Read zemba Mateus 18 Bible Online

Mateus 18 - zemba bible

Mateus 18

¹Iya powola yatjo ndjoka ovalongwa ve ya kuJesus, hava tyaa: “Omunene ngwaa pon̯a ovakwawo motjilongo tjeulu aan̯i?”

²Jesus wa ithana okalele, he ke kulametha mokati kawo,

³ha tyaa: “Ame me mu heele otjatjili okutya andaa kaamu liteyulula, hamu ngala oulele, kaamu ka ya motjilongo tjeulu.

⁴Iya mena lyanyahoka ngume linunupike ngokalele, oye e li omunene okupon̯a ovakwawo motjilongo tjeulu.

⁵Nguma tambula okalele ngaheha mena lyandje, oye ma ntambula.

⁶“Iya nguma tyoletha omuntu umo owomovanunu mboka mbava ndjitavela, we thewa okukutilwa ekunkwa mothingo, ye ha yumbwa meiva lyelunga.

⁷Utatyei ouye mena lyomatyoletho! Iya omatyoletho a tha okuya, atjaa utatyei omuntu ngoka ngume e eta!

⁸“Iya okuwoko kwoye ne ompadhi yoye, andaa mai ku tyoletha, i teta ko, ove u i yekelehi. Okuya momwenyo au li otjingolomena ne otjilema hahe, hatjo ngokukala nomawoko avali ne odhompadhi mbali, ove ho yumbwa momulilo waapehe.

⁹Iya eho lyoye andaa mali ku tyoletha, li dhoola mo, ove u li yekelehi. Okuya momwenyo au na eho limo hahe, hatjo ngokukala nomeho avali, ove ho yumbwa momulilo woheli.

¹⁰“Talen̯i, hámu tombo omuntu noumo owomountu hembu oununu. Iya me mu heele okutya ovaengeli vawo meulu apehe va tala otjipala tjaTate meulu.

¹¹Iya Omuna wOmuntu we ya okuhupitha mbava keka.

¹²“Mamu soko tji? Andaa pe na omuntu nguu na odhondhu ethele limo, iya imo hai keka, kaa thii po ndhoka omilongo omoovi nomoovi modhondundu, ye ha ka taendha ndjaa keka?

¹³Iya andaa we i mono, me mu heele otjatjili okutya me i hulukilwa okupon̯a ndhoka omilongo omoovi nomoovi ndhihadhi kekele.

¹⁴Iya hehi hahalo lyaIho owomeulu okutya pa keke omuntu umo owomuhembu oununu.

¹⁵“Iya omukwen̯i andaa we ku ningi navi, enda ko, u ke mu pukulule amu li amweevali. Iya andaa we ku tee, okutya wa popile omukwen̯i.

¹⁶Iya andaa kee ku tee, ka ithane uke umo ne vavali, opo otjipuka atjihe tji kalelwe po kodhombangi mbali ne ndatu.

¹⁷Iya andaa kee ve tee, tji heela eongalo. Andaa neongalo kee li tee, mu tala ngomupaani ne omuthendelethi.

¹⁸“Me mu heele otjatjili okutya himamu kutu kombanda yohi, nomeulu matji kutwa, nahimamu kutulula kombanda yohi, matji kala atja kutululwa nomeulu.

¹⁹“Me mu heele otjatjili okutya andaa vavali mun̯e kombanda yohi ve litee motjipuka himava kumbu, mave tji pewa kuTate owomeulu.

²⁰Iya mpape na vavali navatatu ava ongana mena lyandje, ame me kala mokati kawo.”

²¹Petrus we ya kuJesus ha tyaa: “Muhona, omukwetu ngwaa ndingi navi mba thele oku mu ithila po ovikando vingapi? Ovikando epanduvali?”

²²Jesus we mu yaka ha tyaa: “Ame híme ku heele okutya omukwen̯i mu ithila po ovikando epanduvali, iya omilongo epanduvali twepanduvali.

²³Iya otjilongo tjeulu tji ngala omulumentu ohamba nguma hala okuhava odhongele dhovapika vayo.

²⁴Hiaa utu okuhava, wa etelwa po umo nguu na odhongele, odhombongo dhotjingoldo omayovi omulongo.

²⁵Iya hiaa li ahe na hime mu thutu, omuhona we wa yandja elaka okutya nga landethwe po pamo nomukadhe novana notjipuka atjihe hiaa vadhwa natjo, odhongele dhe dhi thutwe,

²⁶iya omupika wa twika odhongolo kotjipala tje ha tyaa: ‘Nt̯ila ndje onkenda, me ke ku thuta ovipuka avihe.’

²⁷Iya omuhona wa t̯ila omupika ngoka onkenda. Odhongele dhe ke mu pulile dho uke, we mu yetha.

²⁸“Iya omupika ngoka hiaa i pondje, wa mona omupika omukwawo, ngwee mu lila ongele yodhondenari ethele limo. We mu lombokela pothingo, ha tyaa: ‘Thuta ongele yandje.’

²⁹Iya omupika ngoka omukwawo wa twika odhongolo, he mu kumbu ha tyaa: ‘Nt̯ila ndje onkenda, me ke ku thuta.’

³⁰Iya ngunya kaa li ama hala oku mu yetha. We mu twala mokaliwoso katee a thutu odhongele dhe ndhaa lya.

³¹Iya ovapika ovakwawo hiva mono soka hitja ningwa, va li ave yuvite navi unene. Va ka hipululila omuhona wawo ovipuka avihe mbyaa undapwa.

³²Iya omuhona we we mu ithana ha tyaa: ‘Mupika ove omuvi, odhongele dhoye adhihe mbe dhi yetha, hiwa ndjayela.

³³Ove nan̯i kuwa thele wo okut̯ila onkenda omupika omukwen̯i, ngaame himbe ku t̯ile onkenda?’

³⁴Iya omuhona wa li aa yumana unene, he mu yandja, a twalwe mokaliwoso katee ma thutu odhongele dhe adhihe ndhaa lya.

³⁵“Iya Tate owomeulu otjo me mu ningi wo nyahoka andaa kaamu ithile po ovakwen̯i nomitima vyen̯i.”