Read zande 1 SAMUERE 8 Bible Online

1 SAMUERE 8 - zande bible

1 SAMUERE 8

¹Si adu wa gere, ho Samuere agbinza ni, ko ki moi awiriko ni abasapungbanga ku ri aYisaraere.

²Rimo bambata wiriko nangia Yoere, rimo ue ko ki ngia Abiya; i adu ni abasapungbanga Bera-saba yo.

³Ono ka awiriko apeka nga sinoko ya, i asa tiyo sa kina nyemu diangbiti ahe; ki nirogo marã ni mobirimo, ki niirasi sarangbanga.

⁴Ga aYisaraere abaakumba ki dungura tiyo dunduko, ki ye koyo du Samuere ni ku Rama yo,

⁵i ki ya fu ko, “Mo ngére, mo tigamo du ni gbinza ro awere, awiro apeka nga sinoro te; mo mói bakindo awere fu rani ko zogo rani wa kura rikaaboro dunduko.”

⁶Ono gi pai re agberẽ ti Samuere, ho i aya ni, “Mo mói bakindo fu rani ko zogo rani.” Samuere ki kpari fu Yekova.

⁷Yekova ki ya fu Samuere, “Mo gí fugo agu aboro re dunduko nga gu i agumba foro; bambiko i agindiga nga ro te, ono i gindiga kina re, ya ka mi du nga ni bakindo ka zoga yo ya.

⁸Kuti gu mangaapai i amangi dunduko kuti re tona ti gu rago mi akusi yo Ezipeta yo ki da ku areme, ni gu pai i ambu re, ka manga pa kura ambori, kina wo i tigayo amanga ha foro a.

⁹Awere mo dége turo ka gia fugoyo; ono mo ki fugu pai fu yo kakaka, ki yugu sino gu bakindo fu yo nikazoga yo.”

¹⁰Samuere ki gumba agu apai nga ga Yekova dunduko fu agu aboro re nasana ko tipa bakindo.

¹¹Ko ki ya, “Gere nikangia sino gu bakindo nikazoga roni: ko aróga awironi nga akumba, ki ringbisi yo ni gako yo, tipa gako angbagidavura, i ki du ni gako abanduri afarasi, ki nioro barangba gako angbagidavura;

¹²ko asía agu yo i du ni gako abarutirivura ku ri rikaaboro ni ba kutu, agu yo ni abarutirivura ku ri rikaaboro ni ba bisue bawe, ko afú agu yo i nisópo gako bino ki nike ahe ti regboho, agu yo nikataka gako aũvura, na gako aũngbagidavura.

¹³Ko aróga agu awironi nga ade i du ni ambakadi fuõngua ni anagbindi, ni anazoriahe a.

¹⁴Ko aróga gaoni aati bino, na gaoni aati bakakue, na gaoni aati eraya, nga kina boro gu bawene he, ki nifuku he fu gako amoyambu.

¹⁵Ko adía sa dagba bawe nga ga gaoni zende ahe, na ga gaoni aati bakakue, ki nifuku he fu gako abarumbatayo, na fu gako amoyambu a.

¹⁶Ko aróga gaoni amoyambu nga akumba na agu yo nga ade a, na gaoni bawene abagara, na gaoni adongi, ki nimoi ra ti gako sunge.

¹⁷Ko anidi sa dagba bawe nga ga gaoni rimbasa anya, oni tigaoni adú ni gako akanga.

¹⁸Oni akpára ni wawa ni gu rago re be gu gaoni bakindo oni asia ko ni tironi; Yekova akáraga nga pai fu roni ni gu rago te re.”

¹⁹Ono aboro ki ka pa dega tuyo sa fugo Samuere; i ki ya, “Ai! ono ani naida kina bakindo ku ri rani,

²⁰ani tigaani ki du wa kura rikaaboro dunduko, gaani bakindo nizógo rani, ki ningbeku mbata yo fu rani a, ki niso gaani vura.”

²¹Ho Samuere agi ga aboro pai ni dunduko, ko ki gumba ha fu Yekova.

²²Yekova ki ya fu Samuere, “Mo dége turo sa fugoyo, ki moi bakindo fu yo.” Samuere ki ya fu aboro a Yisaraere, “Oni gá ni ba sa sa, gu ni kina ku rogo gani bakporo.”