Read zemba Mateus 4 Bible Online

Mateus 4 - zemba bible

Mateus 4

¹Iya Jesus wa twalwa kOmbepo yaKalunga mokuti, a ka lolwe komudiapoli.

²Iya Jesus hiee litjaela ovikulya ovitenya omilongo vine novit̯iku omilongo vine, héya lya tja, wa li aa t̯i ondjala.

³Omutyolethi we ya kuye, he mu heele ha tyaa: “Andaa oove OmunwaKalunga, heela omawe henga, a tjituke omingome.”

⁴Iya Jesus we mu yaka ha tyaa: “Kwa sonekwa amaku tiwaa: ‘Hakomungome awiika omuntu ma ulu okukala nomwenyo, iya okondaka aihe ndjimai dhi motjinyo tjaKalunga.’ ”

⁵Okudha mpoka omudiapoli wa twala Jesus kotjitungwalongo otjidhilikwa, he mu londeke kohulo yotempeli,

⁶ha tyaa: “Andaa oove OmunwaKalunga, lombokela pohi, mena lyokutya kwa sonekwa okutyaa: ‘Ye ma heele ovaengeli ve, ve ku tjinde momawoko awo, opo hó putala mewe.’ ”

⁷Jesus we mu yaka ha tyaa: “Kwa sonekwa wo okutyaa: ‘Hó lolo Muhona Kalunga koye.’ ”

⁸Omudiapoli wa twala uke Jesus kondundu onde unene, he mu yulikile ovilongo avihe vyomouye netumbalo lyavyo,

⁹he mu heele ha tyaa: “Avihe hembi me ku pa vyo, andaa mo ntwikile odhongolo, ho ntumbaleke.”

¹⁰Jesus we mu heela ha tyaa: “Satana, dha po, mena lyokutya kwa sonekwa okutyaa: ‘Muhona Kalunga koye u tha oku mu tumbaleka, oye vala aika wa thele okuundapela.’ ”

¹¹Iya omudiapoli we mu yetha, tjau, ovaengeli have ya kuJesus, have mu popile.

¹²Iya Jesus hiaa tee okutya Johannes wa yedhililwa mokaliwoso, wa tjuna koGalilea.

¹³Jesus wa dhiluka moNasaret, ha ka kala koKapernaum, hitji li pontyo yelunga, povilongo vyaSebulon novyaNaftali,

¹⁴odhondaka ndhaa popiwa komuprofeti Jesaja opo dhi hwithilwe po ndhimadhi tyaa:

¹⁵“Otjilongo tjaSebulon notjaNaftali, put̯a pelunga, tjikoohehinya tjaJordan moGalilea yovapaani,

¹⁶otjiwan̯a hitja kala met̯iku, tja mona otjiten̯i otjinene, nahembenya mbava li ava kala motjilongo nomomudhile wet̯o, otjiten̯i tje ve tungatele.”

¹⁷Iya mpoka Jesus opo a utila okuteetha ha tyaa: “Liteyululen̯i, mena lyokutya otjilongo tjeulu tje ya popedhi.”

¹⁸Jesus hiaa li ama lamba kontyo yelunga lyaGalilea, wa mona ovalilanduli vavali, Simon nguu tiwa oPetrus nomunitje Andreas, va li amava yumbu owaanda melunga, mena lyokutya va li ovahwee wodhohi.

¹⁹Jesus we ve heela ha tyaa: “Ndandula ndjen̯i, ame me mu ningi ovahwee wovantu.”

²⁰Dhivadhiva va thiaa po omawaanda, have mu landula.

²¹Hiaa hweene komeho, wa mona ovalilanduli vavali ovakwawo, Jakob nomunitje Johannes, oomunkwaSebedeus. Wo va li mowato pamo naihe Sebedeus, amava pampa omawaanda awo. Iya Jesus nawo we ve ithana.

²²Iya dhivadhiva va thiaa po ihe nowato, have mu landula.

²³Jesus wa endaenda moGalilea atjihe, ha longo ovantu modhosinagoga dhawo, ha teetha ondaka ombwa yotjilongo tjaKalunga, ha velula omitjithi avihe nomauvela aehe mokati kovantu.

²⁴Etumbuko lye lya handjana motjilongo tjaSiria atjihe. Ovantu ve mu etela ovavedhi avehe mbava li nomauvela ngae lili nangae lili noviihamo, nahemba mbava li nodhondemoni, nowovintonya, nambava vela otjinteya, avehe he ve velula.

²⁵Owingi wovantu owomoGalilea nowomoDekapolis nowomoJerusalem nowomoJudea novatjikoohehinya tjaJordan, ve mu landula.