Read zemba Markus 10 Bible Online

Markus 10 - zemba bible

Markus 10

¹Jesus wa dha ko hoka, ha i kotjit̯indwalongo tjaJudea tjikoohehinya tjaJordan. Iya owingi wovantu we ya uke kuye, iya ye we ve longa ngahi e ve ningaela ae.

²Ovafarisai vamo ve ya kuJesus, iya ve mu lola amave mu pula hava tyaa: “Tja itavelwa tuu omulumentu okuyala omukadhintu we?”

³Jesus we ve yaka ha tyaa: “Moses we mu heela mu ninge vi?”

⁴Iya wo ve mu heela hava tyaa: “Moses wa itavela okutya omulumentu nga soneke omukanda wokuliyala, e mu yale.”

⁵Jesus we ve yaka ha tyaa: “Iya Moses we mu sonekela otjitumino hehi, mena lyokutya omitima vyen̯i omikukutu.

⁶Iya okudha pomautilo euto Kalunga we ve uta omulumentu nomukadhintu.

⁷Iya nyahoka matji tya omulumentu ma ka thiaa po ina naihe,[6] he ke likuta komukadhintu we,

⁸iya hemba vavali mava ile omuntu umo. Iya kaava kala uke vavali, iya omuntu umo.

⁹Iya Kalunga soka hiaa twaa kumo, hátji ithwa kumo komuntu.”

¹⁰Iya hiva i uke konganda, ovalongwa ve mu pula uke ouhunga notjipuka hehi.

¹¹Iya ye we ve yaka ha tyaa: “Nguma yala omukadhintu we, ye ha kupu uke umo, ma i movihulo.

¹²Omukadhintu andaa ma yala omulumentu we, ye ha kupwa kuumo, ma i movihulo.”

¹³Iya ovantu va eta oulele kuJesus e u t̯in̯e, atjaa ovalongwa va tjaela mboka mbava li amava eta oulele.

¹⁴Iya Jesus hiee tji mono, wa yumana, ha tyaa: “Yethen̯i oulele u ye kwaame, hámu u tjaele, mena lyokutya otjilongo tjaKalunga otjovantu mbava ngala oulele hembu.

¹⁵Ame me mu heele otjatjili okutya nguhama tambula otjilongo tjaKalunga ngokalele, kaa i mo.”

¹⁶Iya ye we u tjiika momawoko, he u tendeke omawoko, he u pa elao.

¹⁷Jesus hiaa utu okuya nondjila ye, etele limo lye mu dhamukila, hali twike odhongolo kotjipala tje, hali tyaa: “Mulongethi omuwa, mba thele okuninga tji, ndji mone omwenyo waapehe?”

¹⁸Jesus we mu yaka ha tyaa: “Omena lyatji mo ntya ndjimuwa? Kaku na tja uke omuntu omuwa, Kalunga oye e li vala aika omuwa.

¹⁹Ovitumino u vi i: ‘Hó dhipaa, hó yono olukupo, hó vaka, hó kuminine, hó nyeka amo lungamene, tumbaleka iho nanyoko.’ ”

²⁰Lye mu yaka hali tyaa: “Mulongethi, ovipuka avihe hembi mbe vi takametha okudha koudhantu wandje.”

²¹Jesus we mu tala, he mu hopo, he mu heele ha tyaa: “Wa kambetha po otjipuka tjimo. Enda, u ka landethe po ovipuka vyoye avihe mbyuu na vyo, ove u vi yandje kovathona, iya ove u kale nemona meulu, tjau ove u ye, u ndandule.”

²²Iya odhondaka ndhoka dhe mu ihameka omutima, ha dhi po aa etetha onkenda, mena lyokutya wa li nemona en̯ingi.

²³Jesus wa kevauka kodhontyo nodhontyo, ha heele ovalongwa ve ha tyaa: “Oudheu vi kumbave na ouhona okuya motjilongo tjaKalunga!”

²⁴Ovalongwa ve kuminwa odhondaka dhe. Iya Jesus we ve heela uke ha tyaa: “Vakwe! Oudheu vi okuya motjilongo tjaKalunga.

²⁵Ongamelu okupitila meyulu lyonguya otjipu okupon̯a omuhona okuya motjilongo tjaKalunga.”

²⁶Ovalongwa ve kuminwe unene, have lipula hava tyaa: “Iya nan̯i nguma ulu okuhupithwa aan̯i?”

²⁷Jesus we ve tala, he ve heele ha tyaa: “Komuntu kaatji tjiiwa, iya kuKalunga ovipuka avihe vi tjiiwa.”

²⁸Petrus wa uta oku mu heela ha tyaa: “Taa tuutuu, nt̯e twa thiaa po ovipuka avihe, hatu ku landula.”

