Read zemba Mateus 11 Bible Online

Mateus 11 - zemba bible

Mateus 11

¹Iya Jesus hiaa mana okuheela ovalongwa ve omulongo navavali ovitumino hembi, wa dha po mpoka, ha ka longa, ye ha ka teetha modhondolopa dhawo.

²Iya Johannes mokaliwoso hiaa tee ovilinga vyaKristus, wa tuma ko ovalongwa ve, ve ke mu pule va tyee:

³“Ngukwa tiwa me ya, oove ne ngatu kevelele umo?”

⁴Iya Jesus we ve yaka ha tyaa: “Enden̯i mu ka hipululile Johannes mbimwa tee nambimwa mono okutya

⁵ovapot̯i va twikuluka, ovilema mavi ende, owovilundu va veluka, odhompolo dha thituluka, ovat̯e mava imunwa kout̯e, ovathona mava teethelwa ondaka ombwa.

⁶Iya omunalao onguhama ndimbililwa.”

⁷Iya ovalongwa vaJohannes hiva dhi po, Jesus wa uta okuhipululila owingi wovantu ouhunga naJohannes ha tyaa: “Mokuti mwa ile oku ka tala tji? Onenge ndjimai pukwapukwa kombepo?

⁸Iya mwa ka talele tji? Mwa ka talele omulumentu ngwaa dhala omidhalo omiwa vyomalesu? Taa tuutuu, mbava dhala omidhalo omiwa vyomalesu, va kala modhombala dhodhohamba.

⁹Iya mwa ka talele tji? Mwa ka talele omuprofeti? Iinga, me mu heele okutya ye wa pon̯a omuprofeti.

¹⁰Oye e li ye hengu ngwaa tiwaa: ‘Taa tuutuu, ame me ka tuma ontumwa yandje, nguma tenge, ye ngoka ngume ke ku longekedhela ondjila, tainkolo ove hóye ya.’

¹¹Me mu heele otjatjili okutya movantu mbava yumukwa kovakadhintu kamu na tja omunene ngwaa pon̯a Johannes Omutjatji, iya omununu kovakwawo avehe motjilongo tjeulu oye e mu pon̯a.

¹²Iya okudha pomatango aJohannes Omutjatji katee napano, otjilongo tjeulu tja monethwa ovihuna, tji kondjethwa okuhitwa kodhonkono.

¹³Iya nomathimbilo aehe ovaprofeti noveta vya hulila muJohannes Omutjatji.

¹⁴Iya andaa mamu hala oku tji itavela, oye e li Elia, omuprofeti ngwaa thimbilwa okutya me ya.

¹⁵Nguu na omatwi, nga tyee!

¹⁶“Iya ekula hendi me li yeleke natji? Li ngala odhondele mbava kala pohi pomalandethelo, amave liwololoka,

¹⁷hava tyaa: ‘Twe mu hakelele, n̯e kamu dhanene. Twa lili ngambatu li momukoti, n̯e kamu lilile.’

¹⁸Iya Johannes hiee ya, ka lile, ye ka nwine, wo hava tyaa: ‘U na ondemoni.’

¹⁹Omuna wOmuntu hiee ya, wa lya, ye ha nu, wo hava tyaa: ‘Taa tuutuu ngwaa tunda, onkolwe, epanga lyovathendelethi novalundhi.’ Iya ounongo waKalunga wa holololwa kovilinga vye.”

²⁰Iya Jesus wa uta okutangunitha odhondolopa mumwa ningilwa ovilingankono vye ovingi, mena lyokutya kave liteyululile.

²¹“Utatyei, ove Korasin! Utatyei, ove Betsaida! Iya ngaile moTiro nomoSidon omo mwa ningilwa ovilingankono mbyoka mbyaa ningilwa moyen̯i, mbenya ngai ve liteyulula ae lukulu, hava kala pohi modhosaku nomomuto.[7]

²²Iya me mu heele okutya Tiro naSidon mavi ka kala hahe oku mu pon̯a metango ndyoka lyekoyo.

²³Naove, Kapernaum, mo tya pamo mo ka yelelwa meulu? Mo ka thothononenwa motjovat̯e. Iya ngaile moSodom omo mwa ningilwa ovilingankono mbyoka mbyaa ningilwa moyen̯i, ngai hinya katee ndino opo tji li.

²⁴Iya me mu heele okutya otjilongo tjaSodom matji ka kala hahe oku mu pon̯a metango ndyoka lyekoyo.”

²⁵Potembu ndjoka Jesus wa yaka ha tyaa: “Taa, Muhona weulu nowohi, me ku hivilike, mena lyokutya ovipuka hembi we vi holeka ovanongo novanadhondunge, ho vi holololele mboka mbava ngala odhondele.

²⁶Iinga, Taa, hehi otjo tje ku thevelwa.

²⁷“Ovipuka avihe mbe vi pewa kuTate. Kaku na tja nguu i Omuna kakele vala kaTate, ko kaku na tja nguu i Tate kakele vala kOmuna, nangoka Omuna nguma hala oku mu holololela ye.

²⁸“Indjen̯i kwaame amuhe mbamwe ulwa nambamwa tjinda omitenge mbyaa lema. Ame me mu thuvitha.

²⁹Litween̯i okanga yandje, n̯e mu holele kwaame, mena lyokutya ndjimuntu omuwa, momutima mbe linunupika, nomienyo vyen̯i mavi ka thuva.

³⁰Iya okanga yandje wa puvala, nomutenge wandje kau lemene.”