Read zemba Markus 15 Bible Online

Markus 15 - zemba bible

Markus 15

¹Iya omuhuka omunene ovayambethi ovanene novanene wotjiwan̯a novalongiveta nOtjoongi atjihe tjovanene tja tompola. Iya wo va kuta Jesus, have mu itha po, have mu yandja kuPilatus.

²Pilatus we mu pula ha tyaa: “Oove ohamba yOvajuda?” Ye we mu yaka ha tyaa: “Iinga, otjo ngahi wa popi.”

³Ovayambethi ovanene ve mu pa onkali movipuka ovingi.

⁴Iya Pilatus we mu pula uke ha tyaa: “Ku na tja himo yaka? Taa tuutuu, wo himave ku pa odhonkali movipuka ovingi.”

⁵Iya Jesus ke mu yakele uke, iya hehi tja kumitha Pilatus.

⁶Pomatango otjipito tjOpaasa pa li onkalo, Pilatus ndjaa kutululila ovantu onkwatwa imo ndjimave mu pula.

⁷Kwa li omulumentu umo nguu tiwa oBarabas ngwaa kambulilwe pamo nodhomputji odhonkwawo, mbava li notjipopya tjokudhipaa omuntu.

⁸Iya owingi wovantu we ya, hava utu okupula Pilatus e ve ningile ngahi e ve ningaela.

⁹Pilatus we ve yaka ha tyaa: “Mamu hala ndji mu kutululile ohamba yOvajuda?”

¹⁰Iya ye wa li ae tji i okutya ovayambethi ovanene Jesus ve mu eta kuye mena lyonki.

¹¹Iya ovayambethi ovanene va hongaetha owingi wovantu, va kumbe Pilatus e ve kutululile Barabas.

¹²Pilatus we ve pula uke ha tyaa: “Omulumentu hengu ngumamu tya ohamba yOvajuda nge mu ninge vi?”

¹³Wo va wololoka hava tyaa: “Mu papela komutjaakano!”

¹⁴Iya Pilatus we ve pula ha tyaa: “Omena lyatji, ouvi mbwaa ningi owatji?” Iya wo va wololoka vala otjo mava tyaa: “Mu papela komutjaakano!”

¹⁵Iya Pilatus hiaa li ama hala okuthevelwa ovantu, we ve kutululila Barabas. Wa tonetha Jesus nodhosokoti, he mu yandja, a ka papelwe komutjaakano.

¹⁶Ovakwavita ve mu twala mombala, hava ithana uke ovakwawo avehe.

¹⁷Ve mu dhaleka omudhalo omunene wopurpuri, hava manga ohala yomakuya, have mu dhaleke yo komutwe.

¹⁸Iya va uta oku mu popitha hava tyaa: “Lyepeko, ohamba yOvajuda!”

¹⁹Iya va kala amave mu tono notjingenge momutwe, otjo mave mu tjakela omate, wo have mu twikile odhongolo ngambamave mu tumbaleke.

²⁰Iya hiva dhi poku mu penya, ve mu dhula omudhalo omunene wopurpuri, have mu dhaleke omidhalo vye. Iya ve mu twala, a ka papelwe komutjaakano.

²¹Iya ovakwavita va tumin̯in̯a omulumentu umo, ngwaa li ama dhi kotjana, nguu tiwa oSimon Omukireni, ihe yaAleksander naRufus e mu tjindile ko omutjaakano we.

²²Wo va eta Jesus koluvedhe nduu tiwa oGolgata, matji tya Okalundu kOtjoolotwe.

²³Iya wo ve mu pa ovinyu mbyaa lumbwalumbwa mumo nomira, iya ye ahame vi nu.

²⁴Iya ve mu papela komutjaakano, have liyandjele omidhalo vye, amava undapetha otjiholowoletho, opo va mone okutya omuntu auhe ma mono tji.

²⁵Owola ndjoka ndjive mu papela komutjaakano ya li omoovi womuhuka.

