Read zemba Mateus 2 Bible Online

Mateus 2 - zemba bible

Mateus 2

¹Iya Jesus hiaa yumukilwa moBetlehem moJudea potembu yohamba Herodes, ovanongo wokoutjilo[2] ve ya koJerusalem,

²hava tyaa: “Ohamba yOvajuda ndjaa yumukwa napano i li pi? Onyothi ye twe i mono hiya tumbu koutjilo, twe ya okuliyongamena kuye.”

³Ohamba Herodes hiee tji tee, wa li aa tila, nOvajerusalema wo avehe va li ava tila.

⁴Wa ongedha ovayambethi ovanene avehe novalongiveta, he ve pula okutya Messias ma ka yumukilwa pi.

⁵Iya ve mu heela hava tyaa: “Ma yumukilwa moBetlehem motjilongo tjaJudea ngahi tja sonekwa komuprofeti, hikwa tiwaa:

⁶‘Naove wo Betlehem motjilongo tjaJuda haove otjinunu mokati kovatumini womoJuda, mena lyokutya mwoove mamu dhi omutumini nguma ka litha ovantu vandje Ovaisraeli.’ ”

⁷Iya Herodes wa ithana ovanongo meholamo, he ve pula nawanawa okutya onyothi ndjoka ye ya potembu patji.

⁸Iya we ve tuma koBetlehem, ha tyaa: “Enden̯i mu ka taendhe ondele, iya andaa mwe mu mono, indjen̯i mu ntjeele, naame wo ndji ye, ndji ke liyongamene kuye.”

⁹Ovanongo wokoutjilo hiva tee odhondaka ndhoka dhohamba Herodes, va ya. Onyothi ndjoka ndjiva mona koutjilo, ye ve kambulila komeho katee ye thiki kombanda yonganda moka mumwa li ondele, tjau hai kulama.

¹⁰Iya hiva mono onyothi, va li ave hulukwa unene nodhonkono.

¹¹Va ya monganda, hava mono mo ondele naina Maria. Va twika odhongolo, have liyongamene kondele. Va itha mo ovimbundu vyawo, have mu pa otjingoldo novidhimba oviwa nomira.

¹²Kalunga hiee ve londola mondjodhi okutya ahamava tjuna uke kuHerodes, va ya nondjila imo yokuya kotjilongo tjawo.

¹³Ovanongo wokoutjilo[3] hiva i, omweengeli waMuhona we liholololela Josef mondjodhi, ha tyaa: “Kulama, itha ondele naina, u ka inkolele koEgipiti, u ka kale hoka katee me ke ku heela, mena lyokutya Herodes u li po ama soko okutaendha ondele, e mu dhipae.”

¹⁴Josef wa kulama, ha itha ondele naina out̯iku, ha i koEgipiti.

¹⁵Oko a kala katee ket̯o lyaHerodes, opo odhondaka dhi hwithilwe po, Muhona ndhaa popya okupitila motjinyo tjomuprofeti hima tyaa: “Omunwandje mbe mu ithana moEgipiti.”

¹⁶Herodes hiaa mono okutya ovanongo ve mu henuka, wa li aa yumana navi. Wa tuma koBetlehem nomoulongo watjo auhe, ha dhipaetha odhondele ovadhantu avehe okudha kodhombula mbali okutjuna pohi, ngahi a yeleka omatango hengenya ngaa pulile ovanongo.

¹⁷Iya odhondaka dhomuprofeti Jeremia dha hwithilwa po, hiaa popya ha tyaa:

¹⁸“Ondaka mai teeka moRama, otjililo otjinene tjomukoti. Rakel ma lili odhondele dhe, ye kaa hala okunyimithwa, mena lyokutya odhondele dhe kave po uke.”

¹⁹Iya Herodes hiaa t̯i, omweengeli waMuhona we liholololela Josef mondjodhi moEgipiti,

²⁰ha tyaa: “Kulama, itha ondele naina, enda kotjilongo tjaIsrael, mena lyokutya mbenya mbava li amava hala omwenyo wondele, va t̯a.”

²¹Iya wa kulama, ha itha ondele naina, ha i kotjilongo tjaIsrael.

²²Iya Josef hiaa tee okutya Arkelaus oye a vyaala Judea poluvedhe lwaihe Herodes, wa li ama tila okuya ko. Wa ya kotjilongo tjaGalilea ngahi a londolwa kuKalunga mondjodhi.

²³We ya okukala mondolopa ndjii tiwa oNasaret, hitja popiwa kovaprofeti tji hwithilwe po, hiva popya hava tyaa: “Ye ma ka ithanwa Omunasareta.”