Read zemba Mateus 5 Bible Online

Mateus 5 - zemba bible

Mateus 5

¹Jesus hiaa mono owingi wovantu, wa londa kondundu. Iya hiaa kala pohi, ovalongwa ve ve ya kuye.

²Jesus wa uta okupopya, he ve longo ha tyaa:

³“Ovanalao ombave li ovathona mombepo, mena lyokutya otjilongo tjeulu otjawo.

⁴Ovanalao ombava etetha onkenda, mena lyokutya mava ka ingwaingwa.

⁵Ovanalao ovalinunupiki, mena lyokutya mava ka pingana otjilongo.

⁶Ovanalao ombava t̯a ondjala nonyota youvyuuki,[4] mena lyokutya mava ka kutithwa.

⁷Ovanalao ovanankenda, mena lyokutya mava ka t̯ilwa onkenda.

⁸Ovanalao ombave na omitima mbyaa kohoka, mena lyokutya mava ka mona Kalunga.

⁹Ovanalao ombava kondjela ouwa, mena lyokutya mava ka ithanwa ovanwaKalunga.

¹⁰Ovanalao ombava tatethelwa ouvyuuki, mena lyokutya otjilongo tjeulu otjawo.

¹¹“N̯e muvanalao, andaa ovantu mave mu lalula, have mu tatetha, have mu popile mouvi auhe nokukemba, mena lyokutya muvalongwa vandje.

¹²Linyandaelen̯i, mu hulukwe, mena lyokutya ondjambi yen̯i onene meulu, iya otjo va tatethele ovaprofeti mbava tengele komeho yen̯i.

¹³“On̯e omungwa wouye, iya andaa omungwa wa hahuka, mau tovalethwa natji? Kau na uke otjilinga, mau yekelwahi, hau lyatwa kovantu.

¹⁴“On̯e otjiten̯i tjouye. Otjitungwalongo hitja tungilwa kondundu kaatji ulu okuholama.

¹⁵Olamba kai ten̯wa, yo hai tuwa kohi yotjihayo, iya i tulikwa kotjituliko, yo hai tungatele ovantu avehe mbave li monganda.

¹⁶Iya otjiten̯i tjen̯i ngatji tungatele movipathi vyovantu, opo va mone ovilinga vyen̯i oviwa, wo va hivilike Iho owomeulu.

¹⁷“Hámu soko okutya ame mbe ya okwiitha po oveta yaMoses ne elongo lyovaprofeti, ame hí dhile oku i itha po, iya oku i hwithila po.

¹⁸Iya me mu heele otjatjili okutya tainkolo eulu nohi háviya hula, moveta kaamu keka ondanda noimo ne okankwanyu, tainkolo avihe háviya hwithilwa po.

¹⁹Iya andaa pe na nguma itha mo tjimo tjomovitumino hembi ovinunu, atjaa ha longo hinyahi ovantu, ma ka ithanwa omununu kovakwawo motjilongo tjeulu. Iya ngume vi takametha, ha longo ovakwawo nyahi, ma ka ithanwa omunene motjilongo tjeulu.

²⁰Iya ame me mu heele okutya ouvyuuki wen̯i andaa kau pon̯ene owovalongiveta nowOvafarisai, kaamu i motjilongo tjeulu.

²¹“N̯e mwe tji tyaa hitja heelwa ovakulu okutyaa: ‘Hó dhipaa,’ haku tiwa uke: ‘Nguma dhipaa, we litaendhele oku ka koywa.’

²²Iya ame me mu heele okutya omuntu auhe nguma yumaneke omukwawo, we liundapele okukoywa. Nanguma heele omukwawo ha tyaa: ‘Tjintu ove,’ we liundapele oluyuma lwOtjoongi tjOvanene. Nanguma tyaa: ‘Tjilai ove,’ we liundapele omulilo woheli.

²³Iya andaa mo yandja otjali kotjiyambelo, atjaa hako u thipalukila omukwen̯i okutya u na hiee ku ningi,

²⁴thiaa ko otjali tjoye kotjiyambelo, u tji ye olutenga, mu lipe ouwa nomukwen̯i, ove u tjune, u ka yandje otjali tjoye.

