Read zemba Mateus 7 Bible Online

Mateus 7 - zemba bible

Mateus 7

¹“Hámu koyo, nan̯e opo hámu koywa,

²mena lyokutya ekoyo ndimamu koyo, nan̯e olyo mamu ka koywa, himamu yeleke natjo, nan̯e otjo mamu ka yelekwa natjo.

³Iya omena lyatji mo mono okatodhi hake li meho lyomukwen̯i, ove aho lwete omundangala mbuu li meho lyoye omwene?

⁴Ne omukwen̯i mo mu heele vi okutyaa: ‘Opomeya ndji ku toole okatodhi meho lyoye,’ iya nan̯i ove au na omundangala meho lyoye omwene.

⁵Mulinomi, litoola olutenga omundangala meho lyoye omwene, opo u tjiiwe nawa okumona okatodhi hake li meho lyomukwen̯i, u mu toole.

⁶“Otjidhilikwa hámu tji yandja kodhombwa, madhi piluluka hadhi mu lumata. Omakwalali en̯i ouwe wokalu hámu e yumbile ovingulu, mavi e lyata nomakoti avyo.

⁷“Kumben̯i, mamu pewa; taendhen̯i, mamu mono; popithen̯i, mamu itavelwa.

⁸Iya omuntu auhe nguma kumbu, ma pewa; nguma taendha, ma mono; nanguma popitha, ma itavelwa.

⁹Ne mu na omuntu mun̯e, andaa omuna me mu kumbu omungome, u mu pa ewe?

¹⁰Ne andaa me mu kumbu ohi, u mu pa onyoka?

¹¹Iya n̯e mbamu li ovavi, andaa mu tji i okuyandja ovipuka oviwa kovanwen̯i, unene tuu Iho owomeulu ma yandja ouwa kovantu mbamave mu kumbu.

¹²“Iya atjihe himamu hala ovantu ve mu ningile, nan̯e wo ngatjo mu ve ningila, mena lyokutya hehi otjo tji li oveta yaMoses nelongo lyovaprofeti.

¹³“Enden̯i mo, mu pitile potjivelo hitja thin̯a, mena lyokutya otjivelo otjinene, nondjila ndjaa handjuka mai twala mekeko, mbamava ende mo ovengi.

¹⁴Iya otjivelo otjinunu nondjila ndjaa thin̯a mai twala momwenyo, ovanunu vala mbamave i mono.

¹⁵“Lungamenen̯i ovaprofeti wovithithi, mboka mbave ya kun̯e movipa vyodhondhu, iya nan̯i mokati omaungu ngaa tunda.

¹⁶Iya mamu ve tangan̯ekele kovilinga vyawo. Odhombe dhi nyangwa komulodhi ne omakuyu a nyangwa komunkondo?

¹⁷Iya omuti omuwa auhe u ma ovinyango oviwa, iya omuti omuvi u ma ovinyango ovivi.

¹⁸Omuti omuwa kaau ulu okuma ovinyango ovivi, wo omuti omuvi kaau ulu okuma ovinyango oviwa.

¹⁹Omuti auhe mbuhamau ma ovinyango oviwa, mau tetwa po, hau yumbwa momulilo.

²⁰Iya ovaprofeti mamu ve tangan̯ekele kovilinga vyawo.

²¹“Hamuntu auhe nguma ntyaa: ‘Muhona, Muhona,’ ma ulu okuya motjilongo tjeulu, iya onguma undapa ehalo lyaTate owomeulu.

²²Metango ndyoka ovengi mava ka ntjeela amava tyaa: ‘Muhona, Muhona, hant̯e twa teethele mena lyoye, twa ta mo odhondemoni mena lyoye, hatu undapa ovilingankono ovingi mena lyoye?’

²³Iya ame me ke ve heela he tyaa: ‘Ame hí mu i nokanunu, dhen̯i po pwaame, mwa pengetha oveta yaKalunga!’

²⁴“Iya omuntu auhe nguma tee odhondaka dhandje hendhi, ye he dhi hwithile po, ma yelekwa nomulumentu omunadhondunge, ngwaa tungila ondjuwo ye yekuma koluwaa.

²⁵Iya ombula ya loka, ethundja hali ya, nombepo hai pepe, hai litono mondjuwo ndjoka, iya ahamai kumauka po, mena lyokutya ya tungilwa koluwaa.

²⁶“Iya omuntu auhe nguma tee odhondaka dhandje hendhi, ye ahame dhi hwithile po, ma yelekwa nomulumentu omuhima, ngwaa tungila ondjuwo ye yekuma moluheke.

²⁷Iya ombula ya loka, ethundja hali ya, nombepo hai pepe, hai litono mondjuwo ndjoka, hai kumauka po, nekumaukopo lyatjo lya li enene.”

²⁸Iya Jesus hiaa mana okupopya odhondaka hendhi, owingi wovantu we kuminwa elongo lye,

²⁹mena lyokutya we ve longa nganguu na odhonkono, hatjo ngovalongiveta vawo.