Read zemba Mateus 6 Bible Online

Mateus 6 - zemba bible

Mateus 6

¹“Lungamen̯i okutaletha ouvyuuki wen̯i nokulimoneketha movipathi vyovantu, mpe kaamu pewa ondjambi kwiIho owomeulu.

²Iya amo yandja otjali kovathona, hó iyaula ngahi tji ninga ovalinomi modhosinagoga nomodhondjila, opo va tumbalekwe kovantu. Otjatjili me mu heele okutya mboka va pewa ondjambi yawo.

³Iya amo yandja otjali kovathona, okuwoko kwoye kokumbinda háku iwa okulyo himaku ningi,

⁴otjali tjoye opo tji kala meholamo, naIho nguu mona meholamo, me ku pa ondjambi.

⁵“Iya amamu kumbu, hámu ngala ovalinomi, mena lyokutya amava kumbu, ve hole okukulama modhosinagoga nopomawaneneno odhondjila, opo va moneke kovantu. Otjatjili me mu heele okutya mboka va pewa ondjambi yawo.

⁶Iya ove amo kumbu, hita mondjuwo yoye, yedhila po omuvelo woye, u kumbe Iho ngoka nguu li meholamo, me ku pa ondjambi.

⁷“Iya amamu kumbu, hámu yayauka ngovapaani, wo va soka okutya pamo amava yayauka nyahoka unene, opo mava teeka.

⁸N̯e hámu ngala wo, mena lyokutya Iho u tji i himamu hepwa, tainkolo hámuya kumba.

⁹N̯e mwa thele okukumba hinyahi: ‘Tate yetu nguu li meulu. Ena lyoye ngali dhilikwe.

¹⁰Otjilongo tjoye ngatji ye. Ehalo lyoye ngali hulithwe kombanda yohi ngomeulu.

¹¹Tu pa wo ndino otjithima tjetu tjetango alihe.

¹²Tu ithila po odhonkali dhetu, ngahi matu ithile po mbava lundha kunt̯e.

¹³Hó tu twala momatyoletho, iya tu hupitha mouvi. [Mena lyokutya otjilongo otjoye, nodhonkono odhoye netumbalo olyoye apehe katee apehe. Amen.]’

¹⁴“Iya andaa mamu ithile po ovantu odhonkali dhawo, Iho owomeulu me mu ithile po wo odhonkali dhen̯i.

¹⁵Iya andaa kaamu ithile po ovantu, naIho kaa itha po odhonkali dhen̯i.

¹⁶“Iya amamu litjaele ovikulya, hámu tungu omukoto ngahi tji ninga ovalinomi, mena lyokutya wo va tinda movipala, ovantu opo va mone okutya wo ve litjaele ovikulya. Otjatjili me mu heele okutya wo va pewa ondjambi yawo.

¹⁷Iya ove amo litjaele ovikulya, likoha motjipala, ove u livaveke momutwe,

¹⁸opo hó moneka kovantu okutya we litjaele ovikulya, iya u moneke vala kwiIho nguu li meholamo, naIho nguu mona meholamo, me ku thutu.

¹⁹“Hámu liongedhele omamona okombanda yohi, hwaa yonwa komulelu nokotundu, hoka ovimpulu huvi teya, vyo havi vaka.

²⁰Iya liongedhelen̯i omamona meulu, muhaa yonwa komulelu ne kotundu, novimpulu muhavi teya, vyo muhavi vaka.

²¹Iya hoka huku na emona lyoye, oko ku na omutima woye.

²²“Eho olyo li li olamba yolutu. Iya eho lyoye andaa li li nawa, olutu lwoye aluhe lu na otjiten̯i.

²³Iya eho lyoye andaa kali li nawa, olutu lwoye aluhe lu li met̯iku. Iya otjiten̯i hitji li mwoove, andaa nan̯i et̯iku, et̯iku li lithike pi!

²⁴“Kaku na nguma ulu okuundapela ovahona vavali, iya ma kala ae yele umo, ye ha kala ae hole omukwawo, ne ma hopo umo, ha tombo omukwawo. Kaamu ulu okuundapela Kalunga amamu undapele emona.

²⁵“Iya me mu heele okutya hámu t̯ile omienyo vyen̯i otjiho okutya mamu li tji ne mamu nu tji, nomalutu en̯i okutya mamu dhala tji. Omwenyo kau pon̯ene ovikulya, nolutu kalu pon̯ene omidhalo?

²⁶Talen̯i ovidhila vyokeulu: Kavi kunu, kavi teya, vyo kavi ungula movindhi, iya Iho owomeulu u vi tekula. Han̯e mwa valela unene oku vi pon̯a?

²⁷Aan̯i mun̯e, nanda kala notjiho, nguma ulu okuwedha ko koule womatango e, nandaku tiwa okantimbu kamo?

²⁸“Iya omena lyatji mu na otjiho tjomidhalo? Talen̯i odhontemo dhomokuti hidhi kula, kadhi undapa, dho kadhi pampa.

²⁹Iya ame me mu heele okutya naSalomo metumbalo lye alihe ka dhalele a ngale imo modhontemo ndhoka.

³⁰Iya Kalunga andaa ma dhaleke ehodhi lyomokuti ndii kala po vala ndino, komuhuka hali yumbwa momulilo, kee mu ningile tjo unene, n̯e owokaitavelo okanunu?

³¹“Iya hámu kala notjiho mu tyee: ‘Matu li tji?’ ne ‘Matu nu tji?’ ne ‘Matu dhala tji?’

³²Iya ovapaani owo va kala notjiho tjovipuka mbyoka avihe. Iya Iho owomeulu u tji i okutya mamu hepa ovipuka hembi avihe.

³³Olutenga taendhen̯i otjilongo tjaKalunga nouvyuuki we, iya hembi ovikwawo avihe mamu vi wedhelwa ko.

³⁴Hámu t̯ile etango lyamuhuka otjiho, mena lyokutya etango lyamuhuka mali lit̯ile otjiho olyene. Iya etango alihe li na oudheu walyo.