Read zemba Mateus 27 Bible Online

Mateus 27 - zemba bible

Mateus 27

¹Iya omuhuka omunene hikwa tji, ovayambethi ovanene avehe novanene wotjiwan̯a va ongana okutompola ouhunga naJesus, opo ve mu dhipae.

²Ve mu kuta, have mu itha po, have mu yandja kuPilatus, omutumini wotjilongo.

³Iya Judas, omuweleleki wa Jesus, hiaa mono okutya Jesus ma koywa, we liteyulula, ha tjun̯a odhombongo omilongo vitatu dhotjisilveri[17] kovayambethi ovanene nokovanene,

⁴ha tyaa: “Ame mba lundha, himba weleleke ombindhi ndjihai na tja ombedhi.” Mbenya ve mu yaka hava tyaa: “Tu na tji naove? Lipopila omwene!”

⁵Judas wa yekelahi odhombongo dhotjisilveri motempeli, ha dhi mo, he ke likuta.

⁶Ovayambethi ovanene va nyanga po odhombongo dhotjisilveri, hava tyaa: “Ndhika kaadhi ulu okutuwa modhombongo dhotempeli, mena lyokutya othuto yombindhi.”

⁷Iya va tompola, have dhi landa otjana tjomume wodhombiya, tji ninge oluvedhe lwokupaka odhongendi.

⁸Iya otjana soka tee kundino hendi tji tiwa otjana tjombindhi.

⁹Iya tja hwithilwa po soka hitja popiwa komuprofeti Jeremia, hiaa popya ha tyaa: “Va tambula odhombongo omilongo vitatu dhotjisilveri, othuto yomuntu ngwaa yelekwa, ngahi ve mu yeleka novanwaIsrael.

¹⁰Iya ve dhi yandja kotjana tjomume wodhombiya, Muhona ngahi a ntjeela.”

¹¹Jesus wa kulama kotjipala tjomutumini. Omutumini we mu pula ha tyaa: “Oove ohamba yOvajuda?” Jesus we mu yaka ha tyaa: “Iinga, otjo ngahi wa popi.”

¹²Iya hiaa li ama pewa onkali kovayambethi ovanene nokovanene wotjiwan̯a, ke na hiaa yaka.

¹³Pilatus we mu heela ha tyaa: “Ku yuvite himave ku popi navi?”

¹⁴Iya Jesus ke mu yakele nokanunu, iya tja kumitha unene omutumini.

¹⁵Pomatango otjipito tjOpaasa pa li onkalo omutumini ndjaa kutululila ovantu onkwatwa imo ndjimava hala.

¹⁶Iya va li nonkwatwa imo ndjaa li ai iwe nawa ndjii tiwa oBarabas.

¹⁷Iya hiva ongana, Pilatus we ve pula ha tyaa: “Oun̯i po ngumamu hala ndji mu kutululile, oBarabas ne oJesus nguu tiwa oMessias?”

¹⁸Iya Pilatus wa li ae tji i okutya ovantu Jesus ve mu yandja kuye mena lyonki.

¹⁹Iya tainkolo Pilatus a li kotjipunditumino, omukadhe we mu tumina elaka ha tyaa: “Omulumentu hengu omuvyuuki. Hó mu ningile ouvi, mena lyokutya otjit̯iku tjandino mba loto ondjodhi ombi ouhunga naye.”

²⁰Iya ovayambethi ovanene novanene wotjiwan̯a va hekela owingi wovantu okutya ngava kumbe Barabas, iya Jesus nga dhipawe.

²¹Pilatus we ve pula ha tyaa: “Oun̯i po puhemba vavali ngumamu hala ndji mu kutululile?” Ve mu yaka hava tyaa: “OBarabas!”

²²Pilatus we ve pula ha tyaa: “Iya hengu Jesus nguu tiwa oMessias, nge mu ninge vi?” Avehe va yaka hava tyaa: “Mu papela komutjaakano!”

²³Iya Pilatus we ve pula ha tyaa: “Omena lyatji, ouvi mbwaa ningi owatji?” Iya wo va wololoka vala otjo mava tyaa: “Mu papela komutjaakano!”

²⁴Pilatus hiaa mono okutya ke na hima ulu, otjuuyila tja ningi otjinene, wa itha omeva, he likoho komawoko movipathi vyowingi wovantu, ha tyaa: “Ame hí na tja ombedhi yombindhi yomulumentu hengu, hehi otjipuka tjen̯i.”

²⁵Iya ovantu avehe va yaka hava tyaa: “Ombindhi ye ngai ye kombanda yetu nokombanda yodhondele dhetu!”

²⁶Iya we ve kutululila Barabas, atjaa ha tonetha Jesus nodhosokoti, he mu yandja, a ka papelwe komutjaakano.

²⁷Ovakwavita womutumini va twala Jesus mombala, hava ongedhele ovakwavita avehe puJesus.

²⁸Ve mu dhula omidhalo vye, have mu dhaleke omudhalo omunene omuthilantu.

²⁹Va manga ohala yomakuya, have mu dhaleke yo komutwe. Ve mu pa otjingenge mokuwoko kwe kwokokulyo, have mu twikile odhongolo, have mu penye, hava tyaa: “Lyepeko, ohamba yOvajuda!”

³⁰Ve mu tjakela omate, hava itha otjingenge, otjo va kala amave mu tono natjo momutwe.

³¹Hiva dhi poku mu penya, ve mu dhula omudhalo omunene, have mu dhaleke omidhalo vye. Iya ve mu twala, a ka papelwe komutjaakano.

³²Hiva li amava piti mo, va mona omulumentu Omukireni nguu tiwa oSimon. Ve mu tumin̯in̯a e mu tjindile ko omutjaakano we.

