Read zemba Mateus 9 Bible Online

Mateus 9 - zemba bible

Mateus 9

¹Jesus wa londa mowato, ha yauka, he ya kondolopa yokoyawo.

²Iya taa tuutuu, ovantu ve mu etela omulumentu nguu na otjinteya, aa lalekwa po kotjintali. Jesus hiaa mono eitavelo lyawo, wa heela omuvedhi wotjinteya ha tyaa: “Likolethela, ndele yandje, odhonkali dhoye dha ithwa po.”

³Iya vamo owomovalongiveta ve lipopila hava tyaa: “Omuntu hengu ma penye Kalunga.”

⁴Jesus hiaa mono omalipulo awo, we ve heela ha tyaa: “Omena lyatji mamu lipula ovipuka hembi ovivi momitima vyen̯i?

⁵Hitja puvala otjin̯i, okutya: ‘Odhonkali dhoye dha ithwa po,’ ne okutya: ‘Kulama, enda’?

⁶Iya opo mu kale amu tji i okutya Omuna wOmuntu u na odhonkono kombanda yohi okwiitha po odhonkali,” Jesus wa heela omuvedhi wotjinteya ha tyaa: “Kulama, itha po otjintali tjoye, enda konganda.”

⁷Omuvedhi wotjinteya wa kulama, ha i konganda.

⁸Iya owingi wovantu hiwe tji mono, wa li awa tila, hava hivilike Kalunga, ngwaa yandja odhonkono ndhii lithike hempa kovantu.

⁹Jesus hiaa dhi hoka, wa mona omuntu nguu tiwa oMateus, aa kala pohi pombonge yokuthendelela elilimo. Jesus we mu heela ha tyaa: “Ndandula ndje.” Mateus wa kulama, he mu landula.

¹⁰Jesus tainkolo a li monganda yaMateus ama li, ovathendelethi ovengi novalundhi ve ya, hava li pamo naye novalongwa ve.

¹¹Ovafarisai hive tji mono, va pula ovalongwa ve hava tyaa: “Omena lyatji omulongethi wen̯i hima li pamo novathendelethi novalundhi?”

¹²Iya Jesus hiee tji tee, we ve heela ha tyaa: “Mbave li nawa kava hepa otjimbanda, iya ovavedhi owo vala aveika mava hepa otjimbanda.

¹³Iya enden̯i mu ke lilonge otjipuka hehi okutya matji tya vi: ‘Onkenda me hala, hamayambo.’ Ame hí dhile okwiithana ovavyuuki, iya mbe ya okwiithana ovalundhi.”

¹⁴Ovalongwa vaJohannes ve ya kuJesus hava tyaa: “Nt̯e nOvafarisai tu litjaela otwingi ovikulya, iya omena lyatji ovalongwa woye hihave litjaele ovikulya?”

¹⁵Jesus we ve yaka ha tyaa: “Ngundhe ovakongwa womukupi kaava ulu okweetetha onkenda, andaa nguma kupu ve li naye? Iya katango omukupi mave ke mu nyekwa, opo mave ke litjaela ovikulya.

¹⁶“Kape na tja omuntu nguma pampa omudhalo omukulu nelimendu epe ndihaliya kohwa, andaa me tji ningi, elimendu epe mali uthula omudhalo, nontovi mai ningi onene okupon̯a onkulu.

¹⁷Iya kape na tja omuntu nguma dhili ovinyu ovipe modhosaku dhotjipa odhonkulu. Iya andaa me tji ningi, ovinyu mavi uthula odhosaku. Ovinyu ovipe vi dhilwa modhosaku odhompe, avyeevali opo vi hupe.”

¹⁸Jesus tainkolo a li ame ve heele ovipuka hembi, pe ya omunene wosinagoga, he liyongamene kuye, ha tyaa: “Omunwandje omukadhona wa t̯i, indjo u mu tendeke okuwoko a hupe.”

¹⁹Jesus wa kulama, he mu landula, novalongwa ve va ya wo pamo naye.

²⁰Iya kwa li omukadhintu ngwaa velele olulala odhombula omulongo nambali, we ya kon̯ima yaJesus, ha t̯in̯i kotjilyo tjomudhalo we.

²¹Omukadhintu we lipopila ha tyaa: “Andaa mba t̯in̯i vala komudhalo we, me veluka.”

²²Iya Jesus wa piluluka, he mu mono, ha tyaa: “Likolethela, mukadhona wandje, eitavelo lyoye lye ku velula.” Iya poluvedhe lwatjo vala mpoka omukadhintu wa veluka.

²³Jesus hiee ya monganda yomunene wosinagoga, wa mona mo ovahiki wodhofilita dhomukoti notjuuyila tjowingi wovantu.

²⁴We ve heela ha tyaa: “Dhen̯i mo amuhe, mena lyokutya okakadhona kaka t̯ile, ka lala.” Iya ovantu ve mu yola.

²⁵Iya owingi wovantu hiwa lambwa mo, Jesus wa ya mo, he mu kambula mokuwoko, ha imuka po.

²⁶Odhondaka ndhika dha ya motjit̯indwalongo atjihe.

²⁷Jesus hiaa dhi hoka, ovapot̯i vavali ve mu landula, hava wololoka, hava tyaa: “MunwaDavid, tu t̯ila onkenda!”

²⁸Hiee ya monganda, have ya kuye. We ve pula ha tyaa: “Mwa itavele tuu okutya me ulu oku tji ninga?” Ve mu yaka hava tyaa: “Iinga, Muhona.”

²⁹Iya Jesus wa t̯in̯a omeho awo ha tyaa: “Ningilwen̯i ngahi mwa itavele.”

³⁰Omeho awo a twikuluka. Jesus we ve londola nodhonkono ha tyaa: “Lungamen̯i, hápa kala noumo ngume tji iwa.”

³¹Iya hiva i, va ka hipulula Jesus motjit̯indwalongo hehinya atjihe.

³²Iya ovapot̯i hiva i, Jesus wa etelwa omulumentu nguha popi, ye ngwaa li nondemoni.

³³Ondemoni hiya tewa mo, omuhapopi wa popya. Owingi wovantu we kumwa hau tyaa: “Otjipuka ngahehi katjiya moneka mo nokanunu moIsrael.”

³⁴Iya Ovafarisai va popya hava tyaa: “Odhondemoni me dhi ta mo kodhonkono dhomunene wodhondemoni.”

³⁵Jesus wa endaenda modhondolopa adhihe nomoulongo auhe. Wa longa ovantu modhosinagoga dhawo, ha teetha ondaka ombwa yotjilongo tjaKalunga. Wa velula omutjithi auhe nouvela auhe.

³⁶Iya hiaa mono owingi wovantu, we ve etethela mo onkenda, mena lyokutya va mona ovihuna, ve ulwa, va ngala odhondhu ndhihadhi na omut̯ita.

³⁷Iya wa heela ovalongwa ve ha tyaa: “Ovilya ovingi, atjaa ovaundapi ovanunu.

³⁸Iya kumben̯i, omwene wovilya a tume ovaundapi keteyo lyovilya vye.”