Read zemba Markus 14 Bible Online

Markus 14 - zemba bible

Markus 14

¹Iya kwa li omatango avali otjipito tjOpaasa notjomingome mbihavi tuwa ontathi tji thike, ovayambethi ovanene novalongiveta va tompola okutya va kambule Jesus movineya, wo ve mu dhipae.

²Va popya hava tyaa: “Hátu tji ningile motjipito, opo hátji eta ovipolokota mokati kovantu.”

³Jesus hiaa li moBetania monganda yaSimon owovilundu, aa kala pohi pokulya, mwe ya omukadhintu umo nguu na otjivavelo hitje yula otjidhimba tjonarde[13] yatjatjili yokalu. Iya ye wa pambula otjivavelo, otjidhimba tjatjo he tji tile komutwe waJesus.

⁴Vamo mboka mbava li mo, ve mu velele ombedhi hava tyaa: “Otjidhimba hehi matji yonakele tji nyahika?

⁵Ngaile tja landethelwe po, ngai tja eta odhondenari oku ka pita omathele atatu, dhi yandjwe kovathona.” Va li amave mu vele odhombedhi.

⁶Jesus we ve heela ha tyaa: “Mu yethen̯i. Omena lyatji mamu mu ningitha omutima omuvi? Ngunya wa ndjundapele otjilinga otjiwa.

⁷Ovathona apehe mamu kala nawo, mamu ke ve ningila ouwa auhe mbumamu hala, iya ame híme kala nan̯e apehe.

⁸Ngunya wa undapa hima ulu, wa vaveke olutu lwandje, tainkolo epako lyandje háliye ya.

⁹Me mu heele otjatjili okutya akuhe hoka mouye auhe ondaka ombwa humai ka teethelwa, nahehi wo ye hiaa ningi, matji ka hipululwa, ha thipalukilwa ko.”

¹⁰Iya Judas Iskariot, umo owomomulongo navavali, wa ya kovayambethi ovanene, e ke ve welelekele Jesus.

¹¹Iya wo hive tji tee, va li ave hulukwa, wo have mu udhikile oku mu pa odhombongo. Iya Judas wa li ama taendha okaluvedhe koku mu yandja.

¹²Etango lyolutenga lyotjipito tjomingome mbihavi tuwa ontathi moka mumu dhipawa ondjona yOpaasa, ovalongwa vaJesus ve mu pula hava tyaa: “Opi mpamo hala oku ka lila Opaasa, opo tu ke ku longekedhela?”

¹³Jesus wa tuma vavali owomovalongwa ve, he ve heele ha tyaa: “Enden̯i kotjitungwalongo, mamu ka wanena nomulumentu ngwaa tjindi olundingo[14] lwomeva. Mu landulen̯i

¹⁴katee monganda moka muma i, heelen̯i omwene wonganda mu tyee: ‘Omulongethi ma pula okutya ondjuwo yovayenda i li pi, ndji ka lile mo Opaasa pamo novalongwa vandje?’

¹⁵Ye me mu yulikile ondjuwo onene yopeulu ndjaa kombwa nawa. Ngamo mu tu longekedhela moka.”

¹⁶Ovalongwa va ya, hive ya motjitungwalongo, ovipuka avihe vya li ngahi ve vi heelwa. Iya hava longekedha Opaasa.

¹⁷Iya okawiiwii hika wile pohi, Jesus we ya novalongwa ve omulongo navavali.

¹⁸Iya tainkolo va li ava kala pohi amava li, Jesus we ve heela ha tyaa: “Ame me mu heele otjatjili okutya umo mun̯e, ngumatu li naye, ma ka mbweleleka.”

¹⁹Wo va uta okweetetha onkenda, have mu pula koumo naumo hava tyaa: “Ame haame?”

²⁰Jesus we ve yaka ha tyaa: “Yuumo mun̯e mboka omulongo navavali ngoka ngumatu himi naye mombiyona.

²¹Iinga, Omuna wOmuntu ma i, ngahi tja sonekwa ouhunga naye, atjaa utatyei omuntu ngoka nguma ka weleleka Omuna wOmuntu! Omuntu ngoka ngaile ka yumukilwe, ngai hahe.”

²²Hiva li amava li, Jesus wa itha po omungome, ha kumbu, he u nyembula, he u pa ovalongwa ve, ha tyaa: “Tambulen̯i, hehi olutu lwandje.”

