angbatunga ũmotumo fu Yekova ti kina gu uru re.

¹⁶Ho agu agbia aFereseto bisue re abi he ni, i ki karaga tiyo ku Ekurone yo ni kina gu uru re a.

¹⁷Gere nga pa agu anangito re ni dahabu, nga gu aFereseto afu he ni motuipo tindika fu Yekova: tipa Asedodo si ki du sa, tipa Gaza, sa, tipa Asekerone, sa, tipa Gata, sa, na tipa Ekurone a sa;

¹⁸na gu kpia akuri re ni dahabu, kuti gedigedi abaakporo dunduko nga ga aFereseto nga ga agu agbia bisue re, tipa agu abaakporo ngapa na akporo ringara a. Gu bakere mbia re, i amoi ga Yekova sanduki ku ri he, si du ni dezirepai daku areme rogo gu ati nga ga Yosua boro Bete-semese.

¹⁹Ko ki imi bete aboro Bete-semese, bambiko i angere ku rogo ga Yekova sanduki; ko ki imi aboro wa 70, aboro ki nikpari ni nunga, bambiko Yekova imi aboro ni bakere imo yo.

²⁰Aboro Betesemese ki ya, “Da rengbe ka ru bara bangiri Yekova, nga gu ziazia Mbori? Da ka ko ndu koyo du ni ni ki guari ti rani?”

²¹I ki kedi sunge koyo du aboro Kiriata-yarima ni, ki ya, “AFereseto gasi ga Yekova sanduki berewe. Oni yé kono, ka dia ha koyo fuo roni.”