Read zemba Markus 3 Bible Online

Markus 3 - zemba bible

Markus 3

¹Iya Jesus wa ya uke mosinagoga, moka mumwa li omulumentu ngwaa lemana okuwoko.

²Ovantu mboka mbava li mo, va li amave mu talele, andaa me mu velula mEsabati, opo ve tjiiwe oku mu vela ombedhi.

³Jesus wa heela omulumentu ngwaa lemana okuwoko ha tyaa: “Kulama komeho yovantu.”

⁴We ve pula ha tyaa: “Otjitji hitja itavelwa okuningwa metango lyEsabati, okuundapa ouwa ne okuundapa ouvi, okuhupitha omwenyo ne okudhipaa?” Wo va nyima vala.

⁵Jesus we ve tala nomadhinge, ye he ve etethele mo onkenda, mena lyokutya omitima vyawo vya li omikukutu. Wa heela omulumentu hengu ha tyaa: “Onyonona okuwoko kwoye.” Ye we ku onyonona, haku lemanuka.

⁶Ovafarisai va pita mo mosinagoga, hava utu dhivadhiva okutompola novantu mboka mbava li ava ama kuHerodes, opo ve tjiiwe okudhipaa Jesus.

⁷Jesus wa ya novalongwa ve kontyo yelunga lyaGalilea. Owingi wovantu mbwaa dha moGalilea we mu landula. Iya nowomoJudea,

⁸nowomoJerusalem, nowomoIdumea natjikoohehinya tjaJordan nowomovilongo vyaTiro naSidon ve ya kuJesus, mena lyokutya va tyaa ovipuka mbyaa undapa.

⁹Jesus wa heela ovalongwa ve, ve mu longekedhele owato popedhi, mena lyokutya pa li ovantu ovengi, opo have mu thin̯a.

¹⁰Jesus wa velula ovantu ovengi, mboka mbava li nomauvela awo va hweena otjo mave liyundulile kuye, opo ve mu t̯in̯e.

¹¹Odhombepo odhombi hidhe mu mono, dhe lit̯imika po kotjipala tje, dho hadhi popile peulu hadhi tyaa: “Oove OmunwaKalunga!”

¹²Jesus wa anda nodhonkono odhombepo odhombi, opo hadhi mu hololola.

¹³Jesus wa londa kondundu, ha ithana mboka mbama hala, ve ye kuye.

¹⁴Ye wa holowola omulongo navavali, va kale puye, he ve luku ovayapostoli, opo e ke ve tume, va ka teethe,

¹⁵wo va kale nodhonkono dhokuta mo odhondemoni.

¹⁶Mboka omulongo navavali mbaa holowola, hoowomba: OSimon, ngoka Jesus ngwaa luka Petrus,

¹⁷oJakob yaSebedeus nomunitje Johannes, mboka Jesus mbaa luka Boanerges, ena hendi mali tyaa: Ovalumentu mbava ngala etitimo lyombula,

¹⁸naAndreas naFilippus naBartolomeus naMateus naTomas naJakob yaAlfeus naTaddeus naSimon Omukanana

¹⁹naJudas Iskariot, ngoka ngwee mu weleleka.

²⁰Okudha mpoka Jesus wa ya koyawo, owingi wovantu wa onganene uke, okutya Jesus novalongwa ve kave tjiivilwe uke okulya.

²¹Ovawo hive tji tee, va ya ko ve ke mu kambule, mena lyokutya va li amava tyaa: “Ma vele epamba.”

²²Iya ovalongiveta mbava dhile koJerusalem va tyaa: “U na Belsebul, odhondemoni me dhi ta mo kodhonkono dhomunene wodhondemoni.”

²³Jesus we ve ithana va hweene kuye, he ve heele momaeli ha tyaa: “Satana ma ulu vi okuta mo Satana?

²⁴Otjilongo andaa matji lit̯ile onki otjene, otjilongo soka kaatji kala po.

²⁵Onganda ndjimai lit̯ile onki oyene, onganda ndjoka kaai kala po.

²⁶Iya Satana andaa me likondjetha omwene, ye he lit̯ile onki, kaa ulu okukala po, ma hulu.

²⁷“Okutya kape na tja nguma ulu okupunda onganda yomulumentu nguu na odhonkono, e mu nyeke ovipuka vye. Olutenga nkwai me tji mu kutu, kon̯ima opo ma ulu okupunda onganda ye.

²⁸“Ame me mu heele okutya odhonkali adhihe nomapenyo aehe nandaku tiwa e lithike pi, ovantu mava ulu oku e ithilwa po.

²⁹Iya nguma penye Ombepo Ondhilikwa, kaa ithilwa po onkali ye katee apehe, iya ma kala nonkali yaapehe.”

³⁰Jesus hehi we tji popila, mena lyokutya ovantu hava tya, u na ombepo ombi.

³¹Ina yaJesus novanitje ovalumentu ve ya, hava kulama pondje. Hava tumu ontumwa i mu ithane.

³²Iya owingi wovantu wa kala pohi hau mu onganene, hava heele Jesus hava tyaa: “Taa tuutuu, nyoko novanitjoye ve li pondje, mave ku taendha.”

³³Jesus we ve yaka ha tyaa: “Meme novanitjandje owaan̯i?”

³⁴Iya hiaa tala mowingi wovantu mbwaa li awe mu onganene, ha tyaa: “Taa tuutuu, meme novanitjandje hoowomba!

³⁵Meme nomunitjandje nompandjandje omuntu ngoka nguma hwithile po ehalo lyaKalunga.”