²³Wa itha po otjinwino, ha kumbu, he ve pa tjo, hava nu mo avehe.

²⁴Ye we ve heela ha tyaa: “Hehi ombindhi yandje, ombindhi yewaneneno, ndjimai tilwahi mena lyovengi.

²⁵Me mu heele otjatjili: Híme ka nwa uke ovinyu katee etango ndyoka hime ka nwa ovipe motjilongo tjaKalunga.”

²⁶Iya hiva dhi pokwiimba eimbilo, va ya kOndundu yomiholivi.

²⁷Iya Jesus we ve heela ha tyaa: “N̯e amuhe mamu ka ndjetha, mena lyokutya omisonekwa mavi tyaa: ‘Me dhipaa omut̯ita, odhondhu hadhi handjana.’

²⁸Iya amba imunwa kout̯e, me ke mu tenga koGalilea.”

²⁹Petrus we mu heela ha tyaa: “Nandaku tiwa avehe ve ke ku yetha, ame híme ke ku yetha.”

³⁰Jesus we mu heela ha tyaa: “Me ku heele otjatjili, otjit̯iku tjandino tainkolo onkondombolo háiya popya tuvali, ove mo lintendele tutatu.”

³¹Petrus we mu heela nodhonkono ha tyaa: “Nandaku tiwa mba ka t̯a pamo naove, hime ke litendela ove.” Ovakwawo avehe nawo otjo va yaka.

³²Wo ve ya koluvedhe nduu tiwa oGetsemane, iya Jesus wa heela ovalongwa ve ha tyaa: “Kalen̯i pohi hempa, tainkolo me ka kumba.”

³³Iya ye wa itha po Petrus naJakob naJohannes, ha i nawo, iya wa uta okutila, he ihamenwa.

³⁴Iya we ve heela ha tyaa: “Omwenyo wandje wa pongo katee ket̯o. Kalen̯i hempa, pathumuken̯i.”

³⁵Iya ye wa hweena uke komeho kanunu, ha wile pohi, ha kumbu okutya andaa matji tjiiwa okaluvedhe hoka ke mu pon̯oke.

³⁶Wa popya ha tyaa: “Abba, Taa, avihe mo vi ulu, ndjeka ndje otjinwino[15] hehi. Iya hangahi me hala, ongahi mo hala.”

³⁷Iya Jesus hiaa tjuna, wa vadha ovalongwa ve ava lala. Wa pula Petrus ha tyaa: “Simon, wa lala? Wa anyenwa okupathumuka owola imo vala?

³⁸Pathumuken̯i, mu kumbe, hámu pwile momatyoletho. Ombepo yomuntu mai hala, iya olutu olunkundi.”

³⁹Ye wa tjuna ko uke, ha ka kumba, odhondaka dhatjo ndhoka odho a popya tuu.

⁴⁰Iya hiaa tjuna uke, we ve vadha uke ava lala, mena lyokutya va li nolupot̯i momeho, wo kava li ave tji i okutya mave mu yaka vi.

⁴¹Iya ye wa tjuna uke otjikando otjityatatu, he ve heele ha tyaa: “Mu na tjo, mwa lala tuu, mamu thuva? Tjau, tja hulu. Owola ye thiki. Taa tuutuu, Omuna wOmuntu ma yandjwa momawoko ovalundhi.

⁴²Kulamen̯i, tu enden̯i. Taa tuutuu, nguma mbweleleka u li popedhi.”

⁴³Iya dhivadhiva Jesus tainkolo a li ama popi, Judas, umo owomuhemba omulongo navavali, we ya nengundwa lyovantu ndii na omikonda nodhonkunye, va tumwa okudha kovayambethi ovanene nokovalongiveta nokovanene wotjiwan̯a.

⁴⁴Omuweleleki wa vadhwa ae ve n̯anga onyala, ha tyaa: “Ngume hupita, oye e li ye, mu kambulen̯i, n̯e hámu mu yetha, mu takamethen̯i.”

⁴⁵Judas hiee ya, wa ya kuJesus dhivadhiva, ha tyaa: “Rabbi,” he mu hupita.

⁴⁶Iya mbenya ve mu yumba omawoko, have mu kambula.

⁴⁷Iya umo owomumboka mbava li ava kulama mpoka, wa pweya mo omukonda we, ha tono nawo omupika womuyambethi omunene, he mu kopola okutwi.