²⁵“Itavela dhiva, mu lipe ouwa nangume ku kondjetha, tainkolo amu li naye mondjila, ngume ku kondjetha, ahame ku yandja komukoyi, omukoyi e ku yandje komuyungi, ove u yedhililwe mokaliwoso.

²⁶Ame me mu heele otjatjili okutya ove koo dhi mo, tainkolo hóya thuta okapeni kathiinina.

²⁷“N̯e mwe tji tyaa hikwa tiwaa: ‘Hó yono olukupo.’

²⁸Iya ame me mu heele okutya nguma tala omukadhintu notjihulo, we mu lesa ae momutima we.

²⁹Eho lyoye lyokokulyo andaa mali ku tyoletha, li dhoola mo, ove u li yekelehi, mena lyokutya okukeketha otjin̯ipo tjoye tjimo hahe okupon̯a olutu lwoye aluhe okuyumbwa moheli.

³⁰Okuwoko kwoye kwokokulyo andaa maku ku tyoletha, ku teta ko, ove u ku yekelehi, mena lyokutya okukeketha otjin̯ipo tjoye tjimo hahe okupon̯a olutu lwoye aluhe okuyumbwa moheli.

³¹“Iya kwa popiwa wo okutyaa: ‘Nguma yala omukadhintu we, nge mu pe omukanda wokuliyala.’

³²Iya ame me mu heele okutya omuntu auhe nguma yala omukadhintu mena lyotjipuka tjimo hihatji thi ovihulo, me mu hulithitha. Nguma kupu ngwaa yalwa, ma i movihulo.

³³“Otjikwawo uke, mwe tji tyaa hitja heelwa ovakulu okutyaa: ‘Hó ana ovithithi, iya eano lyoye li hwithila po Muhona.’

³⁴Iya ame me mu heele okutya hámu ana nokanunu, hámu ana eulu, mena lyokutya lyo otjipundi tjaKalunga,

³⁵hámu ana pohi, mena lyokutya ohi otjilyatelo tjodhompadhi dhe, hámu ana Jerusalem, mena lyokutya tjo otjitungwalongo tjOhamba onene.

³⁶Hó ana omutwe woye, mena lyokutya koo ulu okutjitukitha ondjutji imo i ninge ompembadhi ne ondholodhi.

³⁷Odhondaka dhen̯i ngadhi tyee: ‘Iinga, iinga’ ne ‘Aai, aai.’ Ndhimadhi wedhwa ko, odhombi.

³⁸“N̯e mwe tji tyaa hitja popiwa okutyaa: ‘Eho okeho, eyoo okeyoo.’

³⁹Iya ame me mu heele okutya hámu tjun̯ine omuntu ouvi ngume mu ningile ouvi. Iya ngume ku tono koluyewo lwokokulyo, mu pa olukwawo.

⁴⁰Nguma hala oku ku twala kovikoya, e ku nyeke otjikutu tjoye tjokohi, nekapote lyatjo mu pa lyo wo.

⁴¹Ngume ku n̯in̯ikidha, u mu thindikile popedhi, mu thindikila kokule.

⁴²Ngume ku kumbu, mu pa. Hó lwaapele ngume ku li ongele.

⁴³“N̯e mwe tji tyaa hitja popiwa okutyaa: ‘Kala au hole omukwen̯i, kala au yele ondjedhi yoye.’

⁴⁴Iya ame me mu heele okutya kalen̯i amu hole odhondjedhi dhen̯i, kumbilen̯i mbave mu tatetha,

⁴⁵opo mu ninge odhondele dhaIho owomeulu. Iya etango lye u li tumbithila ovawa novavi, nombula u i lokethela ovavyuuki nambahave thi ovavyuuki.

⁴⁶Iya andaa mu hole mboka mbave mu hole, mamu pewa ondjambi yatji? Novathendelethi wo otjo va ninga.

⁴⁷Iya andaa mu popitha omapanga en̯i vala, mamu tya pamo mu ninga otjipuka otjinene? Ovapaani kave tji ningi wo?

⁴⁸Iya hwilen̯i po ngaIho owomeulu hiaa hwila po.