Read zemba Mateus 16 Bible Online

Mateus 16 - zemba bible

Mateus 16

¹Iya Ovafarisai nOvasadukai ve ya kuJesus oku mu lola, ve mu pula, e ve yulikile etangan̯eko ndimali dhi meulu.

²Iya ye we ve yaka ha tyaa: “Okawiiwii aka wile pohi mu popya amamu tyaa: ‘Kaku natja ombula, mena lyokutya eulu lya thilaele,’

³komuhuka hamu tyaa: ‘Ndino maku ya ombula yongandavila, mena lyokutya eulu lya thilaele, ko ku na omakaka omandholodhi.’ Mu tji i vala okutangan̯eka himatji ya keulu, atjaa omatangan̯eko omaluvedhe kamu e koneke.

⁴Kula n̯e evi, ovayoni wolukupo, mamu taendha etangan̯eko, iya kaamu pewa etangan̯eko limo, olyo ndyoka vala olyaJona.” Jesus we ve thiaa po ha i.

⁵Ovalongwa hiva yauka tjikoohinya, va dhimba okuya nomingome.

⁶Iya Jesus we ve heela ha tyaa: “Lungamen̯i, n̯e mu tale nawa ontathi yOvafarisai noyOvasadukai.”

⁷Wo ve lipula hava tyaa: “Ngweendele okuhatu dhile nomingome.”

⁸Iya Jesus wa iwa omalipulo awo, ha tyaa: “Vantu n̯e wokaitavelo okanunu omena lyatji mamu popi okutya kamu na tja omingome?

⁹Nan̯i nanapano kamu yuvite? Kaamu thipaluka omingome mbinya vitano mbimba pele ovantu omayovi atano, mwa ongedhele odhombwe ngapi dhambyaa hupile po?

¹⁰Ne omingome hembinya epanduvali mbimba pele ovantu omayovi ane, mwa ongedhele odhombwe ngapi dhambyaa hupile po?

¹¹Omena lyatji hihamu yuvite okutya ame híme popi ouhunga nomingome? Iya lungamenen̯i ontathi yOvafarisai noyOvasadukai!”

¹²Kon̯ima ovalongwa va ka tyaa nawa okutya Jesus ka tile, ngava lungamene ontathi yomingome, nan̯i wa li ama tya ngava lungamene elongo lyOvafarisai nOvasadukai.

¹³Iya Jesus hiee ya motjit̯indwalongo tjaKesarea-Filippi, wa pula ovalongwa ve ha tyaa: “Ovantu va tya Omuna wOmuntu aan̯i?”

¹⁴Ovalongwa ve mu yaka hava tyaa: “Ovantu vamo va tya oJohannes Omutjatji, iya vamo va tya oElia, navamo uke va tya oJeremia, ne yuumo owomovaprofeti.”

¹⁵Ye we ve pula ha tyaa: “Iya n̯e mu ntya, aame an̯i?”

¹⁶Simon Petrus we mu yaka ha tyaa: “Oove Messias, OmunwaKalunga omunamwenyo.”

¹⁷Jesus we mu yaka ha tyaa: “Simon yaJona, umunalao, mena lyokutya hamuntu e ku holololele soka, iya oTate nguu li meulu.

¹⁸Iya me ku heele wo okutya oove Petrus, kewe hendi oko me ka tungila eongalo lyandje, net̯o kaali ka kala nodhonkono okupon̯a eongalo lyandje.

¹⁹Iya me ke ku pa odhosapi dhotjilongo tjeulu, atjihe himo kutu kombanda yohi, nomeulu matji ka kutwa, himo kutulula kombanda yohi, nomeulu matji ka kutululwa.”

²⁰Iya wa ilikin̯a ovalongwa ve okutya háva heele omuntu noumo okutya ye oye e li Messias.

²¹Okudha mpoka Jesus wa uta okuthitululila ovalongwa ve okutya u tha okuya koJerusalem, a ka tatethwe omatatetho omengi kovanene nokovayambethi ovanene nokovalongiveta. Ye ma ka dhipawa, iya etango etyatatu ma ka imunwa kout̯e.

²²Iya Petrus we mu n̯anga, he mu twala pokampengi, ha utu oku mu anda, ha tyaa: “Muhona, Kalunga me tji tjaele, ovipuka hembi koo vi ningilwa.”

²³Iya Jesus wa piluluka, ha heele Petrus ha tyaa: “Satana, dha po pwaame! Ove mo mpa oluvinda, mena lyokutya koo soko ovipuka vyaKalunga, iya nan̯i mo soko ovipuka vyountu.”

²⁴Iya Jesus wa heela ovalongwa ve ha tyaa: “Andaa pe na nguma hala okundandula, nge lidhimbe ye omwene, ye a tjinde omutjaakano we, a ndandule.

²⁵Iya nguma hala okuhupitha omwenyo we, me u keketha, iya nguma keketha omwenyo we mena lyandje, me u mono.

²⁶Matji popile tji omuntu okutumba ouye auhe, ye ha keketha omwenyo we? Ne omuntu ma yandja tji mpaeli, a yowole omwenyo we?

²⁷Iya Omuna wOmuntu me ke ya metumbalo lyaIhe pamo novaengeli ve. Ye ma ka thuta omuntu auhe hitji lithike povilinga vye.

²⁸Ame me mu heele otjatjili okutya pe na vamo muhemba mbava kulama hempa mbahamava lolo et̯o, tainkolo háveya mona Omuna wOmuntu, ame ya notjilongo tje.”