Read zemba Mateus 19 Bible Online

Mateus 19 - zemba bible

Mateus 19

¹Jesus hiaa mana okupopya ovipuka hembi, wa dha koGalilea, ha i kotjit̯indwalongo tjaJudea tjikoohehinya tjaJordan.

²Engundwa enene lyovantu lye mu landula, iya ye oko e ve velulila hoka.

³Ovafarisai vamo ve ya kuJesus oku mu lola, ve mu pula hava tyaa: “Tja itavelwa tuu omulumentu okuyala omukadhintu we, ape na otjipuka hitji li po?”

⁴Iya ye we ve yaka ha tyaa: “Nan̯i kamu tangele okutya okudha pomautilo Omuuti we ve uta omulumentu nomukadhintu?

⁵Iya nyahoka matji tya omulumentu ma ka thiaa po ina naihe,[8] he ke likuta komukadhintu we, iya hemba vavali mava ile omuntu umo.

⁶Iya kaava kala uke vavali, iya omuntu umo. Iya Kalunga soka hiaa twaa kumo, hátji ithwa kumo komuntu.”

⁷Wo ve mu pula hava tyaa: “Iya omena lyatji Moses hiee tu heela okutya omulumentu nga yandje omukanda wokuliyala, e mu yale?”

⁸Jesus we ve yaka ha tyaa: “Iya Moses we mu itavela mu yale ovakadhintu ven̯i, mena lyokutya omitima vyen̯i omikukutu. Iya tjo hatjo tja li nyahoka okudha pomautilo.

⁹Iya ame me mu heele okutya nguma yala omukadhintu we, hihatji thi mena lyovihulo, atjaa ye ha kupu umo, ma i movihulo.”

¹⁰Ovalongwa ve ve mu heela hava tyaa: “Nan̯i andaa olukupo otjo lu li nyahoka, hahe ahamaku likupwa.”

¹¹Jesus we ve heela ha tyaa: “Hamuntu auhe e yuvite odhondaka hendhi, iya owomboka vala mbave tji pewa.

¹²Ovantu vamo otjo va yumukwa, kava kupu, vamo va thonwa kovakwawo. Vamo kava kupu, opo va undapele Kalunga nawa. Nguu tji yuvite, nge tji ninge.”

¹³Iya oulele wa etwa kuJesus, e u tendeke omawoko, ye e u kumbile. Iya ovalongwa va tjaela mboka mbava li amava eta oulele.

¹⁴Iya Jesus we ve heela ha tyaa: “Yethen̯i oulele, u ye kwaame, hámu u tjaele, mena lyokutya otjilongo tjeulu otjovantu mbava ngala oulele hembu.”

¹⁵We u tendeka omawoko, tjau ha dhi po.

¹⁶Iya taa tuutuu, etele limo lye ya kuJesus, hali tyaa: “Mulongethi, mba thele okuninga tji otjiwa, ndji mone omwenyo waapehe?”

¹⁷Jesus we mu yaka ha tyaa: “Omena lyatji mo mpula okutya otjiwa otjitji? Omuwa yuumo vala. Iya andaa mo hala okuya momwenyo, takametha ovitumino.”

¹⁸Etele lye mu pula hali tyaa: “Ovitumino ovin̯i?” Jesus we mu yaka ha tyaa: “Hoovyombi: Hó dhipaa, hó yono olukupo, hó vaka, hó kuminine,

¹⁹tumbaleka iho nanyoko, kala au hole omukwen̯i ngahi u lihole omwene.”

²⁰Etele lya heela Jesus hali tyaa: “Ovipuka avihe hembi mbe vi takametha. Otjitji uke himba kambetha?”

²¹Jesus we mu yaka ha tyaa: “Andaa mo hala okukala awe lihu po nawa, enda, u ka landethe po emona lyoye, u li yandje kovathona, iya ove u kale nemona meulu, tjau ove u ye, u ndandule.”

²²Etele hilya tee odhondaka ndhoka, lya dha po alya etetha onkenda, mena lyokutya lya li nemona en̯ingi.

²³Iya Jesus wa heela ovalongwa ve ha tyaa: “Ame me mu heele otjatjili okutya omuhona u na oudheu okuya motjilongo tjeulu.

²⁴Me mu heele uke okutya ongamelu okupitila meyulu lyonguya otjipu okupon̯a omuhona okuya motjilongo tjaKalunga.”

²⁵Ovalongwa hiva tee odhondaka ndhoka, va li ave kumwa unene, hava tyaa: “Iya nan̯i nguma ulu okuhupithwa aan̯i?”

²⁶Jesus we ve tala, he ve heele ha tyaa: “Komuntu kaatji tjiiwa, iya kuKalunga ovipuka avihe vi tjiiwa.”

²⁷Petrus wa yaka Jesus ha tyaa: “Taa tuutuu, nt̯e twa thiaa po ovipuka avihe, hatu ku landula. Matu ka pewa tji?”

²⁸Jesus we ve heela ha tyaa: “Ame me mu heele otjatjili okutya Omuna wOmuntu hima ka kala pohi kotjipunditumino tjetumbalo lye mouye mbumau ya, nan̯e wo mbamwa ndandula mamu ka kala pohi kovipunditumino omulongo navivali okukoya omaanda omulongo naavali aIsrael.

²⁹Auhe ngwaa thiaa po onganda ne ovanitje novakulwe ovadhantu ne odhompandje ne ihe ne ina ne ovana ne ovyana mena lyandje, me ke vi pewa twethele, nomwenyo waapehe me ke u pingana.

³⁰Iya ovantu ovengi napano mbave li owolutenga, mava ka kala owokon̯ima, ovengi mbave li owokon̯ima, mava ka kala owolutenga.