Read zemba Markus 12 Bible Online

Markus 12 - zemba bible

Markus 12

¹Jesus wa uta oku ve heela momaeli ha tyaa: “Kwa li omulumentu umo ngwaa twikile omivinyu motjuundo tje. Ye we tji umba olumbo, ha tha mo otjikolelo,[11] ha tungu mo ondjuwo ndjaa ya pokatangaulu, ha undike mo ovantu, tjau ye ha ka valula.

²Otembu yokupya hiye thiki, omwene wotjuundo wa tuma omupika we kumbava undikwa otjuundo, ve mu pe ovinyango mbyaa thele okupewa.

³Iya ovaundikwa ve mu kambula, have mu tono, have mu tjun̯a ae li omawoko anyahinya.

⁴Iya omwene wotjuundo wa tuma ko uke omupika umo, ve mu tona ombolo, have mu t̯itha ohon̯i navi.

⁵Iya wa tuma ko uke umo, iya ngoka ve mu dhipaa, ha tumu ko ovakwawo uke ovengi, vamo have ve tono, vamo have ve dhipaa.

⁶Iya ye wa li ae na po uke umo, omuna omuhivilikwa. Ye kon̯ima we ke mu tuma ko ha tyaa: ‘Omunwandje mave ke mu tumbaleka.’

⁷Iya ovaundikwa ve liheela hava tyaa: ‘Hengu oye e li ompinga, tu mu dhipaen̯i, epingo li ninge po olyetu.’

⁸Ve mu kambula, have mu dhipaa, have mu yumbu kotjila tjotjuundo.

⁹“Iya omwene wotjuundo ma ningi vi? Me ke ya, ha han̯auna po ovaundikwa, ye he tji pa vamo.

¹⁰Nan̯i kamu tangele omusonekwa hembu mbumau tyaa: ‘Ewe ndyoka ovatungi ndiva yekelahi, lya ninga ewe ndyaa tumbala okupon̯a omawe aehe.

¹¹Hehi tja ningwa kuMuhona, tjo otjikumithi momeho etu’?”

¹²Iya ovanene wOvajuda va li amava hala okukambula Jesus, mena lyokutya va iwa okutya owo a li ama popi meeli hendi. Iya mena lyokutya va li amava tila owingi wovantu, ve mu thiaa po, hava i.

¹³Iya wo ve mu tumina Ovafarisai vamo namboka mbava ama kuHerodes, ve mu tele modhondaka.

¹⁴Iya ve ya, have mu heele hava tyaa: “Mulongethi, tu tji i okutya oove owatjatjili, ku na tja nomuntu, mena lyokutya ove ku tala otjipala tjomuntu, iya u longa ovantu ondjila yaKalunga otjatjili. Tja vyuuka tuu okuyandja elilimo komukesari ne hatjo? Ngatu yandje ne hátu yandja?”

¹⁵Jesus hiaa nongonoka okuliningitha kwawo, we ve heela ha tyaa: “Omena lyatji mamu hala okundola? Ndjetela ndjen̯i ondenari ndji i tale.”

¹⁶Ve i eta. Iya ye we ve pula ha tyaa: “Ethano nesoneko hendi ndii li ko, olyaan̯i?” Wo ve mu yaka hava tyaa: “Olyomukesari.”

¹⁷Iya okudha mpoka Jesus we ve heela ha tyaa: “Ovipuka vyomukesari vi pen̯i omukesari, ovyaKalunga vi pen̯i Kalunga.” Iya wo ve mu kuminwa.

¹⁸Iya Ovasadukai hemba mbava tya kaku na tja eimuko, ve ya kuye, have mu pula hava tyaa:

¹⁹“Mulongethi, Moses we tu sonekela hinyahi okutya andaa pe na omulumentu, ngwee thiwa po komukulwe omulumentu ne komunitje omulumentu, ha thii po omuhepe, atjaa omulumentu hengu ahama thii po odhondele, okutya nga kupe omuhepe womukulwe ne womunitje, a yumukile omukulwe ne omunitje oluyumuko.

²⁰Iya kwa li ovalumentu ovalilanduli epanduvali. Owolutenga wa kupile omukadhintu, hiaa t̯i, ka thiile po oluyumuko.

²¹Omutyavali wa kupa omuhepe, iya naye wa ka t̯a, ahama thii po wo oluyumuko. Nomutyatatu otjo a ninga.

²²Avehe epanduvali kava thiile po oluyumuko. Okudha mpoka omuhepe wa ka t̯a kon̯ima.