²⁹Jesus we ve heela ha tyaa: “Ame me mu heele otjatjili okutya kape na tja ngwaa thiaa po onganda ne ovanitje novakulwe ovadhantu ne odhompandje ne ihe ne ina, ovana ne ovyana mena lyandje ne mena lyokutandaveletha ondaka ombwa,

³⁰ye a kale ngaile ahe na hima pewa mouye hembu. Iya nanda mono omatatetho, ma pewa twethele odhonganda novanitje novakulwe ovadhantu nodhompandje nowoina novana novyana. Iya mouye mbumau ya ma ka pewa omwenyo waapehe.

³¹Iya ovantu ovengi napano mbave li owolutenga mava ka kala owokon̯ima, ovengi mbave li owokon̯ima mava ka kala owolutenga.”

³²Jesus novalongwa ve va li mondjila amava i kombanda koJerusalem, Jesus hiee ve kambulile komeho, ovalongwa va li ave kumwa, tainkolo mbava li amava ende nawo, va li ava tila. Ye wa itha po uke mboka omulongo navavali, have ke likalela, ha utu oku ve heela himatji ke mu vadha,

³³ha tyaa: “Taa tuutuu, matu i kombanda koJerusalem, Omuna wOmuntu ma ka yandjwa momawoko ovayambethi ovanene novalongiveta, mave ke mu koyela et̯o, wo mave ke mu yandja uke kovapaani,

³⁴wo mave ke mu penya, mave ke mu tjakela omate, mave ke mu tona nodhosokoti, have ke mu dhipaa. Iya kon̯ima yomatango atatu ma ka imuka kout̯e.”

³⁵Iya oomunkwaSebedeus ooJakob naJohannes ve ya kuJesus hava tyaa: “Mulongethi, matu hala u tu ningile himatu ku kumbu.”

³⁶Iya ye he ve pula ha tyaa: “Mamu hala ndji mu ningile tji?”

³⁷Iya wo ve mu heela hava tyaa: “Itavela, tu kale pohi, umo okokulyo kwoye, umo okokumbinda kwoye, metumbalo lyoye.”

³⁸Iya Jesus we ve heela ha tyaa: “N̯e himamu kumbu, kamu tji i. Otjinwino[7] hime ka nwa, mamu ulu oku ke tji nwa ne etjatjo ndime ka tjatjwa, mamu ulu oku ke li tjatjwa?”

³⁹Wo ve mu yaka hava tyaa: “Matu tji ulu.” Jesus we ve heela ha tyaa: “Otjinwino hime ka nwa, mamu ke tji nwa, netjatjo ndime ka tjatjwa, mamu ke li tjatjwa.

⁴⁰Iya okukala pohi kokulyo ne kokumbinda kwandje, haame me ku yandja maku ka yandjwa kumbave ku longekedhelwa.”

⁴¹Iya omulongo hive tji tee, va uta okuyumaneka Jakob naJohannes.

⁴²Iya Jesus wa ithanena ovalongwa ve pamo, he ve heele ha tyaa: “Mu tji i okutya mboka mbava tiwa ovatumini woviwan̯a ve vi tumina, novanene vavyo ve vi tumina nodhonkono dhawo.

⁴³Iya mokati ken̯i hámu kala nyahoka. Iya mokati ken̯i nguma hala a kale omunene, nge mu undapele,

⁴⁴nangoka mokati ken̯i nguma hala a kale omunakomeho, nga kale omupika wovakwawo avehe.

⁴⁵Iya nangahi tji li Omuna wOmuntu ke dhile okuundapelwa, iya okuundapa nokuyandja omwenyo we u ninge ondjowo yovantu ovengi.”

⁴⁶Iya Jesus novalongwa ve ve ya koJeriko. Iya ye hiaa dhi koJeriko novalongwa ve nowingi wovantu, Bartimeus yaTimeus, omupot̯i nguu kopa, wa li aa kala pohi pontyo yondjila.

⁴⁷Iya hiaa tee okutya oJesus Omunasareta, wa uta okuwololoka ha tyaa: “Jesus, MunwaDavid, nt̯ila ndje onkenda!”

⁴⁸Owingi wovantu hau mu anda a nyime, iya ngunya ha wololoka uke unene ha tyaa: “MunwaDavid, nt̯ila ndje onkenda!”

⁴⁹Okudha mpoka Jesus wa kulama, ha tyaa: “Mu ithanen̯i.” Va ithana omupot̯i, have mu heele hava tyaa: “Likolethela, kulama, Jesus we ku ithana.”

⁵⁰Iya ye we lihukula dhiva ekapote lye, he ya kuJesus.

⁵¹Jesus we mu popitha ha tyaa: “Mo hala ndji ku ningile tji?” Omupot̯i we mu heela ha tyaa: “Rabbuni,[8] me hala ndji twikuluke.”

⁵²Iya Jesus we mu heela ha tyaa: “Enda, eitavelo lyoye lye ku velula.” Iya dhivadhiva okudha mpoka ha twikuluka, he mu landula mondjila.