Read zemba Markus 13 Bible Online

Markus 13 - zemba bible

Markus 13

¹Jesus hiaa dhi motempeli, umo owomovalongwa ve we mu heela ha tyaa: “Mulongethi, taa tuutuu omawe ngoka nomatungo henga mpae lithike.”

²Jesus we mu yaka ha tyaa: “Omatungo henga omanene u e lwete? Hempa kaape ke thiwa ewe ndyaa tendekwa kekwawo, háli kumuninwe po.”

³Iya Jesus hiaa li aa kala pohi kOndundu yomiholivi, aa pilukile kotempeli, Petrus naJakob naJohannes naAndreas ve mu pula pokampengi hava tyaa:

⁴“Tu heela okutya ovipuka hembi mavi ka ningwa nalun̯i? Iya etangan̯eko mali ka kala olyatji okutya hembi avihe mavi ka ningwa?”

⁵Jesus wa uta oku ve heela ha tyaa: “Lungamen̯i, hámu pukithwa komuntu noumo.

⁶Ovantu ovengi mave ke ya nena lyandje, wo have lityaa: ‘Aame,’ iya mava ka pukitha ovantu ovengi.

⁷Iya andaa mwa ka tyaa ovita, nomipopyo ouhunga novita, hámu tila. Ovipuka hembi vi tha okuningwa, tjau ehulilo hali ke ya kon̯ima.

⁸Otjiwan̯a matji ka lwitha otjiwan̯a otjikwawo, notjilongo matji ka lwitha otjilongo otjikwawo. Maku ke ya ondjala, nohi mai ka teketa pomaluvedhe nomaluvedhe. Ovipuka hembi omautilo oudheu ngedhimo amali kweya.

⁹“Iya lilungamenen̯i n̯e ovene. Ovantu mave ke mu yandja kovyoongi vyovanene, mamu ka tonenwa modhosinagoga, iya mamu ka twalwa kovipala vyovatumini novyodhohamba mena lyandje, mu ninge odhombangi dhokuntjipulula kuwo.

¹⁰Iya olutenga ondaka ombwa ya thele okuteethelwa oviwan̯a avihe.

¹¹Iya andaa mwa kambulwa, hámu kala notjiho okutya mamu ka popya tji, iya ka popyen̯i soka himamu ka pewa powola yatjo ndjoka, mena lyokutya han̯e mamu popi, iya Ombepo Ondhilikwa oyo mai popi.

¹²Omukulwe ne omunitje ma ka weleleka omukwawo, he mu dhipaetha, naihe ma ka weleleka omuna. Odhondele mava ka kondjetha ovanene vawo, have ve dhipaetha.

¹³Ovantu avehe mava ka kala ave mu yele mena lyandje. Iya ngume likambulithile katee pehulilo, ma ka hupithwa.

¹⁴“Andaa mwa mono ovipo vyehan̯auno avi li pompuka mpahavya thele, (omutangi nga tangan̯eke) iya mboka mbave li moJudea ngava inkolele kodhondundu.

¹⁵Nguma vadhwa kombanda yondjuwo, há heluka, ye há i mondjuwo, a ka pitile mo ovipuka vye.

¹⁶Nguma vadhwa motjana, há tjuna monganda, a ka pitile mo omudhalo we.

¹⁷Utatyei ovat̯imba novamwali pomatango ngoka!

¹⁸Iya kumben̯i okutya hehi ahamatji ningwa pompepela!

¹⁹Pomatango ngoka maku ka kala ovihuna ovinene mbihavya li ko okudha komautilo, Kalunga hiaa uta ouye katee napano, vyo kaavi ka kala ko uke.

²⁰Muhona ngaile omatango ngoka ke e ningile omathupi, ngai kape na tja omuntu nguma hupithwa, iya mena lyovaholowolwa mbaa holowola, omatango we e ninga omathupi.

²¹“Iya andaa pe na ngume mu heele ha tyaa: ‘Taa tuutuu, Messias hooyongu’ ne ‘Taa tuutuu, hooyongunya’, hámu itavele.

²²Iya maku ke ya oomessias wovithithi novaprofeti wovithithi, mava ka ninga omatangan̯eko novilingakumithi okupukitha ovaholowolwa, andaa matji tjiiwa.

²³Iya lungamen̯i, ovipuka hembi avihe mba tenge oku mu heela vyo.

²⁴“Iya kon̯ima yovihuna vyomatango ngoka, etango mali ka dhiwela, nomwedhi kaau ke liten̯a po,

²⁵odhonyothi madhi ka wa ko keulu nodhonkono dhomeulu madhi ka teketethwa.

²⁶Iya ovantu mava ka mona Omuna wOmuntu ame ya momakaka okeulu, ae na odhonkono odhonene netumbalo.

²⁷Ye ma ka tuma ovaengeli ve, mava ka ongedha ovaholowolwa ve kodhontyo ne dhouye okudha mpapa hulila ouye katee mpapa ka andela eulu.

²⁸“Iya lilongen̯i omaeli komukuyu. Ovitho avya tauka, havi eta oluhapo, kalen̯i amu tji i okutya ovintola vi li popedhi.

²⁹Iya nan̯e wo amamu mono ovipuka hembi amavi ya, iwen̯i okutya otembu ye ya popedhi, pomuvelo.

³⁰Me mu heele otjatjili, ekula hendi kaali hulu, tainkolo ovipuka hembi avihe háviya ningwa.

³¹Eulu nohi mavi hulu, iya odhondaka dhandje kaadhi hulu.

³²“Iya etango ne owola ndjoka kape na nguu i i, novaengeli meulu ne Omuna, oTate vala aika.

³³Kalen̯i amwa lungama, n̯e mu pathumuke, mena lyokutya otembu ndjoka kamu i i okutya mai ya nalun̯i.

³⁴Matji ka ngala omulumentu ngwaa ya kovilongo, wa thiaa po onganda ye, ha twaa po ovapika ve va yunge ovipuka vye. Omuntu auhe wa pewa otjilinga tje, wa heela wo omuyungi wopotjivelo a kale aa lungama.

³⁵Iya pathumuken̯i, mena lyokutya kamu tji i okutya omwene wonganda ma tjuna nalun̯i, kutya okongulohi ne omokati kovit̯iku ne omodhontengahuhwa ne omomahuka,

³⁶hime ya ontukuluka, ahame mu vadha amwa lala.

³⁷Hime mu heele, otjo me heele ovantu avehe okutyaa: ‘Kalen̯i amwa lungama!’ ”