²⁶Iya esoneko lyonkali ye lya sonekwa hinyahi: “Ohamba yOvajuda.”

²⁷Odhomputji mbali dha papelwa komutjaakano pamo naJesus, imo okokulyo nonkwawo okokumbinda kwe.

²⁸[Otjo hinyahi omisonekwa vi yaukithwe mbimavi tyaa: “Ye wa havelwa modhomputji.”][16]

²⁹Iya mbava li amava ende po, va penya Jesus, otjo mava pukapuka komitwe, hava tyaa: “Ha-haa! Atjaa oove mo han̯aununa otempeli, ove ho i tungulula moule womatango atatu.

³⁰Lihupitha iya ove omwene, ove u dhe ko komutjaakano.”

³¹Iya novayambethi ovanene novalongiveta nawo wo ve mu penya hava tyaa: “Nahi oye a hupitha ovantu napano wa anyenwa okulihupitha.

³²Messias, ohamba yaIsrael, nga dhe ko napano komutjaakano, tu tji mone, nt̯e tu mu itavele.” Iya nodhomputji ndhaa papelwa pamo naye nadho wo dhe mu penya.

³³Iya owola omulongo nambali yokomutenya kwe ya et̯iku motjilongo atjihe, lyo hali kala ko katee owola ontyatatu yokomutenya.

³⁴Mondatu yokomutenya Jesus wa ithana nondaka onene ha tyaa: “Eli, Eli, lama sabakatani?” Matji tyaa: “Kalunga kandje, Kalunga kandje, omena lyatji wa ndjekelehi?”

³⁵Iya vamo owomumboka mbava li ava kulama mpoka, hive tji tee, va popya hava tyaa: “Teelelen̯i, ma ithana Elia.”

³⁶Umo owomuwo wa dhamuka, ha itha po otjitjawo, he tji tjava movinyu mbyaa lula, he tji nwitha Jesus, ha tyaa: “Mu yethen̯i, tu tale, andaa Elia me ya oku mu itha ko.”

³⁷Iya Jesus wa popya nondaka yopeulu, tjau ha t̯i.

³⁸Otjitopa hitji yuvikila motempeli tja tauka okudha peulu katee pohi.

³⁹Iya omunene wovakwavita hengu ngwaa li aa kulama, ae mu vyuukilile, ye hiaa mono et̯o lye, ha tyaa: “Omuntu hengu otjatjili wa li OmunwaKalunga.”

⁴⁰Iya kwa li ovakadhintu mbava li ava kulama kokule amava tala. Muwo mwa li Maria Magdalena naSalome naMaria, ina yaJakob omununu naJoses.

⁴¹Wo nahi va kala moGalilea, ve mu landula have mu popile. Ovakadhintu vamo ovengi ve ya pamo naye koJerusalem.

⁴²Iya hikwa toko, tjo tja li etango lyokulilongekedha, ndyoka ndyaa landulwa kEsabati,

⁴³Josef owokoArimatia, omutumbalekwa womOtjoongi tjovanene, ngoka wo ngwaa li ama kevelele otjilongo tjaKalunga, we ya aa vandhipala, ha i kuPilatus, he mu kumbu otjivimbi tjaJesus.

⁴⁴Pilatus we kumwa hiaa tee okutya ngunya wa t̯i ae lukulu, wa ithana omunene wovakwavita, he ke mu pula andaa Jesus wa t̯i ae lukulu.

⁴⁵Hiee tji tee komunene wovakwavita, okutya otjo tji li nyahoka, wa yandja otjivimbi tjaJesus kuJosef.

⁴⁶Josef wa landa otjitopa tjoliina, ha itha ko otjivimbi, he tji dhingile motjitopa tjoliina, iya he mu paka mombila ndjaa hokolelwe mewe. Iya wa alangatethela po ewe potjivelo tjombila.

⁴⁷Maria Magdalena naMaria, ina yaJoses va li amava tala mpoka Jesus mpama pakwa.