Read zemba Mateus 17 Bible Online

Mateus 17 - zemba bible

Mateus 17

¹Iya kon̯ima yomatango epandu Jesus wa itha po Petrus naJakob nomunitje Johannes, he ve twala kondundu onde, ve ke likalele.

²Olupe lwe lwa lunduluka movipathi vyawo. Otjipala tje tja laima ngetango, omidhalo vye vya pembana ngotjiten̯i.

³Iya ve liholololelwa kuMoses naElia, hava popi naJesus.

⁴Petrus wa heela Jesus ha tyaa: “Muhona, hempa opopawa nokukala. Andaa mo hala, me tungu po omasase atatu, limo olyoye, limo olyaMoses nalimo olyaElia.”

⁵Petrus tainkolo a li ama popi, pe ya ekaka ndimali laima, hali ve tjikile. Mekaka mwa dha ondaka hai tyaa: “Nguka Omunwandje omuhivilikwa, ngumba hopa, mu tyeen̯i.”

⁶Iya ovalongwa hiva tee ondaka ndjoka, va li ava tila unene, have lit̯imike po ovipala vyawo.

⁷Iya Jesus we ya kuwo, he ve t̯in̯i, ha tyaa: “Imuken̯i po, hámu tila.”

⁸Hiva yele omeho awo, kave na nguva mona po, kakele vala kaJesus aika.

⁹Iya hiva li amava heluka kondundu, Jesus we ve ilikin̯a, ha tyaa: “Emoneko hendi hámu li heele omuntu nokanunu, tainkolo Omuna wOmuntu héya imunwa kout̯e.”

¹⁰Iya ovalongwa ve mu pula hava tyaa: “Omena lyatji ovalongiveta hiva tya, Elia oye a thele okuya olutenga?”

¹¹Jesus we ve yaka ha tyaa: “Iinga, Elia me ya, ha twaa ovipuka avihe pomalukalo.

¹²Iya me mu heele okutya Elia we ya ae lukulu, atjaa kave mu konekele, ve mu ninga ngahi mava hala, Omuna wOmuntu otjo ma ka tatethwa kuwo.”

¹³Ovalongwa va tyaa okutya me ve heele ouhunga naJohannes Omutjatji.

¹⁴Iya hiva tjuna kowingi wovantu, omulumentu umo we ya kuJesus, ha twike odhongolo kotjipala tje,

¹⁵ha tyaa: “Muhona, t̯ila omunwandje omudhantu onkenda, u na ovintonya, mavi mu tatetha unene, mena lyokutya otwingi u wila momulilo nomomeva.

¹⁶Iya mbe mu eta kovalongwa woye, atjaa va anyenwa oku mu velula.”

¹⁷Jesus we ve yaka ha tyaa: “O, kula n̯e mbahamu na tja eitavelo, n̯e mbahamu tee. Me kala nan̯e katee nalun̯i? Me kala ame likambulithile n̯e katee nalun̯i? Mu eten̯i huno kwaame.”

¹⁸Jesus wa anda ondemoni, ondemoni hai dhi mo mondele, ondele wa veluka powola yatjo ndjoka.

¹⁹Iya ovalongwa ve ya kuJesus pokampengi, hava tyaa: “Omena lyatji twa anyenwa oku i ta mo?”

²⁰Jesus we ve yaka ha tyaa: “Omena lyokaitavelo ken̯i okanunu. Iya me mu heele otjatjili okutya ngaile mu na eitavelo ndii lithike pombuto yotjitho tjosinapi, ngai mamu heele ondundu hendji hamu tyaa: ‘Hontoloka po hempa, enda hehwii,’ ngai mai lihontolola po, kape na tja himatji mu anyene.

²¹Iya ombepo hendji ombi kai tewa mo kotjipuka tjimo, i tewa mo vala kealikano nokokulitjaela ovikulya.”

²²Jesus novalongwa ve hive ya pamo moGalilea, we ve heela ha tyaa: “Omuna wOmuntu ma ka yandjwa momawoko ovantu,

²³mave ke mu dhipaa, iya metango etyatatu ma ka imunwa kout̯e.” Iya ovalongwa va etetha onkenda unene.

²⁴Iya ovalongwa hive ya moKapernaum, ovaongi wodhombongo dhotempeli ve ya kuPetrus, hava tyaa: “Omulongethi wen̯i ka thutu odhombongo dhotempeli?”

²⁵Petrus we mu yaka ha tyaa: “Aai, u thuta.” Iya Petrus hiee ya monganda, Jesus wa tenga oku mu pula ha tyaa: “Simon, mo tya vi? Odhohamba dhokombanda yohi dhi pula kowaan̯i othuto nelilimo? Okovana ne okodhongendi?”

²⁶Petrus wa yaka ha tyaa: “Okodhongendi.” Jesus we mu heela ha tyaa: “Iya ovana kava thutu.

²⁷Iya opo hátu ve yumanetha, enda kelunga, u ka yumbe ondjolo. Ohi ndjimo kambula olutenga, awe i yuhamuna, mo vadha mo ombongo yotjisilveri. I itha mo, u ye, u ve pe yo, i ninge elilimo lyetu naove.”