Read zande 1 SAMUERE 9 Bible Online

1 SAMUERE 9 - zande bible

1 SAMUERE 9

¹Were kumba adu yo nangia ngbatunga Benyamina, rimoko nangia Kisi nangia wiri Abiere, Abiere ki ngia wiri Zerora, Zerora ki ngia wiri Bekorata, Bekorata ki ngia wiri Afia. Kisi adu ni ngbatunga Benyamina, ni nyanyaki boro ni ngangarã ko gbe.

²Ko adu na wiriko, rimoko nangia Saura, ni bawene paranga na wene tamako gbe. Boro adu nga dagba awiri aYisaraere yo ni bawene boro nasusi ko te; ko adu ni gbanga ko ki susi aboro dũ, tona ti pagoko ki da ku ari.

³Ga Kisi anaadongi aingi nangia ba Saura. Kisi ki ya fu Saura nangia wiriko. “Mo dí moyambu sa fuo ro, ki guari, ki ndu ka gbata gimi anaadongi.”

⁴Si du i ki susi rogo ringara abaagangara nga Efuraima, ki kuru rogo gu ringara nga Sarisa, ono ka i abi nga ra yo ya. I ki kuru ku rogo gu ringara nga Sarima, ka ami adu nga yo a ya. I ki kuru ku rogo ringara Benyamina yo, ono ka i abi nga ra yo a ya.

⁵Ho i aye ni ku rogo ringara Zufa, Saura ki ya fu gako moyambu i adu na ko, “Mo yé, ani gá, buba ka he berã pa anaadongi, ki niberẽ kina pa rani.”

⁶Ono moyambu ki ya fu ko. “Mo ngére, kumba rogo gi bakporo re nga ga Mbori kumba, ko nga gu boro i nairisa ko airisa; agu apai dunduko ko nagumba ha si nida ti kina rengo Ani ndú nga koyo awere; ka ngia ko rengbe ka gumba pai fu rani tipa gaani nunguro yo ani andu ku ho ni.”

⁷Saura ki ya fu gako moyambu. “Ono ka ani ndu, gini he ka ani ndu na ni fu gu kumba re? Bambiko kpokuta nyasi du rogo gaani mangu yo, ono gamahe ho ka ani ndu na ni fu ga Mbori kumba te. Gini he du be rani?”

⁸Moyambu ki karaga ha fu Saura berewe, ki ya. “Mo ngére, mi du na sekere feda wa sa rogo biama, gere ka mi fu fu ga Mbori kumba, ko gumba pa gaani gene fu rani.”

⁹Bakuru yo ku ringara aYisaraere yo, ho boro anindu ni ka sana Mbori, ni aniya were, “Mo yé ani ndu koyo du babia pai ni”; bambiko gu ni i aya ti ni awere nebi, i aniya ti ni mbata wẽ, babiapai.

¹⁰Saura ki ya fu gako moyambu, “Mo gumba ha wenengaĩ; mo ye, ani ndu.” Si du i ki ndu ku rogo gu bakporo, yo ga Mbori kumba adu ni.

¹¹Wai i mbiti gangara ku bakporo yo, i ki bi paranga ade nakuruka ndu ka tu ime, i kiya fu yo, “Babiapai ere?”

¹²I ki karaga ha fu yo, ki ya, “Ko kina erẽ; oni ngere, ko du mbata yo re. Oni ipisi tironi awere; bambiko ko niye areme ku bakporo no, bambiko aboro ndu na motumo areme rogo tumbatumba rago yo.

¹³Wa oni ka da ku bakporo yo mbembedi, oni abi ko ni ba sa, mbata ko nikabita ku ri tumbatumba rago yo ka ri riahe; aboro ari nga he te daho ko ka ye ni, bambiko ko tingako nifu maku ku ri motumo; fuo gure agu aboro i ayambu yo i nikari riahe. Si du oni biti awere, bambito ti gi saa re oni ka bi ko.”

¹⁴I ki ndu ku bakporo yo. Wa i arimi ku bakporo yo, i abi Samuere ko niye koyo du yo ni, ngba gene bita ku ri tumbatumba rago yo.

¹⁵Were Yekova aima yugo pai fu Samuere ti gu uru mbata Saura nikada; ki ya,

¹⁶“Gba ti saa wa gere mi akéda kumba koyo du mo ni naye ringara Benyamina yo, mo ki mbedi ko ni nzeme, ko dú ni bazogo ku ri gimi aboro aYisaraere. Ko nikabatasa gimi aboro be aFereseto; bambiko mi bi gu rungosiro nga ga gimi aboro, bambiko gayo kpe da kono du mi ni.”

¹⁷Ho Samuere abi Saura ni, Yekova ki ya fu ko. “Mo ngére, gu kumba du re mi agumba pa ko foro! Ko nga gu ko nikazoga gimi aboro.”

¹⁸Saura ki mbedi koyo du Samuere ni ti ngbadimo bakporo, ki ya. “Mi nakpara foro, mo gúmba nga ha fere, wari du ga babiapai kporo ni?”

¹⁹Samuere ki karaga ha fu Saura, ki ya, “Mi nga babiapai; mo ngbé mbata yo fere ku ri tumbatumba rago yo, bambiko ani arí he na oni areme, gba wiso mi ki idi he foro mo ga, mi ki gumba agu apai foro dunduko nga gu du rogo ga berã.

²⁰Were tipa gamo anaadongi naingi rame biata susi, ka mo báki nga bangiro tipa ra ya, bambiko i bi ra. Da tie du ga aYisaraere kpinyemuse tipa ni dunduko? A nga kina ro du, na ngbatunga bamo du, te?”

²¹Saura ki karaga ha ki ya. “A nga ngbatunga Benyamina nga mi, nga gu umba rika dagba aYisaraere no, te? rikarani ki du ni kina umba ha dagba angbatunga Benyamina yo, te? Wa du he wo, tipagine tie gumba mo pai ti ni fere were?”

²²Samuere ki di aSaura na gako moyambu, ki ye na yo ku bambu agino yo, ki moi yo i sungu auru gu ba du ni irisiirisi he dagba agu yo yo i ayambu yo, nga agu yo nadu wa aboro 30.

²³Samuere ki ya fu bagbindiriahe wẽ, “Mo yé na gu, bete pasio nga gu mi nifu he foro nga gu mi aya foro, ‘Mo ígi he.’ ”

²⁴Si du bagbindiriahe adi mboso nya na gu nadu auru he, ki moi he barangba Saura; Samuere Ki ya, “Mo ngére, gu i nibanda ha, i moi he barangba ro. Mo rí he; bambiko i nibanda ha tipa ringbisiringbisi rago tipa, ro, mo rí he na agu yo mi niyambu yo.” Si du aSaura ki ri riahe na Samuere ni gu uru re.

²⁵Ho, i azorõ ni ri tumbatumba rago yo ku bakporo yo, Samuere ki fura na Saura ri bambu yo, yo i amoi aira ni tipa yo.

²⁶I ki zingi kina boro ngbatutu wiso, Samuere, ki yambu Saura ku ri bambu yo, ki ya, “Mo gúari, mi ásia ro.” Saura ki guari i ki mongo kuru ku zegi yo ue, ko na Samuere.

²⁷Wa i andu i ki da ti digida bakporo, Samuere ki ya fu Saura, “Mo gúmba ha fu ga moyambu ko susi ku mbata yo, ho ko ka susa ni ku mbata yo, mo ki ru zaa mbataono ngbutuko, mi yúgu sangba Mbori foro.”