Read zemba Markus 2 Bible Online

Markus 2 - zemba bible

Markus 2

¹Kon̯ima yomatango amo Jesus wa ya uke koKapernaum. Ovantu hava tee okutya u li ponganda.

²Ovantu ovengi va onganene, katee pomuvelo wondjuwo ahamapa kala uke olukalo. Tainkolo Jesus wa li ame ve teethele odhondaka dhaKalunga,

³pe ya ovalumentu vane mbava tjindi omulumentu nguu na otjinteya, have mu eta kuJesus.

⁴Iya mena lyowingi wovantu va anyenenwe oku mu thikitha puJesus, hava uthula ontovi kombanda yondjuwo, hai vyuukilile pompuka mpoka mpapa li Jesus, hapo va thothononena otjiyalo moka mumwa li omuvedhi wotjinteya.

⁵Jesus hiaa mono eitavelo lyawo, wa heela omuvedhi wotjinteya ha tyaa: “Ndele yandje, odhonkali dhoye dha ithwa po.”

⁶Ovalongiveta vamo, mboka mbava li ava kala pohi mpoka, ve lipopila hava tyaa:

⁷“Ma popi vi nyahi? Ma penye Kalunga! Aan̯i nguma ulu okwiitha po odhonkali, haKalunga vala aika?”

⁸Jesus wa iwa dhiva soka hiva li amave lipula momitima vyawo, we ve pula ha tyaa: “Omena lyatji mamu lipula ovipuka hembi momitima vyen̯i?

⁹Hitja puvala otjin̯i, okuheela omuvedhi wotjinteya okutya: ‘Odhonkali dhoye dha ithwa po,’ ne oku mu heela okutya: ‘Kulama, itha po otjiyalo tjoye, enda’?

¹⁰Iya opo mu kale amu tji i okutya Omuna wOmuntu u na odhonkono kombanda yohi okwiitha po odhonkali,” Jesus wa heela omuvedhi wotjinteya ha tyaa:

¹¹“Ame me ku heele okutya kulama, itha po otjiyalo tjoye, enda konganda.”

¹²Omuvedhi wotjinteya wa kulama, ha itha po otjiyalo tje, ha i pondje movipathi vyawo avehe. Ovantu avehe ve kumwa, hava hivilike Kalunga hava tyaa: “Otjipuka hitji li nyahi, nkee twa dhile katuye tji mona.”

¹³Jesus wa ya uke kontyo yelunga. Ovantu avehe ve ya kuye, he ve longo.

¹⁴Iya hiaa hweene komeho, wa mona Levi yaAlfeus, aa kala pohi pombonge yokuthendelela elilimo. Jesus we mu heela ha tyaa: “Ndandula ndje!” Levi wa kulama, he mu landula.

¹⁵Jesus tainkolo a li monganda yaLevi, ama li, ovathendelethi ovengi novalundhi va lile pamo naye novalongwa ve, mena lyokutya owingi wawo va li ovalanduli vaJesus.

¹⁶Ovalongiveta mboka mbava li Ovafarisai hiva mono ama li pamo novalundhi novathendelethi, va pula ovalongwa ve hava tyaa: “Omena lyatji hima li pamo novathendelethi novalundhi?”

¹⁷Jesus hiee tji tee, we ve heela ha tyaa: “Mbave li nawa kava hepa otjimbanda, iya ovavedhi owo vala aveika mava hepa otjimbanda. Ame hí dhile okwiithana ovavyuuki, iya mbe ya okwiithana ovalundhi.”

¹⁸Ovalongwa vaJohannes nOvafarisai va li ave litjaela ovikulya. Ovantu vamo ve ya kuJesus hava tyaa: “Ovalongwa vaJohannes nOvafarisai ve litjaela ovikulya, iya omena lyatji ovalongwa woye hihave litjaele ovikulya?”

¹⁹Jesus we ve yaka ha tyaa: “Ngundhe ovakongwa womukupi kaava ulu okulitjaela ovikulya, andaa omukupi ve li naye? Tainkolo omukupi ave li naye, kaave litjaele ovikulya.

²⁰Iya katango omukupi mave ke mu nyekwa, opo mave ke litjaela ovikulya.

²¹“Kape na tja omuntu nguma pampa omudhalo omukulu nelimendu epe ndihaliya kohwa, andaa me tji ningi, elimendu epe mali uthula omudhalo, nontovi mai ningi onene okupon̯a onkulu.

²²Iya kape na tja omuntu nguma dhili ovinyu ovipe modhosaku dhotjipa odhonkulu. Iya andaa me tji ningi, ovinyu mavi uthula odhosaku. Ovinyu ovipe vi dhilwa modhosaku odhompe.”

²³MEsabati limo Jesus wa yatakana movyana. Ovalongwa ve tainkolo va li amava ende, va uta okupweya otiliku.

²⁴Ovafarisai va heela Jesus hava tyaa: “Taa tuutuu, omena lyatji ovalongwa woye mava ningi soka hitja tjaelwa okuningwa mEsabati?”

²⁵Jesus we ve yaka ha tyaa: “Kamu tangele nan̯i soka David hiaa ningile, hiaa li aa t̯i ondjala, ye hé na hima li, omwene novantu ve?

²⁶Potjikando soka Abiatar hiaa li omuyambethi omunene, David wa hita mondjuwo yaKalunga, ha li omingome mbyaa yambwa Kalunga, mbyoka mbyaa tjaelwa okuliwa kumboka mbahave thi ovayambethi. Iya namboka mbava li naye we ve pa.”

²⁷Jesus ha tyaa: “Esabati lya twiilwa po omuntu, hamuntu a twiilwa po Esabati.

²⁸Iya Omuna wOmuntu oye e li Muhona wEsabati.”