²³Iya peimuko kout̯e, ma ka kala omukadhintu waan̯i, mena lyokutya avehe epanduvali ve mu kupile?”

²⁴Jesus we ve heela ha tyaa: “Kamu pukile mpaeli nyahi, mena lyokutya omisonekwa kamu vi i, nodhonkono dhaKalunga kamu dhi i?

²⁵Iya himava ka imunwa kout̯e, kaava ka kupa, wo kaava ka kupwa, iya mava ka ngala ovaengeli meulu.

²⁶Iya kombinga yeimuko lyovat̯e, kamu tangele nan̯i membo lyaMoses motjihipululo himatji popi eno, Kalunga hiee mu heela ha tyaa: ‘Aame Kalunga kaAbraham naKalunga kaIsak naKalunga kaJakob?’

²⁷Ye haKalunga kovat̯e,[12] iya okovanamwenyo. N̯e mwa puka unene.”

²⁸Iya kwe ya umo owomovalongiveta ngwaa tyaa himave litetha ombata. Wa koneka okutya Jesus we ve yaka nawa. Ye we ya kuye, he mu pula ha tyaa: “Otjitumino hitja tumbala okupon̯a ovikwawo otjin̯i?”

²⁹Jesus we mu yaka ha tyaa: “Otjitumino tjolutengatenga hootjohi: ‘Israel teelela, Muhona Kalunga ketu, oye e li aika Muhona.

³⁰Kala au hole Muhona Kalunga koye komutima woye auhe nokomwenyo woye auhe nokodhondunge dhoye adhihe nokodhonkono dhoye adhihe.’

³¹Otjityavali hootjohi: ‘Kala au hole omukwen̯i ngahi u lihole omwene.’ Kape na tja uke otjitumino otjinene hitja pon̯a hembi.”

³²Omulongiveta we mu heela ha tyaa: “Iinga, Mulongethi wa popi otjatjili okutya Kalunga yuumo vala, kaku na tja uke omukwawo, oye vala aika.

³³Okukala au mu hole komutima auhe nokodhondunge adhihe nokodhonkono adhihe nokukala au hole omukwen̯i ngahi u lihole omwene, tjo tja pon̯a omalungwinithwayambo kuKalunga nomayambo omakwawo.”

³⁴Jesus hiaa mono okutya wa yaka nawa, we mu heela ha tyaa: “Ove ku li kokule notjilongo tjaKalunga.” Okudha mpoka kapa li noumo ngwaa li ama hala oku mu pula uke omapulo.

³⁵Iya Jesus hiaa li ama longo ovantu motempeli, we ve pula ha tyaa: “Ovalongiveta mava tile tji Messias omunwaDavid?

³⁶Iya David ye omwene wa viyulwa kOmbepo Ondhilikwa ha tyaa: ‘Muhona wa heela Muhona wandje ha tyaa: Kala pohi kokulyo kwandje katee me twaa odhondjedhi dhoye kohi yodhompadhi dhoye.’

³⁷David omwene u mu ithana ‘Muhona,’ iya ma ile vi uke omuna?” Iya owingi wovantu wa li amau mu teelele nehuluko.

³⁸Jesus hiaa li ama longo ovantu we ve heela ha tyaa: “Lungamenen̯i ovalongiveta mbave hole okudhala omidhalo omile, wo ve hole okupopithilwa pomalandethelo.

³⁹Ve hole kovipundi vyokomeho modhosinagoga nopomalukalo ngaa tumbala movipito.

⁴⁰Va nyeka ovahepe odhonganda dhawo nokuninga omaalikano omale okulimoneketha vala. Wo mava ka yumanekwa unene.”

⁴¹Jesus wa li a kala pohi, aa pilukile kotjikasa mumu tuwa mbimavi yambwa, ye wa li ama tala ovantu himava twaa mo motjikasa. Ovahona ovengi va twaa mo otjin̯ingi.

⁴²Iya pe ke ya omuhepe umo omuthona ngwaa twaa mo oumbongo uvali, mbuu lithike vala pokapeni kamo.

⁴³Jesus wa ithana ovalongwa ve, ve ye kuye, iya we ve heela ha tyaa: “Me mu heele otjatjili okutya omuhepe hengu omuthona wa twaa mo otjin̯ingi okupon̯a ovantu avehe mboka mbava twaa mo motjikasa.

⁴⁴Iya avehe va twaa mo mbyoka ovyomovihupe vyawo, iya ye mouthona we wa twaa mo atjihe hiaa li natjo, emona lye alihe.”