³³Iya hive ya koluvedhe nduu tiwa oGolgata, matji tya kOkalundu kOtjoolotwe,

³⁴Jesus ve mu pa a nwe ovinyu mbyaa lumbwalumbwa mumo nonyango, hiee vi lolo, ahama hala oku vi nwa.

³⁵Hive mu papele komutjaakano, ve liyandjela omidhalo vye, amava undapetha otjiholowoletho.

³⁶Wo va kala pohi hoka, have mu yungu.

³⁷Va twaa kombanda yomutwe we esoneko lyonkali ndjaa sonekwa hinyahi: “Hengu oJesus, Ohamba yOvajuda.”

³⁸Iya odhomputji mbali dha papelwa komutjaakano pamo naye, imo okokulyo nonkwawo okokumbinda kwe.

³⁹Mbava li amava ende po, va penya Jesus, otjo mava pukapuka komitwe.

⁴⁰Va popya hava tyaa: “Atjaa oove mo han̯auna otempeli, ove ho i tungulula moule womatango atatu. Lihupitha iya ove omwene, andaa oove MunwaKalunga, ove u dhe ko komutjaakano!”

⁴¹Ovayambethi ovanene novalongiveta novanene wotjiwan̯a nawo wo ve mu penya hava tyaa:

⁴²“Nahi oye a hupitha ovantu, napano wa anyenwa okulihupitha. Oye e li ohamba yaIsrael, nga dhe ko napano komutjaakano, nt̯e tu mu itavele.

⁴³Ye we liun̯ika muKalunga, iya Kalunga napano nge mu hupithe, andaa u mu hole, mena lyokutya ye omwene wa tile: ‘Aame MunwaKalunga.’ ”

⁴⁴Iya nodhomputji ndhaa papelwa pamo naye nadho wo dhe mu penya.

⁴⁵Iya owola omulongo nambali yokomutenya kwe ya et̯iku motjilongo atjihe, lyo hali kala ko katee owola ontyatatu yokomutenya.

⁴⁶Mondatu yokomutenya Jesus wa ithana nondaka onene ha tyaa: “Eli, Eli, lama sabakatani?” Matji tyaa: “Kalunga kandje, Kalunga kandje, omena lyatji wa ndjekelehi?”

⁴⁷Iya vamo owomumboka mbava li ava kulama mpoka, hive tji tee, va popya hava tyaa: “Ma ithana Elia.”

⁴⁸Umo owomuwo wa dhamuka dhivadhiva, ha itha po otjitjawo, he tji tjava movinyu mbyaa lula, he tji nwitha Jesus.

⁴⁹Iya ovakwawo ve mu heele hava tyaa: “Mu yetha, tu tale, andaa Elia me ya oku mu hupitha.”

⁵⁰Iya Jesus wa popya uke nondaka yopeulu, tjau ha t̯i.

⁵¹Iya taa tuutuu, otjitopa hitji yuvikila motempeli tja tauka okudha peulu katee pohi, ohi ya teketa, nomawe okodhondundu a tanduka,

⁵²nodhombila dha patuluka, omalutu ovadhilikwa ovengi mbava t̯a, a imunwa kout̯e.

⁵³Wo va dha mo modhombila, Jesus hiaa imuka kout̯e, have ya kotjitungwalongo otjidhilikwa, have lihololele ovengi.

⁵⁴Omunene wovakwavita namboka mbava li amava yungu pamo naye, hiva mono eteketo lyohi novipuka avihe mbyaa ningwa po, va li ava tila unene, hava tyaa: “Omuntu hengu otjatjili wa li OmunwaKalunga.”

⁵⁵Iya kompuka hoka kwa li ovakadhintu ovengi mbava dhile koGalilea, mbava landulile Jesus, ve mu popile. Va li amava talele kokule.

⁵⁶Muwo mwa li Maria Magdalena naMaria, ina yaJakob naJosef, naina yoomunkwaSebedeus.

⁵⁷Iya okawiiwii hika wile pohi, pe ya omulumentu omuhona Omwaarimatia nguu tiwa oJosef, ngoka wo ngwaa li omulongwa waJesus.

⁵⁸We ya kuPilatus, he mu kumbu otjivimbi tjaJesus. Iya Pilatus wa popya okutya nge tji pewe.

⁵⁹Josef wa itha otjivimbi, he tji dhingile motjitopa tjoliina otjiwa hitja kohoka.

⁶⁰We mu paka mombila ye ompe, ndjaa hokolele mewe. Iya wa alangatethela po ewe enene potjivelo tjombila, tjau ha dhi po.

⁶¹Iya hoka kwa li Maria Magdalena naMaria omukwawo, va li ava kala pohi, ava pilukile kombila.

⁶²Iya ngamuhuka etango ndyaa landula etango lyokulilongekedha, ovayambethi ovanene nOvafarisai va ongana puPilatus,

⁶³hava tyaa: “Taa, twa thipaluka, omupukithi ngunya tainkolo aa li nomwenyo, wa tile: ‘Andaa pa piti omatango atatu, me ka imunwa kout̯e.’

⁶⁴Iya popya okutya ombila ngai yungwe katee etango etyatatu, ovalongwa ve opo háve ya oku mu vaka mo, va heele ovantu, va tyee: ‘Jesus wa imunwa kout̯e.’ Omapukitho okon̯ima maa ningi omavi okupon̯a oolutenga.”

⁶⁵Pilatus we ve heela ha tyaa: “Ovayungi hoowomba, iya enden̯i, n̯e mu ka yunge nawa ngahi mu tji i.”

⁶⁶Iya wo va ya, hava yedhile po ewe, hava twaa ko otjihako, nopombila hava twaa po ovayungi.