⁴⁸Iya Jesus we ve yaka ha tyaa: “Mwe ya nomaonga nodhonkunye ngambamamu kambula otjimpulu?

⁴⁹Omatango aehe ndji kala nan̯e motempeli ndji longa ovantu, n̯e kamu nkambula. Iya hehi matji ningwa okutya omisonekwa opo vi hwithilwe po.”

⁵⁰Iya ovalongwa avehe ve mu thiaa po, hava ka inkola.

⁵¹Omulumentu umo ngwaa li po omununu kovakwawo, wa landula Jesus. Wa li ae lipoleke otjitopa tjoliina kolutu lwanyahinya, wo ve tje hala oku mu kambula.

⁵²Ye wa thiaa po otjitopa, ha ka inkola nyahinya.

⁵³Jesus ve mu twalwa komuyambethi omunene, hukwa li akwa onganene ovayambethi ovanene avehe novanene wotjiwan̯a novalongiveta.

⁵⁴Petrus we mu landula, ae li kon̯ima kokule, we ya katee monganda yomuyambethi omunene. Wa kala pohi povayungi wonganda, a ungulukwe pomulilo.

⁵⁵Ovayambethi ovanene nOtjoongi atjihe tjovanene va li amava taendha oumbangi wokudhipaetha Jesus, iya ahamave u mono.

⁵⁶Ovengi ve mu kuminina, atjaa ovithithi vyawo ahamavi i kumo.

⁵⁷Okudha mpoka vamo va kulama, have mu kuminine amava tyaa:

⁵⁸“Nt̯e twe mu tyaa ama tyaa: ‘Ame me han̯auna po otempeli hendji ndjaa tungwa nomawoko, moule womatango atatu me tungu imo ndjihamai ka tungwa nomawoko.’ ”

⁵⁹Iya nomuhehi otjihipululo tjawo katji ile kumo.

⁶⁰Iya omuyambethi omunene wa kulama movipathi vyawo, ha pula Jesus ha tyaa: “Koo yaka ovantu hemba mbamave ku popi?”

⁶¹Iya Jesus wa nyima vala, ke mu yakele. Omuyambethi omunene we mu pula uke ha tyaa: “Oove u li Messias, Omuna wOmutumbalekwa?”

⁶²Jesus we mu yaka ha tyaa: “Aame. Iya mamu ka mona Omuna wOmuntu, aa kala pohi kokulyo kOmunadhonkono, ame ya kombanda yomakaka okeulu.”

⁶³Iya omuyambethi omunene wa taula omidhalo vye, ha tyaa: “Twa hepa uke odhombangi dhatji?

⁶⁴Epenyo lye mwe li tee. Mamu tya vi?” Iya wo avehe ve mu pa onkali yokut̯a.

⁶⁵Iya vamo va uta oku mu tjakela omate, have mu kutu pomeho, have mu tono nodhongonyo, hava tyaa: “Thimbila!” Ovayungi wonganda ve mu tona nomapi.

⁶⁶Petrus hiaa li pontanga yonganda, pe ya omukadhona umo owomonganda yomuyambethi omunene.

⁶⁷Iya hiaa mono Petrus ama yoto, we mu tongolola, ha tyaa: “Ove naove wa li pamo naJesus Omunasareta.”

⁶⁸Iya Petrus we litendela, ha tyaa: “Ame hí mu i, ye himo popi, hí tji yuvite.” Iya hiaa piti pondje, onkondombolo hai popi.

⁶⁹Iya omukadhona hiee mu mono mpoka, wa heela uke ovantu mbava li ava kulama mpoka ha tyaa: “Omulumentu hengu yuumo owomuwo.”

⁷⁰Iya ye we litendela uke. Kon̯ima yokaluvedhe mboka mbava li mpoka, va heela Petrus hava tyaa: “Otjatjili oove umo owomuwo, mena lyokutya oove Omugalilea.”

⁷¹Iya wa uta okulithinga, ha ana ha tyaa: “Omulumentu hengu ngumamu popi, ame hí mu i.”

⁷²Dhivadhiva onkondombolo ya popya otjikando otjityavali. Iya Petrus wa thipaluka odhondaka ndhaa heelwa kuJesus ndhaa tyaa: “Onkondombolo tainkolo háiya popya tuvali, ove mo lintendele tutatu.” Wa enda omwenyo, ha lili.